Degé Kangyur volume 61, F.92.a

ལག་པ་རིང་ཞིང་གསེར་མདོག་ལྡན། །​འཇིག་རྟེན་མཆོད་གནས་གྱུར་པར་ཤོག །​སྙིང་རྗེས་ནོན་པར་གྱུར་ནས་ནི། །​ཆོས་ཀྱི་ལག་པ་བསྟོད་བྱས་ལ། །​ངན་སོང་ཀུན་ལས་ལུས་ཅན་རྣམས། །​བདག་གིས་རྟག་ཏུ་འབྱིན་པར་ཤོག །​དེ་ལ་རྣ་བ་དང་སྣ་ཡོངས་སུ་གཏོང་བའི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། རྣ་བ་དང་སྣ་ཡོངས་སུ་གཏོང་བའི་སྦྱིན་པ་ཞེས་བྱ་བ་དེ་ནི་བྱང་ཆུབ་སེམས་དཔའ་རྣམས་ཀྱི་དབང་པོ་ཚང་བ་ཡོངས་སུ་རྫོགས་པར་འགྱུར་བའི་ཚིག་བླ་དགས་ཡིན་གྱིས། བདག་གིས་རྣ་བ་དང་། སྣ་ཡོངས་སུ་གཏོང་བའི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །​དེ་རྣ་བ་དང་སྣ་ཡོངས་སུ་གཏོང་བའི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་རྣམ་པར་གཞག་པའི་སྨོན་ལམ་བཞིན་དུ། རྣ་བ་དང་སྣ་ཡོངས་སུ་གཏོང་བའི་སྦྱིན་པ་འདིས་ན། བདག་སེམས་ཅན་ཐམས་ཅད་དབང་པོ་ཐམས་ཅད་དང་ལྡན་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །​དེ་ལ་འདི་སྐད་ཅེས་བྱ་སྟེ། རྣ་བ་དང་ནི་སྣ་བཏང་བས། །​སྲོག་ཆགས་རྣམས་ནི་ཐམས་ཅད་ཀྱང་། །​དབང་པོ་ཀུན་དང་ལྡན་གྱུར་ཏེ། །​ཡན་ལག་ཐམས་ཅད་རྫོགས་པར་ཤོག །​རྣ་བ་དང་ནི་སྣ་བཏང་བས། གང་དང་གང་དུ་སྐྱེས་པ་དེར། །​བལྟ་ན་སྡུག་ཅིང་གཟུགས་བཟང་ལ། །​མི་ནི་དེ་བཞིན་མཛེས་པར་འགྱུར། །​དེ་ལ་མིག་གི་སྦྱིན་པ་ལ་ཇི་ལྟར་མངོན་པར་བརྩོན་པར་བྱེད་ཅེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། མིག་སྦྱིན་པ་ཞེས་བྱ་བ་དེ་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་མིག་སྒྲིབ་པ་མེད་པ་ཡོངས་སུ་དག་པའི་ཚིག་བླ་དགས་ཡིན་གྱིས། བདག་གིས་མིག་གི་སྦྱིན་པ་སྦྱིན་པར་བྱ་གོར་མ་ཆག་སྙམ་མོ། །​དེ་མིག་གི་སྦྱིན་པ་དེ་སྦྱིན་པ་ན། དེ་བཞིན་གཤེགས་པས་དག་པར་མཛད་པའི་སྨོན་ལམ་བཞིན་དུ། མིག་གི་སྦྱིན་པ་འདིས་ན། བདག་སེམས་ཅན་ཐམས་ཅད་ཀྱི་ཆོས་ཀྱི་མིག་སྒྲིབ་པ་མེད་པ་ཡོངས་སུ་དག་པར་བྱེད་པར་གྱུར་ཅིག་ཅེས་སྨོན་ལམ་འདེབས་སོ། །​དེ་ལ་ཚིག་ཕྱི་མ་ཡང་ཡོད་དེ། མིག་གི་སྦྱིན་པ་འདིས་ན་བདག །​བླ་མེད་བྱང་ཆུབ་སངས་རྒྱས་ནས། །​སེམས་ཅན་ཀུན་གྱི་ཆོས་ཀྱི་མིག །



The English translation of this folio by 84000 Translating the words of the Buddha can be found at:
https://read.84000.co/translation/toh182.html?part=UT22084-061-002-354#UT22084-061-002-354