Degé Kangyur volume 61, F.132.a

།མྱ་ངན་ལས་འདས་པ་ལ་འཁོར་བའི་རྒྱན་དུ་སྟོན་ཀྱང་མྱ་ངན་ལས་འདས་པ་ལ་མངོན་པར་ཞེན་པ་ཡང་མི་སྐྱེད་དོ། །​འཁོར་བ་མྱ་ངན་ལས་འདས་པར་ཀུན་ཏུ་སྟོན་ཀྱང་གཏན་དུ་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་ཡང་མི་བྱེད་དོ། །​མཉམ་པར་ཡང་བཞག་ལ་བྱ་བ་ཐམས་ཅད་ཀྱང་སྟོན་ཏེ། འདི་ལྟ་སྟེ། འོང་བ་དང་། འགྲོ་བ་དང་། འགྲེང་བ་དང་། ཉལ་བར་བྱེད་དོ། །​སྤྱོད་ལམ་ཐམས་ཅད་ཀྱང་ཀུན་ཏུ་སྟོན་ལ་ཏིང་ངེ་འཛིན་རྣམ་པར་འཁྲུགས་པར་ཡང་མི་བྱེད་དོ། །​དེ་བཞིན་གཤེགས་པ་གཅིག་གི་ཞབས་ཀྱི་དྲུང་ན་ཆོས་ཉན་པར་ཡང་སྣང་ལ། ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དག་ན་གཟུགས་དང་། ལུས་དང་། ཁ་དོག་ཡོངས་སུ་འགྲུབ་པ་གཞན་དང་གཞན་དག་གིས་ཀྱང་ཆོས་ཉན་ལ་ཏིང་ངེ་འཛིན་ཐ་དད་པར་ཡང་མི་བྱེད་ཅིང་ཆོས་ཀྱང་ལེན་ལ་འཛིན་ཏེ་འདོན་ཅིང་ཀུན་ཆུབ་པར་ཡང་བྱེད་ལ་སངས་རྒྱས་དེ་དག་ལས་ཆོས་ཉན་པའི་རྒྱུན་ཆད་པར་ཡང་མི་བྱེད་དོ། །​ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་གཟུགས་དང་། ལུས་དང་། ཁ་དོག་ཡོངས་སུ་འགྲུབ་པ་ཐ་དད་པས་སེམས་ཅན་རྣམས་ཡོངས་སུ་སྨིན་པར་ཡང་བྱེད་ལ་ལུས་ཐ་དད་པར་མི་བྱེད་ཅིང་གནས་ནས་ཀྱང་མི་གཡོའོ། །​ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་བྱ་བ་ཐམས་ཅད་ཀུན་ཏུ་སྟོན་ཀྱང་ཏིང་ངེ་འཛིན་ཐ་དད་པར་ཡང་མི་བྱེད་དོ། །​སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་ཏིང་ངེ་འཛིན་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་ཀྱང་མངོན་པར་སྒྲུབ་ལ་ཏིང་ངེ་འཛིན་ཐ་དད་པར་ཡང་མི་བྱེད་དེ། འཇམ་དཔལ་རྣམ་གྲངས་དེས་ན་རྣམ་པར་ཐར་པ་དང་ཏིང་ངེ་འཛིན་བསམ་གྱིས་མི་ཁྱབ་པ་ལ་གནས་པའི་བྱང་ཆུབ་སེམས་དཔའ་སངས་རྒྱས་ཀྱི་ཞིང་གི་མཐས་ཀླས་པའི་བསྐལ་པར་ཏིང་ངེ་འཛིན་གྱི་སྒོ་བསྒྲུབ་པ་མངོན་པར་སྒྲུབ་ཀྱང་བྱང་ཆུབ་སེམས་དཔའི་ཏིང་ངེ་འཛིན་གྱི་སྒོ་བསྒྲུབ་པ་རྣམས་ཀྱི་མཐར་ཐུག་པར་མི་འགྱུར་རོ། །​འཇམ་དཔལ་བྱང་ཆུབ་སེམས་དཔའི་ཏིང་ངེ་འཛིན་ཕུན་སུམ་ཚོགས་པ་དེ་དག་ཐམས་ཅད་ནི་དགེ་བའི་བཤེས་གཉེན་ལས་ངེས་པར་འབྱུང་ངོ་།



The English translation of this folio by 84000 - Translating the words of the Buddha can be found at:
https://read.84000.co/translation/toh185.html?part=UT22084-061-005-767#UT22084-061-005-767