བྱང་ཆུབ་སེམས་དཔའ་གང་དག་ཆོས་བསྟན་པ་གང་འདོད་པ་དེ་དག་དེ་བཞིན་གཤེགས་པའི་གན་དུ་འགྲོ་ཞིང་ཆོས་བསྟན་པ་དེ་དག་དེ་བཞིན་གཤེགས་པ་ལས་ཉན་ཀྱང་དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་མཛད་པ་དེ་ལྟ་བུ་དེ་དག་ཀྱང་འབྱུང་ངོ་། །འཇམ་དཔལ་དེ་བཞིན་གཤེགས་པའི་ལྷུན་གྱིས་གྲུབ་པའི་ཡེ་ཤེས་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་བརླབས་ཀྱང་བསྟན་པར་མི་ནུས་སོ། །འཇམ་དཔལ་དེ་ལ་དེ་བཞིན་གཤེགས་པའི་བསམ་གྱིས་མི་ཁྱབ་པ་ནི་འཇམ་དཔལ་དེ་བཞིན་གཤེགས་པ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན་འཇིག་རྟེན་གྱི་ཁམས་རེ་རེ་དང་། རྡུལ་ཕྲ་རབ་རེ་རེ་དང་། འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་དག་ལ་འཇུག་སྟེ། འཇིག་རྟེན་གྱི་ཁམས་རེ་རེ་དང་། གླིང་རེ་རེར་ཡང་འཇིག་རྟེན་གྱི་ཁམས་རྒྱ་མཚོ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི །དེ་བཞིན་གཤེགས་པའི་བསོད་ནམས་ཀྱི་ཚོགས་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་ནི་ཆེས་མང་ངོ་། །དེ་བཞིན་དུ་ཡེ་ཤེས་ཀྱི་ཚོགས་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། མ་འདྲེས་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ །དེ་བཞིན་དུ་ཕ་རོལ་ཏུ་ཕྱིན་པ་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ།