ཚངས་པ་ཆོས་བཞི་པོ་འདི་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་རིགས་མི་གཅོད་དོ། །བཅོམ་ལྡན་འདས་ཀྱིས་བཞི་པ་མངོན་པར་བསྒྲུབ་པ་འདི་བཤད་པ་ན། ལྷ་དང་མིར་བཅས་པའི་སྐྱེ་དགུ་རྣམས་ལས་སྲོག་ཆགས་སྟོང་ཕྲག་སུམ་ཅུ་རྩ་གཉིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ལྔ་སྟོང་ཡང་མི་སྐྱེ་བའི་ཆོས་ལ་བཟོད་པ་སྐྱེས་སོ། །སངས་རྒྱས་ཀྱི་ཞིང་སྣ་ཚོགས་ནས་འདུས་པའི་བྱང་ཆུབ་སེམས་དཔའ་དེ་དག་གིས་ཀྱང་བཅོམ་ལྡན་འདས་ལ་མཆོད་པ་བྱ་བའི་ཕྱིར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་ལྷའི་མེ་ཏོག་རྣམས་ཀྱིས་པུས་མོ་ནུབ་ཙམ་དུ་ཁེབས་པར་བྱས་སོ། །དེ་ནས་གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་ཚངས་པ་ཁྱད་པར་སེམས་ལ་འདི་སྐད་ཅེས་སྨྲས་སོ། །ཚངས་པ་ཁྱོད་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཚུལ་བཞིན་དྲི་བ་འདྲི་བ་ལ་མཁས་པ་རྣམས་ཀྱི་མཆོག་ཏུ་གསུངས་ན། དེ་ཇི་ལྟར་དྲིས་ན་བྱང་ཆུབ་སེམས་དཔའ་ཚུལ་བཞིན་དྲི་བ་ཡིན། ཁྱད་པར་སེམས་ཀྱིས་སྨྲས་པ། རིགས་ཀྱི་བུ་བདག་ཏུ་སྒྲོ་འདོགས་པས་འདྲི་ན་ཚུལ་བཞིན་མ་ཡིན་པས་འདྲིའོ། །གཞན་དུ་སྒྲོ་འདོགས་པས་འདྲི་ན་ཚུལ་བཞིན་མ་ཡིན་པར་འདྲིའོ། །ཆོས་སུ་སྒྲོ་འདོགས་པས་འདྲི་ན་ཚུལ་བཞིན་མ་ཡིན་པར་འདྲིའོ། །དྲ་བ་ཅན་གྱི་འོད་གང་ལ་བདག་ཏུ་སྒྲོ་འདོགས་པ་མེད་པ་དང་། གཞན་དུ་སྒྲོ་འདོགས་པ་མེད་པ་དང་། ཆོས་སུ་སྒྲོ་འདོགས་པ་མེད་པ་འདི་ནི་ཚུལ་བཞིན་འདྲིའོ། །གཞན་ཡང་དྲ་བ་ཅན་གྱི་འོད་བསྐྱེད་པའི་ཕྱིར་འདྲི་ན་ཚུལ་བཞིན་མ་ཡིན་པར་འདྲིའོ། །འགག་པའི་ཕྱིར་འདྲི་ན་ཚུལ་བཞིན་མ་ཡིན་པའོ། །གནས་དང་གནས་མ་ཡིན་པའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །དྲ་བ་ཅན་གྱི་འོད་གང་ལ་ཆོས་གང་ཡང་སྐྱེ་བའི་ཕྱིར་རམ། འགག་པའི་ཕྱིར་རམ། གནས་དང་གནས་མ་ཡིན་པའི་ཕྱིར་འདྲི་བ་མེད་པ་དེ་ནི་ཚུལ་བཞིན་འདྲི་བའོ། །གཞན་ཡང་དྲ་བ་ཅན་གྱི་འོད་ཀུན་ནས་ཉོན་མོངས་པའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །རྣམ་པར་བྱང་བའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །འཁོར་བའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ།