Degé Kangyur volume 58, F.313.b

ཉན་ཐོས་དང་རང་སངས་རྒྱས་དེ་དག་ཐམས་ཅད་མི་འམ་ཅིའི་རྒྱལ་པོ་སྡོང་པོས་ཟིལ་གྱིས་ནོན་ཏོ། །​དེ་ཅིའི་ཕྱིར་ཞེ་ན། ཀཽ་ཤི་ཀ་བྱང་ཆུབ་སེམས་དཔའ་སེམས་བསྐྱེད་མ་ཐག་པས། ཉན་ཐོས་དང་རང་སངས་རྒྱས་ཐམས་ཅད་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ཐམས་ཅད་ཟིལ་གྱིས་ནོན་ཏོ། །​ཀཽ་ཤི་ཀ་དེ་ལྟ་བས་ན་བྱང་ཆུབ་སེམས་དཔའ་ནི་ལྷར་བཅས་པའི་འཇིག་རྟེན་གྱིས་ཟིལ་གྱིས་མི་ནོན་ཏོ། །​གང་བྱང་ཆུབ་སེམས་དཔའ་ལ་ཟིལ་གྱིས་གནོན་པར་སེམས་པ་དེ་ནི་དེ་བཞིན་གཤེགས་པ་ལ་ཟིལ་གྱིས་གནོན་པར་འདོད་པའོ། །​དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་ནི་དེ་བཞིན་གཤེགས་པ་འབྱུང་ངོ་། །​དེ་བཞིན་གཤེགས་པ་ལས་ནི་ཉན་ཐོས་དང་རང་སངས་རྒྱས་འབྱུང་ངོ་། །​དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བསྟན་པ་འདི་ཐོས་ནས་ཐལ་མོ་སྦྱར་ཏེ་མཆི་མ་བླགས་ནས་འདི་སྐད་ཅེས་ཀྱེ་མའོ། །​བདག་ནི་སངས་རྒྱས་ཀྱི་མཁྱེན་པ་ཆགས་པ་མི་མངའ་ཞིང་སྒྲིབ་པ་མི་མངའ་བ་འདི་ལྟ་བུ་ལས་ཉམས་སོ་ཞེས་སྨྲས་སོ། །​དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་བུ་ལྷའི་བུ་འོད་ཟེར་སྲུང་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །​ཡང་འདི་ལྟར་གང་རབ་ཏུ་དབེན་པ་རྣམ་པར་བསྒྲུབ་པར་ཉེ་བར་གནས་པའི་མཚན་ཉིད་མ་ལགས་པའི་ཆོས་རྣམས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་བསྐྱེད་པ་དེ་ནི་སེམས་ཅན་ཐམས་ཅད་ལ་སྙིང་རྗེ་རྙེད་པ་མ་ལགས། རྒྱ་ཆེན་པོ་ལ་མོས་པའི་དགེ་བའི་བཤེས་གཉེན་ལ་སྟེན་པ་མ་ལགས་ཏེ། ཕྱིས་འགྱོད་པར་འགྱུར་བའོ། །​ཡབ་སྐྱོན་མེད་པ་ལ་ཞུགས་ཏེ་རྒྱུད་ཚིག་ཅིང་ས་བོན་ཚིག་སྟེ། ཐེག་པ་ཆེན་པོའི་སྣོད་དུ་མ་གྱུར་པ་ལ་ད་བགྱིར་ཅི་མཆིས། བསྟན་པ་འདི་བཤད་པ་ན་སུམ་ཅུ་རྩ་གསུམ་རིས་ཀྱི་ལྷའི་བུ་ལས་ལྷའི་བུ་སྟོང་ཐམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །​དེ་ནས་བཅོམ་ལྡན་འདས་ལ་ལྷའི་བུ་འོད་ཟེར་སྲུང་གིས་འདི་སྐད་ཅེས་གསོལ་ཏོ། །​བཅོམ་ལྡན་འདས་བཅོམ་ལྡན་འདས་ཀྱི་བྱང་ཆུབ་སེམས་དཔའི་སྤྱོད་པ་དཀའ་བ་སྤྱད་པ་བརྒྱ་སྟོང་ཕྲག་ཇི་སྙེད་པ་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བསྟར་བ་ནི་བདག་ལ་མངོན་སུམ་དུ་གྱུར་ཏོ།



The English translation of this folio by 84000 - Translating the words of the Buddha can be found at:
https://read.84000.co/translation/toh157.html?part=UT22084-058-006-1639#UT22084-058-006-1639