Degé Kangyur volume 55, F.205.b

།ཉེ་བར་ཞི་བའི་བྱིན་གྱི་རླབས་ནི་བྱིས་པ་སོ་སོའི་སྐྱེ་བོ་ཐམས་ཅད་ཤིན་ཏུ་ཞི་བ་དང་། ཉེ་བར་ཞི་བ་དང་རབ་ཏུ་ཞི་བ་སྟེ། ཉེ་བར་ཞི་བའི་བྱིན་གྱི་རླབས་ཐོབ་པར་ཡང་དག་པར་རྗེས་སུ་མཐོང་བ་དེ་ནི་ཉེ་བར་ཞི་བའི་བྱིན་གྱི་རླབས་ཞེས་བྱའོ། །​གང་གདེག་པ་མེད་པ་དང་གཞག་པ་མེད་པའི་ཚུལ་གྱིས་གཟུགས་ལ་ཆོས་ཀྱི་དབྱིངས་དང་དབྱེར་མེད་པར་ཤེས་ཤིང་སྤྲོས་པ་དང་བྲལ་བའི་ཤེས་རབ་ཀྱིས་ཤིན་ཏུ་ཞི་བ་དང་ཉེ་བར་ཞི་བ་དང་། སྤྲོས་པ་མེད་པའི་ཆོས་ཐམས་ཅད་ཕུང་པོ་དང་ཁམས་དང་སྐྱེ་མཆེད་ཐམས་ཅད་ལ་ཐམས་ཅད་མཁྱེན་པ་ཉིད་དུ་བྱིན་གྱིས་རློབ་པ་དེ་ནི་ཤེས་རབ་ཀྱི་བྱིན་གྱི་རླབས་ཞེས་བྱའོ། །​ཡང་ན་བྱིན་གྱི་རླབས་ཞེས་བྱ་བ་དེ་ནི་ཐམས་ཅད་མཁྱེན་པའི་རྗེས་སུ་འགྲོ་བ་ནི་ཤེས་རབ་ཀྱི་གནས་ཏེ། དེའི་ཕྱིར་བདག་གིས་ལུས་འདོམ་གང་ཙམ་པོ་འདི་ལ་འཇིག་རྟེན་གདགས་པར་བྱའོ། །​འཇིག་རྟེན་ཀུན་འབྱུང་བ་དང་འཇིག་རྟེན་འགོག་པ་དང་འཇིག་རྟེན་འགོག་པར་འགྲོ་བའི་ལམ་དང་། ཐམས་ཅད་མཁྱེན་པའི་ཡེ་ཤེས་ཀྱི་བར་ཡང་གདགས་པར་བྱའོ་སྙམ་པ་སྟེ། དེ་ནི་ཤེས་རབ་ཀྱི་བྱིན་གྱི་རླབས་ཞེས་བྱའོ། །​དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །​བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་དག་པའི་ཡེ་ཤེས་ཀྱི་སྟོབས་དུ་ཞིག་དང་ལྡན་ན་རབ་ཏུ་ཞི་བའི་རྣམ་པར་ངེས་པའི་ཆོ་འཕྲུལ་གྱི་ཏིང་ངེ་འཛིན་འདི་འཐོབ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །​འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་དག་པའི་ཡེ་ཤེས་ཀྱི་སྟོབས་སུམ་ཅུ་རྩ་དྲུག་དང་ལྡན་ན་རབ་ཏུ་ཞི་བའི་རྣམ་པར་ངེས་པའི་ཏིང་ངེ་འཛིན་འདི་འཐོབ་སྟེ། སུམ་ཅུ་རྩ་དྲུག་གང་ཞེ་ན། འདི་ལྟ་སྟེ། ལྷག་པའི་བསམ་པ་རྣམ་པར་དག་པའི་ཡེ་ཤེས་ཀྱི་སྟོབས་དང་། སྨོན་ལམ་རྣམ་པར་དག་པའི་ཡེ་ཤེས་ཀྱི་སྟོབས་དང་། དགེ་བའི་རྩ་བ་རྣམ་པར་དག་པའི་ཡེ་ཤེས་ཀྱི་སྟོབས་དང་། ཡོངས་སུ་བསྔོ་བ་རྣམ་པར་དག་པའི་ཡེ་ཤེས་ཀྱི་སྟོབས་དང་། ཐོས་པ་རྣམ་པར་དག་པའི་ཡེ་ཤེས་ཀྱི་སྟོབས་དང་། ལས་ཀྱི་སྒྲིབ་པ་རྣམ་པར་དག་པའི་ཡེ་ཤེས་ཀྱི་སྟོབས་དང་། ཆོ་ག་དང་སྤྱོད་ཡུལ་རྣམ་པར་དག་པའི་ཡེ་ཤེས་ཀྱི་སྟོབས་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh129.html?part=UT22084-055-003-637#UT22084-055-003-637