Degé Kangyur volume 58, F.313.a

བྱང་ཆུབ་སེམས་དཔའ་ལྔ་སྟོང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །​རྒྱལ་པོ་མ་སྐྱེས་དགྲའི་འཁོར་དང་། རྒྱལ་པོའི་ཁབ་ཀྱི་བྲམ་ཟེ་དང་། ཁྱིམ་བདག་དང་། མི་འམ་ཅི་དང་། དྲི་ཟ་དང་། ལྟོ་འཕྱེ་ཆེན་པོ་དེ་དག་གི་འཁོར་གྱི་སྲོག་ཆགས་བརྒྱད་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ཚིག་འདི་སྐད་ཅེས་བཅོམ་ལྡན་འདས་བདག་ཅག་ཀྱང་བྱང་ཆུབ་སེམས་དཔའི་སྤྱོད་པ་འདི་ལ་བསླབ་པར་བགྱིའོ། །​ནན་ཏན་གྱིས་བསྒྲུབ་པར་བགྱིའོ། །​སེམས་ཅན་ཚད་མ་མཆིས་པ་དག་ཀྱང་བྱང་ཆུབ་སེམས་དཔའི་སྤྱོད་པ་འདི་ཉིད་ཡང་དག་པར་འཛིན་དུ་སྩལ་བར་བགྱིའོ་ཞེས་སྨྲས་སོ། །​དེ་ནས་བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་སྡོང་པོ་འགྲོར་གནང་ངོ་། །​དེ་ནས་བཅོམ་ལྡན་འདས་ཀྱིས་གནང་བས་མི་འམ་ཅིའི་རྒྱལ་པོ་སྡོང་པོ་བུ་དང་བཅས། དཔུང་དང་བཅས། སླས་དང་བཅས། རང་གི་སྐྱེ་བོ་དང་བཅས་འཁོར་དང་བཅས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཟོད་པ་གསོལ་ནས་སིལ་སྙན་དཀྲོལ། མེ་ཏོག་གི་ཆར་ཕབ། འོད་ཟེར་གྱི་དྲ་བ་ཕྱུང་སྟེ། ས་ཆེན་པོ་རྣམ་པ་དྲུག་ཏུ་གཡོས་པར་བྱས་ནས། བཅོམ་ལྡན་འདས་ཀྱི་ཐད་ནས་སོང་སྟེ། དེ་སྐད་ཅིག་ཐང་ཅིག་ཡུད་ཙམ་དེ་ཉིད་ལ་རིའི་རྒྱལ་པོ་སྤོས་ཀྱི་ངད་ལྡང་དུ་རང་གི་ཁྱིམ་དུ་ཕྱིན་ཏོ། །​དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །​བཅོམ་ལྡན་འདས་མི་འམ་ཅིའི་རྒྱལ་པོ་སྡོང་པོས་དེ་བཞིན་གཤེགས་པ་ལ་མཆོད་པ་དང་ཆོས་ལ་མཆོད་པས་བདག་ཟིལ་གྱིས་ནོན་ཏོ། །​བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ་མི་འམ་ཅིའི་རྒྱལ་པོ་སྡོང་པོས་ཁྱོད་འབའ་ཞིག་ཟིལ་གྱིས་མནན་པ་མ་ཡིན་གྱིས། ཀཽ་ཤི་ཀ་བྱང་ཆུབ་སེམས་དཔའ་སེམས་དཔའ་ཆེན་པོ་ས་ཐོབ་པ་མ་གཏོགས་པར་གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། ཉན་ཐོས་དང་རང་སངས་རྒྱས་དེ་དག་ཐམས་ཅད་མི་འམ་ཅིའི་རྒྱལ་པོ་སྡོང་པོས་ཟིལ་གྱིས་ནོན་ཏོ།



The English translation of this folio by 84000 - Translating the words of the Buddha can be found at:
https://read.84000.co/translation/toh157.html?part=UT22084-058-006-1638#UT22084-058-006-1638