Degé Kangyur volume 61, F.141.a

།ཆོས་ཐམས་ཅད་ལ་སོམ་ཉི་གཅོད་པ་ཉིད་ཀྱང་འཐོབ་བོ། །​སངས་རྒྱས་ཀྱི་རྣམ་པར་རོལ་པ་སྟོང་ཕྲག་གྲངས་མེད་པ་དག་ཀྱང་འཐོབ་བོ། །​སེམས་ཅན་ཐམས་ཅད་ཀྱི་སྤྱོད་པའི་བྱེ་བྲག་ལ་མཁས་པ་ཡང་འཐོབ་བོ། །​འཇམ་དཔལ་དཔེར་ན་རིའི་རྒྱལ་པོ་རི་རབ་ནི་རི་ཐམས་ཅད་ཟིལ་གྱིས་གནོན་ནས་ལམ་མེ། ལྷན་ནེ་ལྷང་ངེའོ། །​འཇམ་དཔལ་དེ་བཞིན་དུ་ཆོས་ཀྱི་རྣམ་གྲངས་འདི་ལ་མོས་པའི་བྱང་ཆུབ་སེམས་དཔའ་ཡང་སེམས་ཅན་ཐམས་ཅད་ཀྱི་དགེ་བའི་རྩ་བ་ཐམས་ཅད་ཟིལ་གྱིས་གནོན་ནས་ལམ་མེ་ལྷན་ནེ་ལྷང་ངེའོ། །​དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ལ་འདི་སྐད་ཅེས་སྨྲས་སོ། །​ཀྱེ་རྒྱལ་བའི་སྲས་བྱང་ཆུབ་སེམས་དཔས་གང་དག་ལ་མོས་པས་ཡོན་ཏན་གྱི་ཁྱད་པར་འདི་དག་དང་གཞན་དག་ཀྱང་འཐོབ་པའི་ཆོས་ཀྱི་བྱེ་བྲག་གཞན་དག་ཀྱང་ཡོད་དམ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །​འཇམ་དཔལ་བྱང་ཆུབ་སེམས་དཔའ་གང་དག་ལ་མོས་ན། ཡོན་ཏན་གྱི་ཁྱད་པར་འདི་དག་དང་། གཞན་དཔག་ཏུ་མེད་པ་དག་ཀྱང་འཐོབ་པའི་ཆོས་ལྔ་པོ་འདི་དག་སྟེ། ལྔ་གང་ཞེ་ན། ཆོས་ཐམས་ཅད་གཉེན་པོ་མེད་པ་དང་། མ་སྐྱེས་པ་དང་། མ་འགགས་པ་དང་། བརྗོད་དུ་མེད་པར་མོས་པ་དང་། རྟག་ཏུ་རྒྱུན་མི་འཆད་པར་སྐད་ཅིག་སྐད་ཅིག་ལ་དེ་བཞིན་གཤེགས་པའི་སྤྱོད་པ་དང་སྤྱོད་ལམ་ལ་འཇུག་པའི་གནས་འཛམ་བུའི་གླིང་གི་རྡུལ་ཕྲ་རབ་ཀྱི་རྡུལ་ལས་ཀྱང་ལྷག་པ་དག་ལ་ལྷུན་གྱིས་གྲུབ་ཅིང་རྣམ་པར་མི་རྟོག་པར་འཇུག་པར་མོས་པ་དང་། སེང་གེ་བྲན་བཟངས་ཀྱི་བུའི་རྟོགས་པ་བརྗོད་པས་སེམས་ཅན་ཡོངས་སུ་སྨིན་པར་བྱེད་པ་དེ་བཅོམ་ལྡན་འདས་ཤཱཀྱ་ཐུབ་པས། བསྐལ་པ་གང་གཱའི་ཀླུང་གི་བྱེ་མ་སྙེད་ནས་མངོན་པར་རྫོགས་པར་སངས་རྒྱས་ཏེ། མཛད་པར་མོས་པ་དང་། མར་མེ་མཛད་ཀྱིས་ལུང་བསྟན་པ་ནས་བཟུང་སྟེ། མངོན་པར་རྫོགས་པར་བྱང་ཆུབ་པའི་བར་དེར་བཅོམ་ལྡན་འདས་ཤཱཀྱ་ཐུབ་པའི་བྱང་ཆུབ་སེམས་དཔའི་སྤྱོད་པ་གང་ཡིན་པ་དེ་ཐམས་ཅད་སངས་རྒྱས་ཀྱི་ཡུལ་གྱི་མཐས་ཀླས་པའི་བསྐལ་པ་ནས་མངོན་པར་རྫོགས་པར་སངས་རྒྱས་ནས་བསྟན་པ་ཡིན་པར་མོས་པ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh185.html?part=UT22084-061-005-785#UT22084-061-005-785