འཇིག་རྟེན་སྐྱོང་བ་དང་། འདོད་པ་ན་སྤྱོད་པ་དང་། གཟུགས་ན་སྤྱོད་པ་དང་། གནས་གཙང་མའི་རིས་ཀྱི་ལྷའི་བུ་དེ་དག་གི་སྟན་ཡང་ཤིང་རྟ་དེའི་སྟེང་དུ་ཅི་རིགས་པར་སྤྲུལ་ཏོ། །དེ་ནས་མི་འམ་ཅིའི་རྒྱལ་པོ་སྡོང་པོས་དེ་ལྟ་བུའི་ཤིང་རྟ་བཀོད་པ་དེ་སྤྲུལ་ནས་ཐལ་མོ་སྦྱར་ཏེ། བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་ཤིང་རྟ་འདི་ལ་ཇི་ལྟར་གདན་བཤམས་པ་རྣམས་ལ་འཁོར་ཐམས་ཅད་དང་ཐབས་ཅིག་ཏུ་བཞུགས་སུ་གསོལ། དེ་ནས་སེང་གེའི་ཁྲི་དེ་ལ་བཅོམ་ལྡན་འདས་ཀྱང་བཞུགས། བྱང་ཆུབ་སེམས་དཔའ་དང་། དགེ་སློང་གི་དགེ་འདུན་དང་འཁོར་ཐམས་ཅད་ཀྱང་ཅི་རིགས་པར་འཁོད་དོ། །དེ་ནས་མི་འམ་ཅིའི་རྒྱལ་པོ་སྡོང་པོས་རྫུ་འཕྲུལ་གྱི་སྟོབས་ཀྱིས་ཤིང་རྟ་དེ་ལག་པ་གཡས་པས་བླངས་ཏེ། ཤིང་ཏ་ལ་བདུན་སྲིད་ཀྱི་སྟེང་གི་བར་སྣང་ལ་འཕགས་ནས། དེ་ནས་མི་འམ་ཅི་མོ་བརྒྱད་ཁྲི་བཞི་སྟོང་དེ་དག་ཐམས་ཅད་དང་བུ་བརྒྱད་སྟོང་པོ་དེ་དག་དང་གཞན་ཡང་མི་འམ་ཅི་དང་དྲི་ཟ་དང་ལྟོ་འཕྱེ་ཆེན་པོ་བརྒྱ་སྟོང་ཕྲག་དུ་མ་དང་མི་འམ་ཅིའི་རྒྱལ་པོ་སྡོང་པོ་ཉིད་ཀྱང་རིན་པོ་ཆེའི་ཐག་པ་ཐོགས་ནས་ཤིང་རྟ་ལ་བཏགས་ཏེ་ནམ་མཁའ་ལས་དྲངས་སོ། །དེ་ནས་བཅོམ་ལྡན་འདས་སྟེང་གི་བར་སྣང་གི་ཤིང་རྟ་ལ་བཞུགས་ཤིང་། ནམ་མཁའི་དཀྱིལ་ནས་གཤེགས་པ་ལ་མི་འམ་ཅི་མོ་བརྒྱད་ཁྲི་བཞི་སྟོང་པོ་དེ་དག་གིས་སིལ་སྙན་དང་། གླུ་དབྱངས་བླངས་ནས་མཆོད་པ་བྱེད་དེ་མདུན་དུ་དོང་ཞིང་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །མི་འམ་ཅི་མོ་བརྒྱད་ཁྲི་བཞི་སྟོང་པོ། །གཟུགས་ཀྱི་དམ་པ་དང་ནི་ལྡན་པ་དག །སིལ་སྙན་རྣམས་ནི་རབ་ཏུ་དཀྲོལ་བགྱིད་ཅིང་། །ཡང་དག་བསྔགས་པས་འདྲེན་ལ་བསྟོད་པ་བགྱིད། །མཚན་མཆོག་བསོད་ནམས་ཀྱིས་ནི་གཟི་བརྗིད་གྱུར། །གཟུགས་མཆོག་མཐོང་ན་དགའ་བར་བགྱིད་པའི་གཟུགས། །བདེན་པའི་ཡོན་ཏན་ལ་ནི་རྟག་གནས་པ། །ཡོན་ཏན་མཚོ་ཆེན་ཁྱོད་ལ་ཕྱག་འཚལ་ལོ། །སྔོན་གྱི་རྒྱལ་བ་རྣམས་དང་ཁྱོད་མི་འདྲ། །གཡས་གཡོན་ན་ཡང་རྣམ་པར་མཐོང་མ་མྱོང་།