Degé Kangyur volume 62, F.50.b

སྤྲིན་ལས་རོ་གཅིག་པའི་ཆར་འབབ་སྟེ། བབ་ནས་སྣོད་ཀྱི་བྱེ་བྲག་གིས་ཁ་དོག་སྣ་ཚོགས་དང་། དྲི་སྣ་ཚོགས་སུ་གྱུར་ཏེ། སྤྲིན་ནི་མི་རྟོག །​རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་བྱ་བ་དེ་ལྟ་བུ་དེ་དག་ཀྱང་འབྱུང་ངོ་། །​འཇམ་དཔལ་དེ་བཞིན་དུ་དེ་བཞིན་གཤེགས་པའི་ཆོས་ཀྱི་དབྱིངས་ཀྱི་རོ་གཅིག་སྟེ། དེ་སེམས་ཅན་ཡོངས་སུ་སྨིན་པར་བྱེད་པའི་དབང་གིས་ཆོས་ཀྱི་དབྱིངས་ཐ་དད་པར་སྣང་ཡང་དེ་བཞིན་གཤེགས་པ་ནི་མི་རྟོག །​རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་མཛད་པ་དེ་ལྟ་བུ་དེ་དག་ཀྱང་འབྱུང་ངོ་། །​འཇམ་དཔལ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་དབང་གི་རྒྱལ་པོ་གང་དུ་འབྱུང་བ་དེར་ལྕགས་དང་ལྕགས་ཀྱི་ཡོ་བྱད་རྣམས་མི་འབྱུང་ངོ་། །​དེ་ཅིའི་ཕྱིར་ཞེ་ན། མ་འདྲེས་པའི་ཆོས་དང་ལྡན་པའི་ཕྱིར་རོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་གང་དུ་བྱུང་བ་དེར་མེའི་འོད་རྣམས་དང་། གློག་གི་འོད་རྣམས་མི་འབྱུང་ངོ་། །​དེར་ཉི་མའི་འོད་རྣམས་མི་འབྱུང་ངོ་། །​དེར་ནོར་བུའི་འོད་རྣམས་མི་འབྱུང་ངོ་། །​དེར་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བའི་འོད་རྣམས་མི་འབྱུང་ངོ་། །​དེར་རྒྱལ་པོ་རྣམས་ཀྱི་བཀའ་མི་འབྱུང་ངོ་། །​དེར་རིགས་བཞི་རྣམས་མི་འབྱུང་ངོ་། །​དེར་མི་ཁོམ་པར་སྐྱེ་བ་རྣམས་མི་འབྱུང་ངོ་། །​དེར་སེམས་ཅན་དམྱལ་བ་དང་། དུད་འགྲོ་དང་། ཡི་དགས་དང་། གཤིན་རྗེའི་འཇིག་རྟེན་དུ་སྐྱེ་བ་རྣམས་མི་འབྱུང་ངོ་། །​དེར་མི་དགེ་བ་བཅུའི་ལས་ཀྱི་ལམ་རྣམས་མི་འབྱུང་ངོ་། །​དེར་ཉོན་མོངས་པ་ཐམས་ཅད་མི་འབྱུང་ངོ་། །​དེར་འཁྲུག་པ་ཐམས་ཅད་མི་འབྱུང་ངོ་། །​དེར་མུ་སྟེགས་ཅན་སྤྱོད་པ་པ་དང་། ཀུན་ཏུ་རྒྱུ་དང་། གཅེར་བུ་དང་། འཚོ་བ་པ་རྣམས་མི་འབྱུང་སྟེ། དེ་བཞིན་གཤེགས་པ་ནི་མི་རྟོག་རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་ཞིང་ཡུལ་ཆགས་པ་མེད་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་མཛད་པ་དེ་ལྟ་བུ་དེ་དག་ཀྱང་འབྱུང་ངོ་།



The English translation of this folio by 84000 - Translating the words of the Buddha can be found at:
https://read.84000.co/translation/toh201.html?part=UT22084-062-001-808#UT22084-062-001-808