Degé Kangyur volume 58, F.309.b

ཤེས་རབ་ཀྱི་ཕ་རོལ་ཏུ་ཕྱིན་པའི་སྣོད་ཆོས་རྗེས་སུ་དྲན་པ་དང་། དགེ་བའི་རྩ་བ་བསྲུང་བའི་སྣོད་ཞེ་སྡང་མེད་པའི་སེམས་དང་། ལྟ་བར་གྱུར་པ་ཐམས་ཅད་སྤོང་བའི་སྣོད་སྟོང་པ་ཉིད་ལ་མོས་པ་དང་། མཐར་འཛིན་པ་ཐམས་ཅད་ཡོངས་སུ་སྤོང་བའི་སྣོད་རྟེན་ཅིང་འབྲེལ་པར་འབྱུང་བ་དང་། མི་འཁྲུགས་ཤིང་ཕྱད་པར་ལུང་སྟོན་པའི་སྣོད་མི་སྐྱེ་བའི་ཆོས་ལ་བཟོད་པ་ཐོབ་པ་དང་། སྟོབས་བཅུ་དང་མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་རྣམས་ཀྱི་སྣོད་ཕྱིར་མི་ལྡོག་པའི་ས་སྟེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སུམ་ཅུ་རྩ་གཉིས་པོ་འདི་དག་དང་ལྡན་ན་ཆོས་ཀྱི་སྣོད་དུ་རིག་པར་བྱའོ། །​བསྟན་པ་འདི་བཤད་པ་ན་སྲོག་ཆགས་ཁྲིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། ཚིག་འདི་སྐད་ཅེས་བཅོམ་ལྡན་འདས་སེམས་ཅན་ཐམས་ཅད་ཀྱང་འདི་འདྲ་བའི་ཆོས་ཀྱི་སྣོད་དུ་གྱུར་ཅིག །​བདག་ཅག་ཀྱང་བཅོམ་ལྡན་འདས་ཀྱིས་ཇི་སྐད་དུ་བསྟན་པའི་ཆོས་དེ་ལྟ་བུའི་སྣོད་དུ་གྱུར་ཅིག་ཅེས་སྨྲས་སོ། །​དེ་ནས་བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་བཀའ་སྩལ་ཏོ། །​མི་འམ་ཅིའི་བདག་པོ་ཁྱོད་ཀྱིས་འཁོར་འདི་སྐྱོ་བར་འགྱུར་དུ་འོང་གིས་ཁྱོད་རང་གི་གནས་སུ་སོང་ཤིག །​མི་འམ་ཅིའི་རྒྱལ་པོ་སྡོང་པོས་གསོལ་པ། བཅོམ་ལྡན་འདས་གང་ཡོངས་སུ་སྐྱོ་བ་དེ་བྱང་ཆུབ་སེམས་དཔའ་ཞེས་མི་བགྱི་སྟེ། བཅོམ་ལྡན་འདས་བྱང་ཆུབ་སེམས་དཔས་ནི་སྐྱོ་བ་བཟོད་པར་བགྱིའོ། །​བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་ཡོངས་སུ་སྐྱོ་བ་ལགས། ཇི་ལྟར་ན་ཡོངས་སུ་མི་སྐྱོ་བ་ལགས། བཅོམ་ལྡན་འདས་ཀྱིས་བཀའ་སྩལ་པ། མི་འམ་ཅིའི་བདག་པོ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཡོངས་སུ་སྐྱོ་བར་འགྱུར་རོ། །​བཞི་གང་ཞེ་ན། འདི་ལྟ་སྟེ། སེམས་ཅན་གྱི་ཁམས་ཚད་མེད་པ་ཐོས་ན་སྐྲག་པ་དང་། འཁོར་བ་ཚད་མེད་པ་ཐོས་ན་སྐྲག་པ་དང་། སངས་རྒྱས་ཀྱི་ཡེ་ཤེས་ཚད་མེད་པར་ཐོས་ན་སྐྲག་པ་དང་། བསོད་ནམས་ཚད་མེད་པས་མཚན་དང་དཔེ་བྱད་བཟང་པོ་འགྲུབ་པ་ཐོས་ན་སྐྲག་པ་སྟེ། མི་འམ་ཅིའི་བདག་པོ་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་ཡོངས་སུ་སྐྱོ་བར་རིག་པར་བྱའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh157.html?part=UT22084-058-006-1631#UT22084-058-006-1631