Degé Kangyur volume 57, F.44.b

ཉོན་མོངས་པ་རྒྱུ་བ་རྟོགས་པར་བྱ་བ་ལ་མཁས་པ་ཡིན། བག་ཆགས་ཀྱི་མཚམས་སྦྱོར་བ་རྟོགས་པར་བྱ་བ་ལ་མཁས་པ་ཡིན། སྤྱོད་ཡུལ་ལ་སྦྱོར་བ་རྟོགས་པར་བྱ་བ་ལ་མཁས་པ་ཡིན། ཆོས་ཉིད་རྟོགས་པར་བྱ་བ་ལ་མཁས་པ་ཡིན། ཉེ་བར་སྤྱད་པ་རྟོགས་པར་བྱ་བ་ལ་མཁས་པ་ཡིན། འཇིག་རྟེན་གྱི་ཁམས་རྣམ་པར་དབྱེ་བ་རྟོགས་པར་བྱ་བ་ལ་མཁས་པ་ཡིན། སྔོན་གྱི་མཐའ་དང་ཕྱི་མའི་མཐའ་དང་། ད་ལྟར་བྱུང་བ་ཤེས་པ་རྟོགས་པར་བྱ་བ་ལ་མཁས་པ་ཡིན། ཀུན་རྫོབ་ཀྱི་བདེན་པ་ལ་ངེས་པར་རྟོགས་པ་རྟོགས་པར་བྱ་བ་ལ་མཁས་པ་ཡིན་ཏེ། ཀྱེ་རྒྱལ་བའི་སྲས་དག་འདི་ནི་རྒྱལ་ཚབ་ཀྱི་བྱང་ཆུབ་སེམས་དཔའོ། །​ཀྱེ་རྒྱལ་བའི་སྲས་དག་རྒྱལ་ཚབ་ཀྱི་བྱང་ཆུབ་སེམས་དཔའ་དེ་ལ་གནས་བཅུ་ཡང་དག་པར་བརྗོད་པར་བྱ་སྟེ། བཅུ་གང་ཞེ་ན། འདི་ལྟ་སྟེ། རྒྱལ་པོའི་ཕོ་བྲང་འཁོར་ལ་མཁས་པ་ཡང་དག་པར་བརྗོད་པར་བྱའོ། །​རྒྱལ་པོའི་ཕོ་བྲང་འཁོར་ཀུན་དུ་སྤྱད་པ་དང་། རྒྱལ་པོའི་ཕོ་བྲང་འཁོར་དུ་འཇུག་པ་དང་། རྒྱལ་པོའི་ཕོ་བྲང་འཁོར་དུ་རྣམ་པར་དཔྱད་པ་དང་། ཆོས་ཀྱི་རྒྱལ་པོའི་དབང་བསྐུར་བ་དང་། ཆོས་ཀྱི་རྒྱལ་པོའི་བྱིན་གྱི་རླབས་དང་། ཆོས་ཀྱི་རྒྱལ་པོའི་ཕ་རོལ་གནོན་པ་དང་། ཆོས་ཀྱི་རྒྱལ་པོའི་གནས་དང་། ཆོས་ཀྱི་རྒྱལ་པོའི་བཀའ་ལུང་ཡང་དག་པར་བརྗོད་པར་བྱའོ། །​དེ་ཅིའི་ཕྱིར་ཞེ་ན། འདི་ལྟར་དེའི་སེམས་ཤས་ཆེར་ཆོས་ཐམས་ཅད་ལ་སྒྲིབ་པ་མེད་པར་བསྒྲུབ་པ་ལ་འཇུག་ཅིང་གོང་དུ་གནས་གང་དག་ཐོས་པའི་གནས་དེ་དག་ལ་ཡང་བདག་ཉིད་སྒྲུབ་ཀྱི་གཞན་གྱི་དྲིང་ལ་མི་འཇོག་པ་ཐོབ་པའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་རྒྱལ་ཚབ་ཀྱི་བྱང་ཆུབ་སེམས་དཔའ་རྣམ་པར་གཞག་པའོ། །​ཀྱེ་རྒྱལ་བའི་སྲས་དག་དེ་ལ་དབང་བསྐུར་བ་ཐོབ་པའི་བྱང་ཆུབ་སེམས་དཔའ་རྣམ་པར་གཞག་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་དབང་བསྐུར་བ་ཐོབ་པའི་བྱང་ཆུབ་སེམས་དཔའ་ནི་ཤེས་པ་མངོན་པར་སྒྲུབ་པ་བཅུ་དང་ལྡན་པ་ཡིན་ཏེ། བཅུ་གང་ཞེ་ན། འདི་ལྟ་སྟེ། འཇིག་རྟེན་གྱི་ཁམས་གྲངས་མེད་པ་རབ་ཏུ་གཡོ་བར་བྱེད་པ་མང་བ་ཡིན། འཇིག་རྟེན་གྱི་ཁམས་གྲངས་མེད་པ་བྱིན་གྱིས་རློབ་པ་མང་བ་ཡིན། འཇིག་རྟེན་གྱི་ཁམས་གྲངས་མེད་པ་སེམས་གཅིག་གིས་འདའ་བར་བྱེད་པ་མང་བ་ཡིན།



The English translation of this folio by 84000 - Translating the words of the Buddha can be found at:
https://read.84000.co/translation/toh145.html?part=UT22084-057-004-2613#UT22084-057-004-2613