Degé Kangyur volume 61, F.104.a

།བཅོམ་ལྡན་འདས་དགེ་སློང་དེ་དག་གིས་ཆོས་ཀྱི་རྣམ་གྲངས་འདི་ཐོས་པས་གནོད་པ་ཆེན་པོ་ཇི་ཙམ་དུ་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་དེ་སྐད་མ་ཟེར་ཅིག །​གལ་ཏེ་དགེ་སློང་འདི་དག་གིས་ཆོས་ཀྱི་རྣམ་གྲངས་འདི་མ་ཐོས་སུ་ཟིན་ན། བསྐལ་པ་ས་ཡའི་བར་དུ་ནམས་ཀྱང་བཟང་འགྲོར་སྐྱེ་བར་ཡང་མི་འགྱུར་ན་སངས་རྒྱས་དང་ཕྲད་ཅིང་མཉེས་པར་བྱེད་པ་ལྟ་ཅི་སྨོས། ད་ནི་དེ་དག་གིས་ཆོས་ཀྱི་རྣམ་གྲངས་འདི་སོམ་ཉི་དང་བཅས་པས་ཐོས་ནས་ད་གཟོད་ཁོ་ནར་སེམས་ཅན་དམྱལ་བ་ཆེན་པོ་ངུ་འབོད་ནས་ཤི་འཕོས་ཏེ་དགའ་ལྡན་གྱི་ལྷའི་རིས་སུ་སྐྱེའོ། །​དེ་དག་བསྐལ་པ་དྲུག་ཅུ་རྩ་བརྒྱད་ཀྱི་བར་དུ་དེ་བཞིན་གཤེགས་པ་ཁྲག་ཁྲིག་ཕྲག་བཅུ་མཉེས་པར་བྱེད་པར་འགྱུར་ཏེ། ཐམས་ཅད་དུ་རྫུས་ཏེ་སྐྱེ་ཞིང་འཁོར་ལོས་སྒྱུར་བའི་རྒྱལ་པོ་ཤ་སྟག་ཏུ་འགྱུར་ལ། བསྐལ་པ་གཅིག་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མ་མེད་པའི་འོད་ཅེས་བྱ་བ་དག་ཏུ་འགྱུར་རོ། །​དེ་ནས་ལྷའི་བུ་དེ་དག་གིས་བདག་ཅག་ལུང་བསྟན་པ་ལྷའི་རྣ་བའི་ཁམས་ཀྱིས་ཐོས་ནས། དེ་དག་ལྷའི་བུ་བརྒྱད་ཁྲི་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་ལྷའི་མེ་ཏོག་གིས་ཡངས་པའི་གྲོང་ཁྱེར་ཐམས་ཅད་དུ་གཏོར་ཏོ། །​ཆོས་ཀྱི་རྣམ་གྲངས་འདི་ལ་ཡང་རྗེས་སུ་ཡི་རང་སྟེ། བཅོམ་ལྡན་འདས་བདག་ཅག་རྗེས་སུ་ཡི་རང་ལགས་སོ། །​དེ་བཞིན་གཤེགས་པ་རྣམས་ཀྱི་བྱང་ཆུབ་ཀྱི་ཚུལ་འཕེལ་བར་མཛད་དུ་གསོལ་ཞེས་ཀྱང་གསོལ་ཏོ། །​དེ་དག་རྗེས་སུ་ཡི་རང་བའི་མོད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །​ཡངས་པའི་གྲོང་ཁྱེར་ཆེན་པོའི་སྲོག་ཆགས་བརྒྱད་ཁྲི་བཞི་སྟོང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །​སྲོག་ཆགས་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །​དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་བྱང་ཆུབ་སེམས་དཔའ་གང་གིས་བསྐལ་པ་འབུམ་གྱི་བར་དུ་ཐབས་ལ་མཁས་པ་མེད་པར་ཕ་རོལ་ཏུ་ཕྱིན་པ་དྲུག་ལ་སྤྱད་པ་བས།



The English translation of this folio by 84000 - Translating the words of the Buddha can be found at:
https://read.84000.co/translation/toh184.html?part=UT22084-061-004-287#UT22084-061-004-287