།དེ་བཞིན་གཤེགས་དང་མུ་སྟེགས་ཁྱད་པར་མེད། །གང་དག་མཆོག་ཏུ་རློམ་སེམས་མེད་པ་དེ་དག་བདེ། །གང་ལ་གྲངས་དང་བགྲང་བའང་ཡོད་མ་ཡིན། །ནམ་མཁའི་དབྱིངས་ལྟར་མཉམ་ཉིད་མི་གཏོང་ལ། །བདག་དང་སེམས་ཅན་ཐ་དད་མི་སེམས་པ། །གང་དག་ཁྱད་པར་ཐོབ་མེད་དེ་དག་བདེ། །གང་དག་སྒྱུ་མར་གྱུར་ཅིང་རྨི་ལམ་སྤྱོད། །རབ་ཏུ་མ་རྨོངས་མིག་ཡོར་ལྟ་བུར་གྱུར། །འཇིག་རྟེན་དག་ན་ཆུ་ཟླ་བཞིན་དུ་སྤྱོད། །གང་དག་ཀུན་ཏུ་མི་བརྩོན་དེ་དག་བདེ། །སེམས་ཅན་གང་དག་མཁས་ལ་དོན་དམ་ལྟ། །བརྡ་དང་ཐ་སྙད་སྙིང་པོ་མེད་པར་ཤེས། །རབ་ཏུ་ཞི་བའི་ཆོས་རྣམས་རྗེས་སུ་རྟོགས། །གང་དག་མཚན་མའི་སྤྱོད་ཡུལ་མ་ཡིན་དེ་དག་བདེའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་ལེགས་སོ་ཞེས་བྱ་བ་བྱིན་ཏེ། ཤ་ར་དྭ་ཏིའི་བུ་འདི་ལྟར་ཤེས་རབ་ཟབ་པ་ལ་སྤྱོད་པའི་ཆོས་ལ་མཆོག་ཏུ་གྱུར་པ། དེ་ལེགས་སོ་ལེགས་སོ། །ཤཱ་རིའི་བུ་དེ་བས་ན་བྱ་རྒོད་ཀྱི་ཕུང་པོའི་རི་འདི་ལ་དགེ་སློང་དང་། བྱང་ཆུབ་སེམས་དཔའ་ཇི་སྙེད་ནང་དུ་ཡང་དག་འཇོག་ལ་ཞུགས་པ་དེ་དག་ཐམས་ཅད་ཁྱོད་ཀྱིས་སྡུས་ཤིག །ཤཱ་རིའི་བུས་གསོལ་པ། བཅོམ་ལྡན་འདས་བདག་ནི་མི་སྤྲོའོ། །དེ་ཅིའི་སླད་དུ་ཞེ་ན། གླང་པོ་ཆེན་པོ་དག་ནི་མགུ་བར་དཀའ་བའི་སླད་དུའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཉིད་ཀྱི་སྐུ་ལས་འོད་ཟེར་ཕྱུང་ནས་དེས་འཇིག་རྟེན་གྱི་ཁམས་མཐའ་ཡས་མུ་མེད་པ་ན་གནས་པའི་བྱང་ཆུབ་སེམས་དཔའ་རྣམས་ལ་བསྐུལ་བ་དང་། བྱ་རྒོད་ཀྱི་ཕུང་པོའི་རི་གང་ན་བ་དང་། བཅོམ་ལྡན་འདས་གང་ན་བ་དེར་ལྷགས་ནས་བར་སྣང་གི་ནམ་མཁའ་ལ་གནས་པར་གྱུར་ཏོ། །དགེ་སློང་དང་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ནང་དུ་ཡང་དག་འཇོག་ལ་ཞུགས་པ་དེ་དག་ཐམས་ཅད་ཀྱང་བཅོམ་ལྡན་འདས་གང་ན་བ་དེར་ལྷགས་པར་གྱུར་ཏོ། །རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་ཀྱང་སྲོག་ཆགས་བརྒྱ་སྟོང་དུ་མ་བཅོམ་ལྡན་འདས་ག་ལ་བ་དེར་ལྷགས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཐམས་ཅད་ཡོད་པའི་འཁོར་འདུས་པར་མཁྱེན་ནས་འཇམ་དཔལ་གཞོན་ནུར་གྱུར་པའི་བཞིན་ལ་གཟིགས་སོ། །གཟིགས་ནས་ཀྱང་འཛུམ་པ་མཛད་དོ།