Degé Kangyur volume 57, F.46.b

།བྱང་ཆུབ་དོན་དུ་བརྟན་པ་སེམས་འཇོག་བྱེད། །​གནས་རྣམས་ཇི་སྙེད་གང་དག་ཡོད་གྱུར་དང་། །​རང་བཞིན་གནས་པའི་གནས་རྣམས་གཞན་དག་ཀྱང་། །​གཞན་མིན་དངོས་པོར་རྣམ་པར་རྟོགས་བྱའི་ཕྱིར། །​བྱང་ཆུབ་དོན་དུ་བརྟན་པ་སེམས་འཇོག་བྱེད། །​འདས་དང་མ་འོངས་ད་ལྟར་དུས་དག་ན། །​དགེ་དང་མི་དགེའི་ལས་རྣམས་གང་ཡོད་པ། །​དེ་དག་རྒྱུ་རྣམས་རྟོགས་པར་བྱ་བའི་ཕྱིར། །​བྱང་ཆུབ་དོན་དུ་བརྟན་པ་སེམས་འཇོག་བྱེད། །​ཏིང་འཛིན་བསམ་གཏན་རྣམ་ཐར་སྤྱོད་པ་དང་། །​དེ་བཞིན་སྙོམས་འཇུག་རྣམ་དག་མཐར་ཐུག་པ། །​དེ་དག་གནས་སྐབས་རྟོགས་པར་བྱ་བའི་ཕྱིར། །​བྱང་ཆུབ་དོན་དུ་བརྟན་པ་སེམས་འདི་འཇོག །​འཇིག་རྟེན་བརྩོན་འགྲུས་སྟོབས་དང་དབང་པོ་རྣམས། །​ཅི་འདྲ་ཅི་འདྲ་དེ་ཡི་དེ་དང་དེར། །​རིམ་པ་དེ་དག་རྟོགས་པར་བྱ་བའི་ཕྱིར། །​བྱང་ཆུབ་དོན་དུ་བརྟན་པ་སེམས་འཇོག་བྱེད། །​འཇིག་རྟེན་ཀུན་གྱི་མོས་པ་ཅི་འདྲ་དང་། །​ལྷག་པའི་བསམ་བ་ཐ་དད་རྣམ་གསུམ་ནས། །​བསྟན་བཅོས་དུ་མ་རྟོགས་པར་བྱ་བའི་ཕྱིར། །​བྱང་ཆུབ་དོན་དུ་བརྟན་པ་སེམས་འཇོག་བྱེད། །​རྣམ་པ་སྣ་ཚོགས་རྣམ་པ་དུ་མའི་ཁམས། །​གང་དག་འཇིག་རྟེན་གསུམ་འདིར་ཡོད་ཀུན་གྱི། །​ཁམས་ཀྱི་རང་བཞིན་རྟོགས་པར་བྱ་བའི་ཕྱིར། །​བྱང་ཆུབ་དོན་དུ་བརྟན་པ་སེམས་དེ་འཇོག །​ཆོས་འདིར་ཀུན་དུ་འགྲོ་བར་གང་གྱུར་ཅིང་། །​དགེ་བའི་འཇུག་པ་གང་ཡང་རབ་འཇུག་པ། །​ཡང་དག་རང་བཞིན་རྟོགས་པར་བྱ་བའི་ཕྱིར། །​བྱང་ཆུབ་དོན་དུ་བརྟན་པ་སེམས་འཇོག་བྱེད། །​ཞིང་རྣམས་ཐམས་ཅད་ཇི་ལྟར་འབྱུང་བ་དང་། །​སེམས་ཅན་ཇི་ལྟར་ས་ལས་འབྱུང་འགྱུར་ཞེས། །​ཆགས་མེད་མིག་ནི་རབ་ཏུ་དབྱེ་བའི་ཕྱིར། །​བྱང་ཆུབ་དོན་དུ་བརྟན་པ་སེམས་འདི་འཇོག །​འདས་པའི་དུས་དང་ད་ལྟར་བྱུང་དུས་ན། །​སེམས་ཅན་རིས་དངོས་མཚན་ཉིད་གང་ཡོད་དང་། །​སྔོན་གྱི་གནས་རྣམས་རྟོགས་པར་བྱ་བའི་ཕྱིར། །​བྱང་ཆུབ་དོན་དུ་བརྟན་བ་སེམས་འདི་འཇོག །​ཇི་ལྟར་འགྲོ་བར་སེམས་ཅན་འཆིང་བྱེད་པ། །​ཀུན་དུ་སྦྱོར་བ་འཇིག་རྟེན་གང་ཡོད་པའི། །​ཉོན་མོངས་ཟད་པ་རྟོགས་པར་བྱ་བའི་ཕྱིར། །​བྱང་ཆུབ་དོན་དུ་བརྟན་པ་སེམས་འདི་འཇོག །​འཇིག་རྟེན་གསུམ་ན་ཐ་སྙད་གང་བཏགས་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh145.html?part=UT22084-057-004-2621#UT22084-057-004-2621