ཕས་ཀྱི་རྒོལ་བ་ཀུན་གྱིས་མི་གཡོས་ཤིང་། །འཁོར་གྱི་ནང་ན་ཟླ་བ་ཉ་བ་ལྟར། །གང་ཟག་དམ་པ་རྣམ་པར་ལམ་མེར་བཞུགས། །ཆོས་ཀྱི་དམ་པ་སྟོན་པར་མཛད་པ་ན། །ཕྱོགས་བཅུ་ཀུན་ཏུ་ཁྱོད་ནི་ཐ་ལེ་ཞིང་། །བདུད་ཀྱི་སྡེ་དཔོན་མ་ལུས་རབ་བཅོམ་ནས། །གསེར་གྱི་རི་བོ་འཕགས་བཞིན་ལམ་མེར་གདའ། །ཀླུ་ཡི་བདག་པོ་མི་གཡོས་གནས་པ་ལྟར། །གཽ་ཏ་མའི་ཉན་ཐོས་མི་ཕམ་ལགས། །ཞི་གནས་དགྱེས་ཀྱི་སྲས་རྣམས་ཞི་གནས་དགའ། །དེ་དག་ནང་ན་རྒྱལ་བ་གསུང་ཚེ་མཛེས། །ཡོན་ཏན་ཡང་དག་སྟོན་པ་འཇིག་རྟེན་གྲགས། །དེ་ལྟར་རྒྱལ་བ་ཤཱཀ་ཐུབ་ལམ་མེར་བཞུགས། །ཇི་ལྟར་རི་རབ་རྒྱ་མཚོའི་ནང་འཕགས་ཤིང་། །རིན་ཆེན་སྣ་ཚོགས་རྣམས་ཀྱིས་མཛེས་པ་ལྟར། །དེ་བཞིན་ཤཱཀྱ་ཁྱུ་མཆོག་འཇིག་རྟེན་འཕགས། །སེམས་ཅན་ཀུན་ལས་ཁྱོད་འཕགས་ལམ་མེར་བཞུགས། །ཇི་ལྟར་པད་མ་ཆུས་ནི་མི་གོས་ལྟར། །དེ་བཞིན་འཇིག་རྟེན་དག་ན་མ་གོས་བཞུགས། །ཇི་ལྟར་རི་རབ་རྟག་ཏུ་བརྒྱན་པ་ལྟར། །ཁྱོད་ནི་ཡང་དག་འཕགས་པས་ཀུན་ཏུ་མཛེས། །དེ་ལྟར་རྒྱལ་བ་མཁས་པ་རྣམས་ཀྱིས་བསྐོར། །ལྷ་དང་བཅས་པའི་འཁོར་ནང་མངོན་པར་འཕགས། །སུམ་ཅུ་རྩ་གསུམ་གནས་ན་ཡོངས་འདུ་ཤིང་། །མེ་ཏོག་ལེགས་ཆས་འཕགས་མཛེས་ལྷག་གེ་ལྟར། །དེ་བཞིན་ལྷ་དང་བཅས་པའི་འཁོར་ནང་ན། །ཤཱཀྱ་ཁྱུ་མཆོག་མཚན་གྱིས་རྣམ་པར་མཛེས། །འོད་གསལ་ཟུར་བརྒྱད་ནོར་བུ་བཻ་དཱུརྱ། །དུ་གུལ་ཀ་ཤི་གོས་ཀྱི་སྟེང་བཞག་ན། །ཀུན་གྱིས་མི་གོས་ལྟ་བུར་དགྲ་བཅོམ་རྣམས། །མེ་ལོང་བཞིན་དུ་སེམས་དག་དྲི་མ་མེད། །ཁྱོད་ཀྱི་ཉན་ཐོས་དེ་དག་ནི། །བྱམས་པ་ཤིན་ཏུ་བསྒོམས་ནས་གནས། །ཉན་ཐོས་བརྟན་རྣམས་ཡེ་ཤེས་དགའ། །ཉོན་མོངས་མ་མཆིས་གདམས་ངག་སྟོན། །རྒྱལ་པོ་འདིར་ནི་མཆིས་པ་ཡང་། །དེ་དག་རྣམས་ཀྱིས་མ་ཚོར་ལགས། །གང་གི་ཉན་ཐོས་དེ་དག་ནི། །ཞི་ཞིང་ཆོས་ཀུན་མི་གནས་པ། །ཅང་མཁྱེན་ཁྱོད་ལ་ཕྱག་འཚལ་ལོ། །སྐྱེས་མཆོག་ཁྱོད་ལ་ཕྱག་འཚལ་ལོ། །ཡེ་ཤེས་ཀྱིས་ནི་སྐུ་བསྒོམས་ཤིང་། །ཡེ་ཤེས་སྐུ་ཡིས་ཞུགས་པ་ལགས། །ཡེ་ཤེས་སྐུ་ཡིས་རྫོགས་སངས་རྒྱས། །སྐུ་ཡིས་ཟླ་བ་གསུམ་དུ་བཞུགས། །རྫོགས་སངས་རྒྱས་པ་སྨྲ་རྣམས་མཆོག །ཡེ་ཤེས་ལྡན་པ་རྟག་ཏུ་མཛེས།