དེ་སྐད་ཅེས་སྨྲས་པ་དང་། དེ་ལ་ངས་འདི་སྐད་ཅེས་སྨྲས་སོ། །ཆོས་ཐམས་ཅད་ཟད་པ་མེད་པ། ནམ་མཁའི་མཐའ་དང་མཉམ་པ་དེ་ནི་བྱང་ཆུབ་སྟེ། དེ་ལྟ་བུ་ལ་གནས་ནས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཆོས་ཐམས་ཅད་ནི་དེ་ལྟ་བུ་ལ་གནས་པ་སྟེ། དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །བསྟན་པ་འདི་བཤད་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་སོ། །འགུལ་ཏོ། །ལྡེག་གོ། །འཁྲུགས་སོ། །འུར་འུར་རོ། །ཆེམ་ཆེམ་མོ། །ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བ་ཆེན་པོས་ཁྱབ་པར་གྱུར་ཏོ། །འཇིག་རྟེན་གྱི་བར་མུན་པ་མུན་ནག་གང་ན་ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ། འདི་ལྟར་གཟ་བརྗིད་ཆེ་བའི་འོད་ཀྱིས་སྣང་བར་མ་ནུས་པ་དང་། གཟི་བརྗིད་ཀྱིས་གཟི་བྱིན་ཅན་དུ་མ་ནུས་པ་དང་། སྣང་བས་སྣང་བར་མ་ནུས་པ་དང་། གསལ་བས་གསལ་ཞིང་སྣང་བར་མ་ནུས་པ་གང་དག་ཡིན་པ་འཇིག་རྟེན་གྱི་བར་དེ་དག་ཐམས་ཅད་སྐད་ཅིག་དེ་ཉིད་དང་། ཐང་ཅིག་དེ་ཉིད་དང་། ཡུད་ཙམ་དེ་ཉིད་ལ་སྣང་བས་ཁྱབ་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་འཛུམ་པ་མཛད་དེ། འདི་ནི་སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པའི་ཆོས་ཉིད་དེ། དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས་ཁ་དོག་དུ་མ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ནས། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་འོད་ཀྱིས་ཁྱབ་པར་བྱས་ཏེ། ཚངས་པའི་འཇིག་རྟེན་གྱི་བར་དུ་སོང་ནས་སླར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དབུའི་གཙུག་ཏུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་གཡས་ཕྱོགས་ལོགས་སུ་གླང་པོ་ཆེའི་ལྟ་སྟངས་ཀྱིས་གཟིགས་ནས། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་འཁོར་འདི་ནི་དག་པ་སྟེ། གཙང་བ་སྙིང་པོ་ལ་གནས་པའོ།