Degé Kangyur volume 55, F.225.a

།པད་མའི་དཔལ་གྱི་སྙིང་པོ་དེ་ལྟར་རྒྱལ་པོ་དཔལ་གྱི་གཟི་བརྗིད་ཀྱི་གཡས་ཕྱོགས་སུ་བྱུང་བའི་ཁྱེའུ་གང་ཡིན་པ་དེས་རྒྱལ་པོ་དཔལ་གྱི་གཟི་བརྗིད་དེ་ལ་ཚིགས་སུ་བཅད་དེ་སྨྲས་པ། གྲོགས་པོ་ཆོས་ཀུན་སྟོང་པ་ཡི། །​མིང་ནི་འདྲི་བར་བྱེད་དམ་ཅི། །​ཆོས་རྣམས་ཐམས་ཅད་མིང་མེད་ན། །​གང་གི་མིང་ནི་འདྲི་བར་བྱེད། །​སྟོང་ཉིད་གང་ལའང་ལྷ་མེད་ཅིང་། །​ཀླུ་མེད་སྲིན་པོ་ཡོང་མ་ཡིན། །​མིའམ་མི་མ་ཡིན་ཡང་རུང་། །​ཐམས་ཅད་དེ་ན་ཡོང་མེད་དོ། །​པད་མའི་དཔལ་གྱི་སྙིང་པོ་དེ་ནས་ཁྱེའུ་ཅིག་ཤོས་དེས་རྒྱལ་པོ་དཔལ་གྱི་གཟི་བརྗིད་དེ་ལ་ཚིགས་སུ་བཅད་དེ་སྨྲས་པ། མིང་ནི་མིང་གིས་སྟོང་པ་སྟེ། །​མིང་ལ་མིང་ནི་ཡོད་མ་ཡིན། །​ཆོས་རྣམས་ཐམས་ཅད་མིང་མེད་དེ། །​འོན་ཀྱང་མིང་གིས་ཡོངས་སུ་བརྗོད། །​མིང་གི་རང་བཞིན་གང་ཡིན་པ། །​དེ་ནི་མ་མཐོང་མ་ཐོས་སོ། །​ལས་ཀྱིས་འགགས་པ་མ་ཡིན་ན། །​འདི་ན་གང་གི་མིང་ཞིག་འདྲི། །​ཐ་སྙད་དུ་ནི་མིང་བྱས་ནས། །མིང་བཏགས་བྱས་ཏེ་བསྟན་པ་ནི། །​ཁོ་བོའི་མིང་ནི་རིན་ཆེན་སེམས། །​ཅིག་ཤོས་རིན་ཆེན་མཆོག་ཅེས་བྱ། པད་མའི་དཔལ་གྱི་སྙིང་པོ་དེ་ལྟར་ཁྱེའུ་གཉིས་ཀྱིས་ཚིགས་སུ་བཅད་པ་འདི་དག་སྨྲས་ཏེ་མངོན་པར་ཤེས་པ་ལྔ་བསྒྲུབས་ནས། རྒྱལ་པོ་དཔལ་གྱི་གཟི་བརྗིད་དེ་དང་ལྷན་ཅིག་ཏུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འོད་སེང་གེ་རྣམ་པར་རོལ་པའི་རྒྱལ་པོ་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཐལ་མོ་སྦྱར་ཏེ་ཕྱོགས་གཅིག་ཏུ་འཁོད་དོ། །​པད་མའི་དཔལ་གྱི་སྙིང་པོ་དེ་ལྟར་ཁྱེའུ་དེ་གཉིས་ཀྱིས་དབྱངས་གཅིག་ཏུ་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། པད་མ་དག་དང་དྲི་བདའ་དང་། །​མེ་ཏོག་ཕྲེང་དང་ན་བཟའ་དང་། །​འོན་ཏེ་ཟས་དང་སྐོམ་གྱིས་སམ། །​རྒྱལ་བ་ཇི་ལྟར་མཆོད་པར་བགྱི། །​རྫོགས་པའི་སངས་རྒྱས་རྐང་གཉིས་གཙོ། །​ཇི་ལྟར་མཆོད་པར་འགྱུར་བ་ལགས། །​དོན་འདི་ལེགས་པར་བསྟན་དུ་གསོལ། །​འདྲེན་པ་ཐོས་ནས་འཚལ་བར་བགྱི། །​པད་མའི་དཔལ་གྱི་སྙིང་པོ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་ཁྱེའུ་དེ་གཉིས་ལ་ཚིགས་སུ་བཅད་དེ་བཀའ་སྩལ་པ།



The English translation of this folio by 84000 - Translating the words of the Buddha can be found at:
https://read.84000.co/translation/toh130.html?part=UT22084-055-004-281#UT22084-055-004-281