རང་སངས་རྒྱས་ཐམས་ཅད་ཀྱིས་བསྐལ་པ་བརྒྱ་ཕྲག་སྟོང་དུ་ཡང་སྟོན་པའི་རྔོ་མི་ཐོགས་སོ། །བཅོམ་ལྡན་འདས་དེ་ལ་བདག་འདི་སྙམ་བགྱིད་དེ། ཨེ་མ་ཇི་ཙམ་དུ་གང་རྫུ་འཕྲུལ་གྱིས་རྣམ་པར་སྤྲུལ་པའི་ཆོ་འཕྲུལ་འདི་ལྟ་བུ་འདི་མཐོང་ཡང་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པ་ལ་རེ་བ་སྐྱེད་པའི་སེམས་ཅན་ཤེས་རབ་འཆལ་པ་ཅན་དེ་དག་ནི་ངོ་མཚར་ཆེ་བ་སྙམ་བགྱིད་དོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བྱང་ཆུབ་སེམས་དཔའ་སེམས་དང་པོ་བསྐྱེད་པ་ཉིད་ཀྱིས་ཉན་ཐོས་དང་། རང་སངས་རྒྱས་ཐམས་ཅད་ཟིལ་གྱིས་ནོན་པའི་སླད་དུའོ། །བཅོམ་ལྡན་འདས་འདི་ལྟ་སྟེ། དཔེར་ན་ཤེས་རབ་འཆལ་པའི་རང་བཞིན་ཅན་གྱི་མི་ལ་ལ་ཞིག་ནོར་བུ་རིན་པོ་ཆེ་བཻ་དཱུརྱ་བོར་ནས་ནོར་བུ་མཆིང་བུ་ལ་དམིགས་པ་སྙམ་དུ་སེམས་པ་དང་། བཅོམ་ལྡན་འདས་གང་དག་ཐེག་པ་ཆེན་པོ་བོར་ནས་ཉན་ཐོས་དང་། རང་སངས་རྒྱས་ཀྱི་ཐེག་པ་ལ་དམིགས་པར་བགྱི་བ་སྙམ་དུ་སེམས་པའི་སེམས་ཅན་དག་ནི་འདྲ་བ་ཉིད་དུ་བདག་ལ་གདའོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་དག་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང་། སྐྱེད་པར་འགྱུར་བ་དེ་དག་ཐམས་ཅད་ནི་རིང་པོར་མི་ཐོགས་པར་ཆོས་འདི་ལྟ་བུ་དང་ལྡན་པར་འགྱུར་རོ། །བྱང་ཆུབ་སེམས་དཔའ་ཆོས་ཀྱི་དབང་ཕྱུག་གི་རྒྱལ་པོས་བསྟན་པ་འདི་བཤད་པ་ན། ལྷ་དང་མིར་བཅས་པའི་སྐྱེ་དགུའི་འཁོར་དེ་ལས་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་སུམ་ཅུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རྒྱན་བཀོད་པ་ཞེས་བྱ་བ་འདུས་པའི་ལེའུའོ།། །།དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའི་འདུས་པ་ཆེན་པོ་དེ་གཟིགས་ནས། ཨེ་མ་བྱང་ཆུབ་སེམས་དཔའ་འདུས་པ་འདི་དག་ནི་ཆོས་དོན་དུ་གཉེར་བ་དེ་བཞིན་གཤེགས་པའི་ཆོས་ཀྱི་མཛོད་འཛིན་པར་མཁྱེན་ནས་བྱང་ཆུབ་སེམས་དཔའི་སྤྱོད་པ་ལ་འཇུག་པས་ངེས་པར་འབྱུང་བ། སྒྲིབ་པ་མེད་པའི་སྒོའི་ལེའུའི་ཆོས་ཀྱི་རྣམ་གྲངས་རབ་ཏུ་བཤད་པའི་ཕྱིར། མི་འཇིགས་པས་སྤོབས་པ་ཞེས་བྱ་བའི་འོད་ཟེར་སྐྱེས་བུ་ཆེན་པོའི་མཚན་སྤྱི་གཙུག་ནས་བྱུང་ངོ་།