མི་འཇིགས་པས་སྤོབས་པ་ཞེས་བྱ་བའི་འོད་ཟེར་སྐྱེས་བུ་ཆེན་པོའི་མཚན་སྤྱི་གཙུག་ནས་བྱུང་ངོ་། །བཅོམ་ལྡན་འདས་ཀྱིས་འོད་ཟེར་དེ་ཕྱུང་མ་ཐག་ཏུ་དེ་ནས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ལ་ལན་བདུན་བསྐོར་བ་བྱས་ཏེ། བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོའི་ལུས་ལ་ལན་བརྒྱར་བསྐོར་བ་བྱས་ནས། བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོའི་སྤྱི་གཙུག་ཏུ་མི་སྣང་བར་གྱུར་ཏོ། །འོད་དེས་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོ་ལ་རེག་མ་ཐག་ཏུ། དེ་ནས་སངས་རྒྱས་ཀྱི་མཐུས་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ཀྱི་འོད་དང་། སེང་གེའི་ཁྲི་དང་། ལུས་བརྒྱ་འགྱུར་དུ་ཟིལ་གྱིས་མནན་ནས་ལམ་མེ། ལྷང་ངེ་། ལྷན་ནེའོ། །དེ་ནས་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོས་དེ་བཞིན་གཤེགས་པའི་བྱིན་གྱི་རླབས་རིག་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ཀྱི་དབུའི་གཙུག་གི་དྲང་ཐད་ཀྱི་སྟེང་གི་བར་སྣང་ལ་རིན་པོ་ཆེའི་གདུགས་དེ་བཞིན་གཤེགས་པའི་རྒྱན་ཅེས་བྱ་བ་ཡུ་བ་ནི་བཻ་དཱུརྱ། གཡོགས་མ་ནི་གསེར། སྙིང་པོ་ནི་རིན་པོ་ཆེ་ནེ་ཚོ་འམ་ཅི། རྩིབས་ནི་ཨན་ད་རྙིལ་ལས་བྱས་པ། མུ་ཏིག་གི་དོ་ཤལ་རབ་ཏུ་སྤྱངས་པ། དར་གྱི་ལྡ་ལྡིས་མཛེས་པར་བྱས་པ། དྲིལ་བུ་གཡེར་ཀའི་དྲ་བ་འཁྲོལ་བ། བྱང་ཆུབ་སེམས་དཔའི་ལུས་ཀྱིས་བཟུང་བ། རྒྱར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཚད་ཙམ་ཞིག་བྱིན་གྱིས་བརླབས་སོ། །དེ་བཞིན་གཤེགས་པ་ལ་མཆོད་པའི་ལས་ཀྱི་ཕྱིར་རིན་པོ་ཆེའི་གདུགས་དེ་ལྟ་བུ་བྱིན་གྱིས་བརླབས་ནས་མེ་ཏོག་གི་ཆར་ཡང་ཕབ་སྟེ། སིལ་སྙན་དང་། སྒྲ་དབྱངས་རྟག་ཏུ་རྒྱུན་མི་འཆད་པར་སྒྲ་འབྱུང་བར་བྱིན་གྱིས་བརླབས་ནས། བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ།