གཙང་བ་སྙིང་པོ་ལ་གནས་པའོ། །ཀུན་དགའ་བོ་བསྟན་པ་འདི་བཤད་པ་ན་དགེ་སློང་ལྔ་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ཀུན་དགའ་བོ་རྒྱལ་བུ་རྒྱལ་བྱེད་ཀྱི་ཚལ་འདི་ན་དགེ་སློང་ཇི་སྙེད་ཅིག་གནས་པ་ཀུན་དགའ་བོ་དེ་དག་གི་ནང་ནས་ཆོས་འདི་དག་ལ་གང་ཐེ་ཙོམ་ཟ་བ་འམ། ཡིད་གཉིས་ཟ་བའམ། སོམ་ཉི་ཟ་བའི་དགེ་སློང་འགའ་ཡང་མ་བྱུང་ངོ་། །བྱང་ཆུབ་སེམས་དཔའ་ལྔ་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྲོག་ཆགས་སྟོང་ཕྲག་དུ་མས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་དག་ཐམས་ཅད་ཀྱང་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་དུ་བརྗོད་ཅེས་བྱ་བར་མིང་འཐུན་པ་ཉིད་དུ་འགྱུར་རོ་ཞེས་བཅོམ་ལྡན་འདས་ཀྱིས་ལུང་བསྟན་ཏོ། །དེ་དག་གི་ཚེའི་ཚད་ནི་བསྐལ་པ་གཅིག་ཐུབ་པར་འགྱུར་རོ། །དེ་དག་གི་དམ་པའི་ཆོས་ནི་བསྐལ་པ་ཕྱེད་ཀྱི་བར་དུ་གནས་པར་འགྱུར་རོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་འདི་སྙམ་དུ་སེམས་པར་གྱུར་ཏོ། །བདག་གིས་ནི་བཅོམ་ལྡན་འདས་ཡུན་རིང་ཞིག་ཏུ་མ་མཐོང་བས། བདག་གིས་བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར། བཅོམ་ལྡན་འདས་ག་ལ་བ་དེར་འགྲོ་བར་བྱའོ་སྙམ་མོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་དེའི་ཚེ་སྣ་ཆེན་པོ་ལ་གཏོགས་པ་དབྱིབས་རིང་ལ་སྨྲས་པ། བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར་འདོང་དགོས་ཀྱིས་ངའི་ཤིང་རྟ་བཞོན་པ་བཟང་པོ་དང་ལྡན་པ་ཐོག་མར་སྦྱོར་ཅིག །ཡང་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་དེའི་ཚེ་སྣ་ཆེན་པོ་ལ་གཏོགས་པ་དཔལ་མཆོག་ལ་སྨྲས་པ། བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར་འདོང་དགོས་ཀྱིས། དཔལ་མཆོག་ཁྱོད་སོང་ལ་ཡན་ལག་བཞི་པའི་དཔུང་གི་ཚོགས་དག་ཤོམས་ཤིག་ཅེས་བསྒོ་ཤིག །ཡང་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་བཙུན་མོ་དམ་པ་ལ་སྨྲས་པ། བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར་ཁྱོད་ཀྱང་འདོང་ངོ་ཞེས་སྨྲས་སོ།