Degé Kangyur volume 60, F.265.a

།འདི་དག་ནི་ཡི་དགས་ཀྱི་ཡུལ་ལོ། །​འདི་དག་ནི་ལྷ་མ་ཡིན་ནོ། །​འདི་དག་ནི་མིའོ། །​འདི་དག་ནི་ལྷའོ། །​འདི་དག་ནི་འདོད་པ་ན་སྤྱོད་པའི་ལྷའོ། །​འདི་དག་ནི་གཟུགས་ན་སྤྱོད་པའི་ལྷའོ། །​འདི་དག་ནི་གཟུགས་མེད་པ་ན་སྤྱོད་པའི་ལྷའོ། །​འདི་ནི་འདོད་པའི་ཁམས་སོ། །​འདི་ནི་གཟུགས་ཀྱི་ཁམས་སོ། །འདི་ནི་གཟུགས་མེད་པའི་ཁམས་སོ། །​འདི་ནི་ལུས་ཀྱིས་ལེགས་པར་སྤྱོད་པའོ། །​འདི་ནི་ངག་གིས་ལེགས་པར་སྤྱོད་པའོ། །​འདི་ནི་ཡིད་ཀྱིས་ལེགས་པར་སྤྱོད་པའོ། །​འདི་ནི་སྦྱིན་པའི་ཕ་རོལ་ཏུ་ཕྱིན་པའོ། །​འདི་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །​འདི་ནི་བཟོད་པའི་ཕ་རོལ་ཏུ་ཕྱིན་པའོ། །​འདི་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །​འདི་ནི་བསམ་གཏན་གྱི་ཕ་རོལ་ཏུ་ཕྱིན་པའོ། །​འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །​འདི་ནི་ཐབས་ཀྱི་ཕ་རོལ་ཏུ་ཕྱིན་པའོ། །​འདི་ནི་སྨོན་ལམ་གྱི་ཕ་རོལ་ཏུ་ཕྱིན་པའོ། །​འདི་ནི་སྟོབས་ཀྱི་ཕ་རོལ་ཏུ་ཕྱིན་པའོ། །​འདི་ནི་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །​འདི་ནི་ས་བཅུ་དང་། དབང་བཅུ་དང་། བྱང་ཆུབ་སེམས་དཔའི་སྟོབས་བཅུ་དང་། དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། དབང་པོ་ལྔ་དང་། སྟོབས་ལྔ་དང་། ཇི་ཙམ་དུ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། ཇི་ཙམ་དུ་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་དང་། ཇི་ཙམ་དུ་སངས་རྒྱས་ཀྱི་བྱང་ཆུབ་དང་། ཇི་ཙམ་དུ་དེ་བཞིན་ཉིད་དང་། ཡང་དག་པའི་མཐའ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུས་མ་བྱས་པ་དང་། ཇི་ཙམ་དུ་འདུས་བྱས་དང་། འདུས་མ་བྱས་པའི་ཆོས་ཐམས་ཅད་དང་། ཇི་ཙམ་དུ་འཁོར་བ་དང་། མྱ་ངན་ལས་འདའ་བ་དང་། ཇི་ཙམ་དུ་སྨྲ་བ་དང་། སྨྲ་བར་བྱ་བ་དང་། ཤེས་པ་དང་། ཤེས་བྱར་ཐ་སྙད་འདོགས་པ་དང་། འབྲེལ་པར་འཇུག་པ་དེ་ཙམ་དུ་འཇིག་རྟེན་ཀུན་རྫོབ་ཀྱི་ཐ་སྙད་འཇུག་གོ། །​དོན་དམ་པར་ན་སྤྱོད་པ་ཐམས་ཅད་མེད་པར་གྱུར་པ་སྟེ། དེ་ཅིའི་ཕྱིར་ཞེ་ན། རིགས་ཀྱི་བུ་དོན་དམ་པར་ན་ཆོས་ཐམས་ཅད་ཤིན་ཏུ་མ་སྐྱེས་པ། མ་བྱུང་བ། དངོས་པོ་མེད་པའོ། །​དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཤིན་ཏུ་ངོ་མཚར་དུ་གྱུར་ནས་སྟན་ལས་ལངས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཡང་ཤིན་ཏུ་རྒྱ་ཆེ་བ།



The English translation of this folio by 84000 - Translating the words of the Buddha can be found at:
https://read.84000.co/translation/toh179.html?part=UT22084-060-008-284#UT22084-060-008-284