འདུ་ཤེས་ཅན་མ་ཡིན་པ་དང་། འདུ་ཤེས་མེད་འདུ་ཤེས་མེད་མིན་ནས་གཟུགས་མེད་པའི་བར་གྱི་སེམས་ཅན་རྣམས་ཡོངས་སུ་སྨིན་པར་བྱེད་པར་ཡང་སྣང་ངོ་། །དེ་བཞིན་གཤེགས་པའི་སྤྱོད་པ་དང་། མངོན་པར་རྫོགས་པར་བྱང་ཆུབ་པ་དང་། སངས་རྒྱས་ཀྱི་བཀོད་པ་ཐམས་ཅད་ཀྱི་སྤྱོད་ཡུལ་ཐོབ་པ་ཡང་ཡིན་ལ་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཆོ་ག་དང་སྤྱོད་ལམ་ཡང་ཀུན་ཏུ་སྟོན་ཏོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་སེམས་ཅན་ཐམས་ཅད་ཀྱི་སྒྲ་སེམས་ཅན་གཅིག་གི་སྒྲར་འཇུག་པར་བྱེད་ལ། སེམས་ཅན་གཅིག་གི་སྒྲ་སེམས་ཅན་ཐམས་ཅད་ཀྱི་སྒྲར་འཇུག་པར་བྱེད་ཅིང་། སྒྲ་རྣམས་འདྲེས་པར་ཡང་མི་འགྱུར་ལ་སེམས་ཅན་གང་གི་སྒྲ་ལ་ཡང་སྒྲིབ་པར་མི་འགྱུར་རོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ལྷུན་གྱིས་གྲུབ་ཅིང་རྣམ་པར་མི་རྟོག་པར་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་རང་གི་ལུས་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་སུ་བྱིན་གྱིས་རློབ་བོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་སེམས་ཅན་གྱི་ལུས་ལ་ཞིང་གི་ལུས་ཀུན་ཏུ་སྟོན་ཀྱང་སེམས་ཅན་གྱི་ལུས་དང་འདྲེས་པར་ཡང་མི་བྱེད། ཞིང་གི་ལུས་ལ་སེམས་ཅན་གྱི་ལུས་ཀུན་ཏུ་སྟོན་ཀྱང་ཞིང་གི་ལུས་དང་འདྲེས་པར་ཡང་མི་བྱེད་དོ། །སངས་རྒྱས་ཀྱི་སྐུ་ལ་ཉན་ཐོས་དང་། རང་སངས་རྒྱས་ཀྱི་ལུས་སུ་ཀུན་ཏུ་སྟོན་ཀྱང་སངས་རྒྱས་ཀྱི་སྐུ་དམན་པར་ཡང་མི་བྱེད་དོ། །ཉན་ཐོས་དང་། རང་སངས་རྒྱས་ཀྱི་ལུས་ལ་སངས་རྒྱས་ཀྱི་སྐུ་ཀུན་ཏུ་སྟོན་ཀྱང་ཉན་ཐོས་དང་། རང་སངས་རྒྱས་ཀྱི་ལུས་རྒྱ་ཆེན་པོར་ཡང་མི་བྱེད་དོ། །སྤྱོད་པའི་ལུས་ལ་མངོན་པར་རྫོགས་པར་བྱང་ཆུབ་པའི་སྐུ་ཀུན་ཏུ་སྟོན་ཀྱང་སྤྱོད་པའི་རྒྱུན་ཆད་པར་ཡང་མི་བྱེད་དོ། །མངོན་པར་རྫོགས་པར་བྱང་ཆུབ་པའི་སྐུ་ལ་སྤྱོད་པའི་ལུས་ཀུན་ཏུ་སྟོན་ཀྱང་མངོན་པར་རྫོགས་པར་བྱང་ཆུབ་པའི་སྐུ་ཉམས་པར་ཡང་མི་བྱེད་དོ། །མྱ་ངན་ལས་འདས་པ་ལ་འཁོར་བའི་རྒྱན་དུ་སྟོན་ཀྱང་མྱ་ངན་ལས་འདས་པ་ལ་མངོན་པར་ཞེན་པ་ཡང་མི་སྐྱེད་དོ།