།འཇམ་དཔལ་དཔེར་ན་ཉི་མའི་དཀྱིལ་འཁོར་རྒྱ་མཚོ་ཆེན་པོ་ལས་མངོན་པར་འཕགས་ཏེ། ནམ་མཁའི་སྤྱོད་ཡུལ་ལ་གནས་ནས་འོད་ཟེར་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་བཏང་བས་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ཐམས་ཅད་དུ་མཐོང་བ་སྦྱིན་པར་བྱེད་ཅིང་མུན་པ་སེལ་བར་བྱེད། འདམ་རྫབ་དང་། རྙོག་པ་ཐམས་ཅད་སྐེམས་པར་བྱེད། པད་མ་རྣམས་ཀྱང་ཁ་འབྱེ་བར་བྱེད། རྩྭ་དང་། ཤིང་གེལ་པ་དང་། སྨན་དང་། ནགས་ཚལ་ཐམས་ཅད་ཀྱང་སྐྱེ་བར་བྱེད། སྨན་ཐམས་ཅད་ཀྱང་ཡོངས་སུ་སྨིན་པར་བྱེད། ལས་ཀྱི་གནས་ཐམས་ཅད་ནི་གནས་པར་བྱེད་ལ། ཆུ་ཀླུང་དང་། མཚེའུ་དང་། མཚོ་བྲན་ཐམས་ཅད་ལ་ཡང་དུས་གཅིག་ཏུ་སྣང་བ་ཐོབ་པར་འགྱུར་ཡང་གནས་ལས་ཀྱང་མི་གཡོ་ཞིང་འཇམ་དཔལ་ཉི་མའི་དཀྱིལ་འཁོར་ནི་མི་རྟོག །རྣམ་པར་མི་རྟོག་སྟེ། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་རྟག་ཏུ་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སྲིད་པའི་རྒྱ་མཚོ་ལས་མངོན་པར་འཕགས་ཏེ། ཆོས་ཀྱི་དབྱིངས་ཀྱི་ནམ་མཁའི་སྤྱོད་ཡུལ་ལ་གནས་ནས་ཡེ་ཤེས་ཀྱི་འོད་ཟེར་བྱེ་བ་ཁྲག་ཁྲིག་གྲངས་མེད་པ་བཏང་བས་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་སྣང་བ་སྦྱིན་པར་མཛད་ཅིང་སེམས་ཅན་ཐམས་ཅད་ཀྱི་མ་རིག་པའི་མུན་པ་མུན་ནག་དང་། རབ་རིབ་དང་། ལིང་ཏོག་རྣམས་རྣམ་པར་སེལ་བར་མཛད། ཉོན་མོངས་པའི་འདམ་རྫབ་དང་། རྙོག་པ་ཐམས་ཅད་སྐེམས་པར་མཛད། ཡུན་རིང་པོ་ནས་གཉིད་ཀྱིས་ལོག་པའི་སེམས་ཅན་གྱི་ཁམས་ནི་སད་པར་མཛད། སེམས་ཅན་ཐམས་ཅད་ཀྱི་དགེ་བའི་རྩ་བ་ཐམས་ཅད་ནི་སྐྱེ་བར་མཛད། སེམས་ཅན་ཐམས་ཅད་ཀྱི་དགེ་བའི་རྩ་བའི་ཚོགས་ཐམས་ཅད་ནི་ཡོངས་སུ་སྨིན་པར་མཛད། དགེ་བའི་རྩ་བའི་སྒོ་ཐམས་ཅད་ནི་རབ་ཏུ་འཇོག་པར་མཛད་དེ། དུས་གཅིག་ཏུ་དེའི་མཛད་པ་ཐམས་ཅད་འབྱུང་ཡང་གནས་ནས་ཀྱང་མི་གཡོ་ཞིང་འཇམ་དཔལ་དེ་བཞིན་གཤེགས་པ་ནི་མི་རྟོག་རྣམ་པར་མི་རྟོག་སྟེ།