Degé Kangyur volume 60, F.266.a

།ལྷའི་ཕྲེང་བའི་ཆར་འབེབས་པའི་སྤྲིན་བྱུང་ངོ་། །​ལྷའི་བྱུག་པའི་ཆར་འབེབས་པའི་སྤྲིན་བྱུང་ངོ་། །​ལྷའི་ཕྱེ་མའི་ཆར་འབེབས་པའི་སྤྲིན་བྱུང་ངོ་། །​ལྷའི་གོས་ཀྱི་ཆར་འབེབས་པའི་སྤྲིན་བྱུང་ངོ་། །​ལྷའི་གདུགས་ཀྱི་ཆར་འབེབས་པའི་སྤྲིན་བྱུང་ངོ་། །​ལྷའི་རྒྱལ་མཚན་གྱི་ཆར་འབེབས་པའི་སྤྲིན་བྱུང་ངོ་། །​ལྷའི་བ་དན་གྱི་ཆར་འབེབས་པའི་སྤྲིན་བྱུང་ངོ་། །​ལྷའི་རྣམ་པར་རྒྱལ་བའི་བ་དན་གྱི་ཆར་འབེབས་པའི་སྤྲིན་བྱུང་ངོ་། །​ལྷའི་བླ་རེའི་ཆར་འབེབས་པའི་སྤྲིན་གྱི་བར་དུ་བྱུང་ངོ་། །​ལྷའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་དང་། རྣམ་པར་རྒྱལ་བའི་བ་དན་དང་། བླ་རེའི་ཆར་འབེབས་པའི་སྤྲིན་བྱུང་ངོ་། །​རྣམ་པ་ཐམས་ཅད་ཀྱི་མཆོག་དང་ལྡན་པ། བླ་ན་མེད་པའི་བདེ་བ་ཆེན་པོ་ཐམས་ཅད་ཕུན་སུམ་ཚོགས་པའི་ལྷའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་དང་། རྣམ་པར་རྒྱལ་བའི་བ་དན་དང་། བླ་རེའི་ཆར་གྱི་སྤྲིན་རབ་ཏུ་གཏོང་ངོ་། །​དེ་ནས་འཇམ་དཔལ་གཞོན་ནུར་གྱུར་པ་ཏིང་ངེ་འཛིན་དེ་ལས་ལངས་ཏེ། ལངས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལན་བརྒྱ་སྟོང་དུ་མར་མི་དམིགས་པའི་ཚུལ་གྱིས་བསྐོར་བ་བྱས་ནས་འཇིག་རྟེན་གྱི་ཁམས་མི་མཇེད་ཅེས་བྱ་བ་འདི་ནས་སླར་སོང་ངོ་། །​དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་སངས་རྒྱས་དང་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱི་འབྱུང་གནས་འདི་ཟུང་ཤིག །​རྒྱས་པར་གྱིས་ཤིག །​དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་ཆོས་ཀྱི་རྣམ་གྲངས་འདི་བདག་གིས་གཟུང་བ་ནི་ལགས་ན། རྒྱས་པར་བགྱིད་ནི་མི་ནུས་སོ། །​དེ་ཅིའི་སླད་དུ་ཞེ་ན། བཅོམ་ལྡན་འདས་དོན་དམ་པར་དམིགས་པ་ལ་མངོན་པར་ཞེན་པའི་སེམས་ཅན་ཤིན་ཏུ་མང་སྟེ། རྫས་ལ་མངོན་པར་ཞེན་པ་ནས་དངོས་པོའི་བར་ལ་མངོན་པར་ཞེན་ཏེ། ལོག་པར་འཛིན་པ་དེ་ལས་དབྱེ་བ་ཤིན་ཏུ་དཀའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh179.html?part=UT22084-060-008-286#UT22084-060-008-286