Degé Kangyur volume 58, F.309.a

བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལྷའི་ཅོད་པན་ལ་འདི་སྐད་ཅེས་བཀའ་སྩལ་ཏོ། །​རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སུམ་ཅུ་རྩ་གཉིས་དང་ལྡན་ན་ཆོས་ཀྱི་སྣོད་དུ་འགྱུར་རོ། །​སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། རིགས་ཀྱི་བུ་བྱང་ཆུབ་སེམས་དཔའི་སྣོད་སངས་རྒྱས་ཀྱི་བྱིན་གྱི་རླབས་དང་། ལྷག་པའི་བསམ་པའི་སྣོད་བསམ་པ་དང་། བྱང་ཆུབ་ཀྱི་ལམ་ཉེ་བར་སྟོན་པའི་སྣོད་སྦྱོར་བ་དང་། དགེ་བའི་རྩ་བ་ཁྱད་པར་དུ་འགྲོ་བའི་སྣོད་ལྷག་པའི་བསམ་པ་དང་། མང་དུ་ཐོས་པའི་སྣོད་དྲན་པ་དང་། ལམ་ལ་འཇུག་པའི་སྣོད་བློ་གྲོས་དང་། དོན་རྟོགས་པ་རྗེས་སུ་རྟོགས་པའི་སྣོད་རྟོགས་པ་དང་། ལོངས་སྤྱོད་ཆེན་པོའི་སྣོད་སྦྱིན་པ་དང་། བསམ་པ་ཡོངས་སུ་རྫོགས་པའི་སྣོད་ཚུལ་ཁྲིམས་དང་། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འཐོབ་པའི་སྣོད་བཟོད་པ་དང་། སངས་རྒྱས་ཀྱི་ཆོས་ཐམས་ཅད་འགྲུབ་པའི་སྣོད་བརྩོན་འགྲུས་དང་། སེམས་ལས་སུ་རུང་བའི་སྣོད་བསམ་གཏན་དང་། དོགས་པ་ཐམས་ཅད་ལས་རབ་ཏུ་འདས་པའི་སྣོད་ཤེས་རབ་དང་། སེམས་ཅན་ཐམས་ཅད་ལ་སེམས་སྙོམས་པའི་སྣོད་བྱམས་པ་དང་། དབུལ་ཞིང་ཉམ་ཐག་པ་ཐམས་ཅད་བསྐྱབས་པའི་སྣོད་སྙིང་རྗེ་དང་། ཆོས་ལ་དགའ་བའི་སྣོད་དགའ་བ་དང་། རྗེས་སུ་ཆགས་པ་དང་། ཁོང་ཁྲོ་བ་སྤང་བའི་སྣོད་བཏང་སྙོམས་དང་། དགེ་བའི་རྩ་བ་ཐམས་ཅད་འཛིན་དུ་འཇུག་པའི་སྣོད་དགེ་བའི་བཤེས་གཉེན་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྣོད་ཐོས་པ་ཚོལ་བས་ངོམས་མི་མྱོང་བ་དང་། མི་ལྟོས་པའི་སྣོད་རབ་ཏུ་འབྱུང་བ་དང་། དོན་ཉུང་ཞིང་བྱ་བ་ཉུང་བའི་སྣོད་དགོན་པ་ལ་གནས་པ་དང་། བསམ་གཏན་དང་མངོན་པར་ཤེས་པའི་སྣོད་དབེན་པ་ལ་དགའ་བ་དང་། སེམས་ཅན་ཡོངས་སུ་སྨིན་པར་བྱ་བའི་སྣོད་བསྡུ་བའི་དངོས་པོ་དང་། ཆོས་སྣང་བའི་སྣོད་དམ་པའི་ཆོས་ཡོངས་སུ་འཛིན་པ་དང་། ཐོས་པ་ཐམས་ཅད་འཛིན་པའི་སྣོད་གཟུངས་དང་། སེམས་ཅན་ཐམས་ཅད་ཀྱི་ཐེ་ཙོམ་གཅད་པའི་སྣོད་སྤོབས་པ་དང་། སངས་རྒྱས་མཐོང་བའི་སྣོད་སངས་རྒྱས་རྗེས་སུ་དྲན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྣོད་ཆོས་རྗེས་སུ་དྲན་པ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh157.html?part=UT22084-058-006-1630#UT22084-058-006-1630