Degé Kangyur volume 60, F.265.b

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཡང་ཤིན་ཏུ་རྒྱ་ཆེ་བ། ཤིན་ཏུ་ཁྱད་པར་དང་ལྡན་པའི་མཆོད་པ་བྱས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཚིག་འདི་སྐད་ཅེས་གསོལ་ཏོ། །​བཅོམ་ལྡན་འདས་སེམས་ཅན་ཐམས་ཅད་འདི་ལྟ་བུའི་སེང་གེའི་སྒྲ། བྱེ་བྲག་ཏུ་འཕགས་པའི་སྒྲ། ཁྱུ་མཆོག་གི་སྒྲ། སྐྱེས་བུ་ཆེན་པོའི་སྒྲ། ཡང་དག་པའི་སྒྲ། དེ་ཁོ་ནའི་སྒྲ། མི་དམིགས་པའི་སྒྲ། དོན་དམ་པའི་སྒྲ། མི་དམིགས་པའི་ཚུལ་གྱིས་འབྱིན་པར་གྱུར་ཅིག །​དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དགའ་མགུ་རངས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལན་བརྒྱ་སྟོང་དུ་མར་བསྐོར་བ་བྱས་ནས། བཅོམ་ལྡན་འདས་ཀྱི་གན་ནས་སླར་དོང་སྟེ། དེ་དག་ཕྱོགས་བཅུར་སོང་ནས་མི་དམིགས་པའི་བརྩོན་འགྲུས་ཀྱི་གོ་ཆ་ཆེན་པོ་གོ་ཆ་མེད་པའི་ཚུལ་གྱིས་བགོས་ནས་དོན་དམ་པ་དང་། ཀུན་རྫོབ་ཀྱི་བདེན་པ་གཉིས་ལ་གནས་པའི་ཆོས་བསྟན་པ་འདི་ཉིད་མི་སྟོན་པའི་ཚུལ་གྱིས་སྟོན་ཏོ། །​ཆོས་འདུལ་བ་འདི་ཉིད་ལ་སེམས་ཅན་ཐམས་ཅད་འདུལ་ཞིང་སྟོན་ཏོ། །​མི་འཇོག་པའི་ཚུལ་གྱིས་རབ་ཏུ་འགོད་དོ། །​འཇམ་དཔལ་གཞོན་ནུར་གྱུར་པ་སྟན་དེ་ལ་འདུག་སྟེ་མ་ལངས་པར་འདི་འདྲ་བའི་ཏིང་ངེ་འཛིན་ལ་མཉམ་པར་བཞག་སྟེ། ཏིང་ངེ་འཛིན་དེས་འཇམ་དཔལ་གཞོན་ནུར་གྱུར་པའི་གཙུག་ཏོར་གྱི་གསེབ་སྤྱི་བོའི་གཙུག་ནས་སེམས་ཅན་ཐམས་ཅད་ཀྱི་དམིགས་པ་དང་། མི་ཤེས་པ་སེལ་བ་ཞེས་བྱ་བའི་འོད་ཟེར་བྱུང་སྟེ། དེ་བྱུང་ནས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་སངས་རྒྱས་ཀྱི་ཞིང་རབ་འབྱམ་ཐམས་ཅད་སྣང་བར་བྱས་སོ། །​འོད་ཟེར་སྣང་བ་དེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ཆོས་བཤད་པ། ཀུན་རྫོབ་དང་དོན་དམ་པའི་བདེན་པ་གཉིས་ལ་བརྟེན་པ་མི་ཐོས་པའི་ཚུལ་གྱིས་ཐོས་སོ། །​འདི་ལྟར་ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་ཐམས་ཅད་ན་བཞུགས་པའི་སངས་རྒྱས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ལ་མཆོད་པ་བྱ་བའི་ཕྱིར་འོད་ཟེར་གྱི་སྣང་བ་དེ་ལས་ལྷའི་མེ་ཏོག་གི་ཆར་འབེབས་པའི་སྤྲིན་བྱུང་ངོ་། །​ལྷའི་བདུག་པའི་ཆར་འབེབས་པའི་སྤྲིན་བྱུང་ངོ་། །​ལྷའི་སྤོས་ཀྱི་ཆར་འབེབས་པའི་སྤྲིན་བྱུང་ངོ་། །​ལྷའི་ཕྲེང་བའི་ཆར་འབེབས་པའི་སྤྲིན་བྱུང་ངོ་།



The English translation of this folio by 84000 - Translating the words of the Buddha can be found at:
https://read.84000.co/translation/toh179.html?part=UT22084-060-008-285#UT22084-060-008-285