Degé Kangyur volume 57, F.46.a

།སངས་རྒྱས་ཀྱི་མཐུས་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་རྣམས་ཀྱི་ཕ་རོལ་ནས་བྱང་ཆུབ་སེམས་དཔའ་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཕྲ་རབ་སྙེད་ལྷགས་ཏེ། ཕྱོགས་བཅུ་རྒྱས་པར་བཀང་ནས་འདི་སྐད་ཅེས་འཛེར་ཏོ། །​ཀྱེ་རྒྱལ་བའི་སྲས་དེ་ལྟར་ཁྱོད་བྱང་ཆུབ་སེམས་དཔའི་ཆོས་ཉིད་འདི་སྟོན་པ་ལེགས་སོ་ལེགས་སོ། །​ཀྱེ་རྒྱལ་བའི་སྲས་བདག་ཅག་ཀྱང་མིང་ཆོས་ཀྱི་བློ་གྲོས་ཞེས་བྱ་བ་ཤ་སྟག་སྟེ། འཇིག་རྟེན་གྱི་ཁམས་ཆོས་ཀྱི་སྤྲིན་ཅེས་བྱ་བ་དག་ནས་དེ་བཞིན་གཤེགས་པའི་མཚན་ཆོས་ཀྱི་བློ་གྲོས་བཟང་པོ་ཞེས་བྱ་བ་ཤ་སྟག་གི་ཐད་ནས་འདིར་ཕྱིན་ཏོ། །​སངས་རྒྱས་ཀྱི་བྱིན་གྱི་རླབས་ཀྱིས་དེ་དག་ཐམས་ཅད་དུ་ཆོས་བསྟན་པ་འདི་བྱུང་སྟེ། འཁོར་འདི་ལྟ་བུ་དག་གི་ནང་དུ་ཚིག་འབྲུ་འདི་དག་གིས་དོན་འདི་ཉིད་སྟོན་ཏེ། ལྷག་ཆད་མེད་དོ། །​ཀྱེ་རྒྱལ་བའི་སྲས་བདག་ཅག་ནི་ཁྱོད་ཀྱི་དབང་དུ་གྱུར་ཏེ། སངས་རྒྱས་ཀྱི་མཐུས་འཇིག་རྟེན་གྱི་ཁམས་འདིར་ཕྱིན་ཏོ། །​བདག་ཅག་ཇི་ལྟར་འཇིག་རྟེན་གྱི་ཁམས་འདིར་ཕྱིན་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་ཐམས་ཅད་དུ་རི་རབ་ཀྱི་རྩེ་མོར་ལྷའི་དབང་པོའི་ཁང་པ་རྣམས་སུ་ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་ཕྱིན་པར་གྱུར་ཏོ།​། །​།བམ་པོ་གཉིས་པ། དེ་ནས་སངས་རྒྱས་ཀྱི་མཐུས་བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས་ཕྱོགས་བཅུར་རྣམ་པར་བལྟས་ཏེ། ཐམས་ཅད་དང་ལྡན་པའི་འཁོར་དང་། ཆོས་ཀྱི་དབྱིངས་ལ་ཡང་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །​རང་བྱུང་ཤིན་ཏུ་རྣམ་དག་བློ་མངའ་བ། །​མཛེས་ཤིང་གཟུགས་ཀྱི་སྟོབས་དང་ལྡན་གྱུར་པ། །​བསྙེན་དཀའ་མཚན་གྱིས་བརྒྱན་པ་མཐོང་གྱུར་ནས། །​བྱང་ཆུབ་དོན་དུ་བརྟན་པ་སེམས་འཇོག་བྱེད། །​དོ་ཟླ་མེད་པའི་རྫུ་འཕྲུལ་སྟོབས་རྣམས་དང་། །​ཀུན་བརྗོད་བཟང་དང་རྗེས་སུ་བསྟན་པ་དང་། །སྡུག་བསྔལ་བཟོད་རླག་འཇིག་རྟེན་འགྲོ་མཐོང་ནས། །​བྱང་ཆུབ་དོན་དུ་བརྟན་པ་སེམས་འཇོག་བྱེད། །​ཡོན་ཏན་ཀུན་གྱི་འབྱུང་གནས་དེ་བཞིན་གཤེགས། །​ཀུན་དུ་བཟང་པོའི་ཡོན་ཏན་ཐོས་གྱུར་ནས། །​ནམ་མཁའི་དབྱིངས་འདྲ་འགྱུར་བ་མེད་པ་ཡི། །​བྱང་ཆུབ་དོན་དུ་བརྟན་པ་སེམས་འཇོག་བྱེད།



The English translation of this folio by 84000 - Translating the words of the Buddha can be found at:
https://read.84000.co/translation/toh145.html?part=UT22084-057-004-2619#UT22084-057-004-2619