བ་དན་སྟོང་ཕྲག་དྲུག་ཁྲི་ནི་བསྒྲེང་། རོལ་མོའི་སྒྲ་སྟོང་ཕྲག་དྲུག་ཁྲི་དང་། རྔ་བོ་ཆེ་དང་། སིལ་སྙན་གྱི་སྒྲ་དུ་མ་དག་ནི་སྒྲོགས་ཤིང་། རྒྱལ་པོ་ཆེན་པོ་དེའི་མཐུས་གྲོང་ཁྱེར་ཆེན་པོ་མཉན་ཡོད་དུ་དོང་ངོ་། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་བཞོན་པ་ལ་ཇི་སྲིད་བཞོན་དུ་རུང་བ་དེ་སྲིད་དུ་བཞོན་པས་སོང་སྟེ། བཞོན་པ་ལས་བབས་ནས་ཡུལ་ན་མཐུ་དང་། བརྩོན་འགྲུས་ཐོབ་པ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་རྒྱལ་པོའི་རྟགས་ལྔ་པོ་གང་དག་ཡིན་པ་འདི་ལྟ་སྟེ། རལ་གྲི་རིན་པོ་ཆེ་དང་། གདུགས་རིན་པོ་ཆེ་དང་། ཅོད་པན་རིན་པོ་ཆེ་དང་། བསིལ་ཡབ་རིན་པོ་ཆེ་དང་མཆིལ་ལྷམ་ནོར་བུ་རིན་པོ་ཆེ་ལས་བྱས་པ་སྟེ། དེ་དག་ཐམས་ཅད་ཕུད་ཅིང་བཞག་ནས་རྐང་པས་རྒྱལ་བུ་རྒྱལ་བྱེད་ཀྱི་ཚལ་དུ་སོང་ངོ་། །དེ་ནས་ཀོ་ས་ལའི་རྒྱལ་པོ་གསལ་རྒྱལ་གྱིས་རྒྱལ་བུ་རྒྱལ་བྱེད་ཀྱི་ཚལ་ན་སྒྲ་ཆུང་བར་རིག་ནས་སྣ་ཆེན་པོ་ལ་གཏོགས་པ་དབྱིབས་རིང་ལ་སྨྲས་པ། དབྱིབས་རིང་འདི་ལྟར་འདི་ནི་བསམ་གཏན་པ་གནས་མེད་པ་རྣམས་ཀྱི་གནས་སོ། །རྣལ་འབྱོར་པ་དབེན་པ་ལ་དགའ་བ་རྣམས་དང་། སྟོང་པ་ཉིད་ལ་གནས་པ་རྣམས་དང་། མཚན་མ་མེད་པ་ལ་གནས་པ་རྣམས་དང་། སྨོན་པ་མེད་པ་ལ་གནས་པ་རྣམས་ཀྱི་གནས་སོ། །བསམ་གཏན་པ་མི་གནས་པ་རྣམས་ཀྱི་གནས་ཏེ། ཕས་ཀྱི་རྒོལ་བ་རྣམས་ཀྱིས་ཀྱང་སྟོང་ལ་གནས་པ་རྣམ་པ་དེ་ལྟ་བུ་དེ་དག་དང་། སྒྲ་ཆུང་བ་དང་། དབེན་པ་འདིས་གནས་སོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་ས་ག་གཞོན་ནུ་དཔལ་ལ་སྨྲས་པ། ས་ག་གཞོན་ནུ་དཔལ་ངའི་འཁོར་རྣམས་གཅོམ་བསྐྱུངས་ཤིག །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས། བཅོམ་ལྡན་འདས་ཐམས་ཅད་མཁྱེན་པ། ཐམས་ཅད་གཟིགས་པ། རྒྱལ་བུ་རྒྱལ་བྱེད་ཀྱི་ཚལ་ན་དགེ་སློང་གི་དགེ་འདུན་གྱིས་བསྐོར་ཏེ། དགེ་སློང་གི་དགེ་འདུན་གྱིས་མདུན་གྱིས་བལྟས་ཤིང་། ལྷའི་འཁོར་མང་པོས་བསྐོར་ནས་མདུན་གྱིས་བལྟས་པ་ལ་ཆོས་སྟོན་ཅིང་བཞུགས་པ་མཐོང་ངོ་། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་དགའ་བ་དང་། མཆོག་ཏུ་དགའ་བ་སྐྱེས་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །སྣང་ཞིང་གསལ་བར་མཛད་པ་འོད་མཛད་པ། །