Degé Kangyur volume 62, F.35.b

དེ་ལ་དེ་བཞིན་གཤེགས་པ་རྟག་པ་ནི་དབྱེར་མེད་པའི་ཕྱིར་རོ། །​བདག་ནི་དེ་བཞིན་གཤེགས་པ་ཐེར་ཟུག་གོ་ཞེས་བྱ་བར་མོས་པ་ལ་གནས་ཀྱིས། གཞན་དག་ཀྱང་དེ་བཞིན་གཤེགས་པ་ཐེར་ཟུག་གོ་ཞེས་བྱ་བར་མོས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་བཞིན་གཤེགས་པ་ཐེར་ཟུག་ནི་སངས་རྒྱས་ཀྱི་མཛད་པ་ཐམས་ཅད་རྒྱུན་མི་གཅོད་པའི་ཕྱིར་རོ། །​བདག་ནི་དེ་བཞིན་གཤེགས་པ་ཤིས་པ་ཞེས་བྱ་བར་མོས་པ་ལ་གནས་ཀྱིས། གཞན་དག་ཀྱང་དེ་བཞིན་གཤེགས་པ་ཤིས་པ་ཞེས་བྱ་བར་མོས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་བཞིན་གཤེགས་པ་ཤིས་པ་ཞེས་བྱ་བ་ནི་མཐོང་བ་དང་། ཐོས་པ་དང་། དྲན་པ་རྣམས་དོན་ཡོད་པའི་ཕྱིར་རོ། །​བདག་ནི་དེ་བཞིན་གཤེགས་པ་གཡུང་དྲུང་ངོ་ཞེས་བྱ་བར་མོས་པ་ལ་གནས་ཀྱིས། གཞན་དག་ཀྱང་དེ་བཞིན་གཤེགས་པ་གཡུང་དྲུང་ངོ་ཞེས་བྱ་བར་མོས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་བཞིན་གཤེགས་པ་གཡུང་དྲུང་ངོ་ཞེས་བྱ་བ་ནི་སྐུའི་མཐའ་མེད་པའི་ཕྱིར་རོ། །​སྐུའི་མཐའ་མེད་པའི་རྣམ་པར་གཞག་པ་ལས་འདས་པའི་ཕྱིར་ཏེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །​འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཕན་པའི་དངོས་པོ་ལ་གནས་ཀྱིས། གཞན་དག་ཀྱང་ཕན་པའི་དངོས་པོ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཕན་པའི་དངོས་པོ་ནི་སེམས་ཅན་ཐམས་ཅད་ཀྱི་ལུས་དང་སེམས་ཀྱི་མི་བདེ་བ་ཡོངས་སུ་བསྐྱབ་པའི་ཕྱིར་དེ་སྡུག་བསྔལ་གྱི་ཡོ་བྱད་གང་ཅི་ཡང་མི་ལེན་པ་མེད་དེ། བདེ་བའི་ཡོ་བྱད་གང་ཅི་ཡང་ཡོངས་སུ་མི་གཏོང་བ་མེད་པ་གང་ཡིན་པའོ། །​བདག་ནི་ཆོས་ཐམས་ཅད་མཚན་མ་མེད་པ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་མཚན་མ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ།



The English translation of this folio by 84000 - Translating the words of the Buddha can be found at:
https://read.84000.co/translation/toh201.html?part=UT22084-062-001-778#UT22084-062-001-778