Degé Kangyur volume 61, F.261.b

།མར་མེ་གཅིག་ཕུལ་དཔལ་དེ་ཟད་མི་འགྱུར། །​ཀླུ་དང་ལྷ་མིན་མི་དང་ལྟོ་འཕྱེ་ཆེ། །​ལྷ་ཡི་ལྷ་རྫས་ནོར་བུ་རིན་ཆེན་མང་། །​ཟད་པར་བྱ་ནུས་སངས་རྒྱས་མཆོད་རྟེན་ལ། །​མར་མེ་གཅིག་ཕུལ་དཔལ་དེ་ཟད་མི་འགྱུར། །​ལྷ་ཡི་འཇིག་རྟེན་ཡོད་པའི་ལྷ་ཡི་སྤོས། །​དེ་དག་མི་མཇེད་འདི་ཀུན་གང་གྱུར་པ། །​ཟད་པར་བྱ་ནུས་སངས་རྒྱས་མཆོད་རྟེན་ལ། །​མར་མེ་གཅིག་ཕུལ་དཔལ་དེ་ཟད་མི་འགྱུར། །​ཕྱོགས་དང་ཕྱོགས་མཚམས་ཚད་ནི་ཤེས་པར་ནུས། །​ནམ་མཁའི་ཁམས་འདིའི་ཚད་ཀྱང་ཤེས་པར་ནུས། །​སངས་རྒྱས་མཆོད་རྟེན་མར་མེ་གཅིག་ཕུལ་བའི། །​དེ་འདྲའི་དཔལ་དེ་ཟད་པར་བྱ་མི་ནུས། །​སངས་རྒྱས་དམ་པ་མི་མཆོག་བཞུད་པའི་ཚེ། །​འདྲེན་པ་མཚུངས་པ་མེད་ལ་དད་བྱས་ཏེ། །​སྟོན་པའི་སྐུ་ལ་ཉི་ཟེར་མི་འབབ་པར། །​མེ་ཏོག་མ་ལི་ཀ་གདུགས་བཅོམ་ལྡན་ཕུལ། །​དེ་ནི་ལས་མཛེས་དམ་པ་གུས་བྱས་པས། །​ལྷ་དབང་བརྒྱ་བྱིན་དུ་ནི་ལན་འབུམ་གྱུར། །​འཇིག་རྟེན་ཀུན་ཏུ་ཚངས་པའི་བདག་པོར་གྱུར། །​རྒྱལ་བའི་མཆོད་རྟེན་ལ་ནི་འབུམ་ཕུལ་ནས། །​འཁོར་ལོས་སྒྱུར་བའི་རྒྱལ་པོ་སྟོབས་ལྡན་གྱུར། །​སྟོང་ཕྲག་བཅུ་ལ་དབང་བར་ང་གྱུར་ཏེ། །​ནོར་ཆེན་རབ་ཏུ་མཛོད་མང་ཚོང་དཔོན་གྱུར། །​ཁྱིམ་བདག་བློ་ལྡན་བསོད་ནམས་ལྡན་པར་གྱུར། །​བདེ་གཤེགས་མི་མཆོག་བྱེ་བ་ཉི་ཤུ་དག །​ངས་ནི་མཉེས་བྱས་གཟིམས་ཆ་ན་བཟའ་ཡིས། །​མི་མཆོག་དག་ལ་བླ་མར་བསྟི་སྟང་བྱས། །​དེ་དག་གཙུག་ལག་ཁང་ལ་སྤོས་ཀྱིས་བསྐུས། །ང་ཡི་ཁ་དོག་ངན་པ་ཀུན་མེད་འགྱུར། །​ངས་ནི་ཚ་དང་གྲང་དང་ངལ་བ་སྤོང་། །​སངས་རྒྱས་སྤྱན་སྔར་དམན་མེད་སེམས་གྱུར་ཅིང་། །​དེ་དག་མཆོད་པ་དམ་པ་མཆོག་གིས་མཆོད། །​རྒྱན་གྱིས་བརྒྱན་པའི་གདུགས་མཛེས་བལྟ་སྡུག་པ། །​སུ་ཞིག་བཅོམ་ལྡན་མཆོད་རྟེན་འབུལ་བྱེད་པ། །​དེ་འདིར་ལུས་ནི་མཚུངས་པ་མེད་འགྱུར་ཏེ། །​སུམ་ཅུ་རྩ་གཉིས་མཚན་གྱིས་གོ་ཆར་འགྱུར། །​གང་གིས་རྒྱལ་བའི་སྐུ་ནི་རབ་འབར་ཞིང་། །​ཁྱད་པར་འཕགས་པའི་གཟུགས་དང་སེམས་འདྲ་དང་། །​འཛམ་ཀླུང་གསེར་ལྟར་རབ་མཛེས་བལྟ་ན་སྡུག



The English translation of this folio by 84000 - Translating the words of the Buddha can be found at:
https://read.84000.co/translation/toh195.html?part=UT22084-061-015-400#UT22084-061-015-400