Degé Kangyur volume 58, F.306.b

།གཡས་གཡོན་ན་ཡང་རྣམ་པར་མཐོང་མ་མྱོང་། །​ཇི་ལྟར་རི་རབ་བརྟན་ཞིང་མི་གཡོ་བ། །​དེ་ལྟར་ཁྱེད་ཀྱི་སྐུ་ནི་དཔལ་གྱིས་མཛེས། །​འདྲེན་པ་ཁྱོད་ཀྱིས་རྫུ་འཕྲུལ་སྟོབས་ཀྱིས་ནི། །​ཆགས་པ་མ་མཆིས་པར་ཡང་མཁའ་ལས་མཆི། །​ནམ་མཁའ་ལྟ་བུར་དག་ཅིང་དྲི་མི་མངའ། །​བཅོམ་ལྡན་ཉོན་མོངས་བསལ་ལ་ཕྱག་འཚལ་ལོ། །​ལྷ་དབང་ལྷ་མིན་དབང་དང་སྲིན་པོ་དང་། །​བརྒྱ་བྱིན་ཚངས་པ་དང་ནི་དག་པའི་ལྷ། །​ཉི་མ་ཟླ་བ་སྐར་མར་བཅས་པའི་འོད། །​ཁྱེད་ཀྱི་མཛོད་སྤུས་འོད་ནི་མ་མཆིས་གྱུར། །​ཤེས་རབ་འབྱུང་གནས་ཤེས་རབ་རྒྱ་མཚོ་ལྡན། །​སེམས་ཅན་ཀུན་གྱི་སེམས་ཀྱི་སྤྱོད་ལ་མཁས། །​འཇིག་རྟེན་གསུམ་ན་འཇིག་རྟེན་གསུམ་གྱིས་མཆོད། །​འཇིག་རྟེན་གྲགས་པའི་ཞབས་ལ་ཕྱག་འཚལ་ལོ། །​བདུད་བཞི་པོ་ཡི་སྐྱོན་རྣམས་བསལ་བ་པོ། །​བདེན་པ་བཞི་ལ་བསྒོམ་ཞིང་དཔྱོད་མཛད་པ། །​རྫུ་འཕྲུལ་བཞི་ཡི་སྟོབས་ཀྱིས་བསྙེངས་མི་མངའ། །​སངས་རྒྱས་གཤེགས་པས་གཤེགས་ཏེ་གཤེགས་པ་མཛེས། །​བསྐལ་པ་བརྒྱར་ཡང་སྐྱོ་བ་མི་མངའ་ཞིང་། །​རྟག་ཏུ་དུལ་ལ་ཐུགས་ནི་མཉམ་པར་བཞག །​ལེགས་པར་གསུངས་པས་འགྲོ་བ་ཚིམ་མཛད་ཀྱང་། །​ཁྱོད་ནི་ཚིག་དང་སྐད་ལ་གནས་མ་ལགས། །​ཁྱོད་ཀྱི་གསུང་ནི་ཡིད་འོང་རབ་ཏུ་སྙན། །​ཞིང་བརྒྱ་དག་ཏུ་ཐོགས་པ་མེད་པར་མཆི། །​སྒྲ་ནི་སེམས་ཅན་གང་གིས་ཐོས་གྱུར་པ། །​དེ་དག་ཐམས་ཅད་བདེ་བས་ཚིམ་པར་འགྱུར། །​སེམས་ཅན་ཁ་ལོ་སྒྱུར་བ་སྤུ་གཅིག་ཏུ། །​སྟོང་གསུམ་རྒྱ་མཚོའི་ཆབ་རྣམས་ཞུགས་གྱུར་ཀྱང་། །​སེམས་ཅན་རགས་པ་རྣམས་ལའང་མི་གནོད་ལ། །​རྫུ་འཕྲུལ་ལ་ཡང་སྐྱོན་ནི་ཡོང་མི་གདའ། །​སྟོང་གསུམ་གྱི་ནི་རི་བོ་རི་རབ་དག །​ཕྱག་གཅིག་གི་ནི་མཐིལ་དུ་བཞག་ནས་སུ། །​ཞིང་མང་བྱེ་བ་དག་ཏུ་གཤེགས་མཛད་ཀྱང་། །​ཁྱོད་ཀྱི་སྐུ་ཡི་སྟོབས་ནི་ཞུམ་མ་མཆིས། །​ཁྱོད་ནི་བསྐལ་པ་བརྒྱ་ཕྲག་བསམ་ཡས་ནས། །​བརྟུལ་ཞུགས་དཀའ་ཐུབ་ཚུལ་ཁྲིམས་ཡོན་ཏན་དང་། །​སྦྱིན་དང་དུལ་དང་སྡོམ་དང་བཟོད་པ་དང་། །​བརྩོན་འགྲུས་བསམ་གཏན་ཤེས་རབ་ཤིན་ཏུ་བསླབས། །​སངས་རྒྱས་བྱེ་བ་མང་ལ་བསྙེན་བཀུར་མཛད།