།དེས་དེ་ལྟར་སོ་སོར་བརྟགས་ན་དགེ་བའི་རྩ་བ་ཡང་མ་དམིགས་ནས། ཅི་དགེ་བའི་རྩ་བ་རྣམས་གཟུགས་ཀྱིས་བསགས་པ་ཞིག་གམ། འོན་ཏེ་ཚོར་བ་དང་འདུ་ཤེས་དང་འདུ་བྱེད་དང་། རྣམ་པར་ཤེས་པས་སམ། གཟུགས་ནི་བེམས་པོ། གཡོ་བ་མེད་པ། སེམས་པ་མེད་པ་སྟེ། དེས་ཀྱང་དགེ་བའི་རྩ་བ་མ་བསགས། ཚོར་བ་ནི་ཆུའི་ཆུ་བུར་ལྟ་བུ་ངན་པ། རྟེན་ཅིང་འབྲེལ་པར་བྱུང་བ། རེག་པ་འདུས་པ་ལས་བྱུང་བ་སྟེ། དེས་ཀྱང་དགེ་བའི་རྩ་བ་མ་བསགས། འདུ་ཤེས་ནི་སྨིག་རྒྱུ་ལྟ་བུ། མིག་དང་གཟུགས་དང་། སྣང་བ་དང་། ཡིད་ལ་བྱེད་པ་འདུས་པ་ལས་བྱུང་བ་སྟེ། དེས་ཀྱང་དགེ་བའི་རྩ་བ་མ་བསགས། འདུ་བྱེད་ནི་དངོས་པོ་མེད་པ། བརྫུན་པ། སླུ་བའི་ཆོས་ཅན་མ་རིག་པ་འདུས་པ་ལས་བྱུང་བ་སྟེ། དེ་དག་གིས་ཀྱང་དགེ་བའི་རྩ་བ་མ་བསགས། རྣམ་པར་ཤེས་པ་ནི་སྒྱུ་མ་ལྟ་བུ། གསོབ་གསོག་ཡང་དག་པ་མ་ཡིན་པ། འདུ་བྱེད་འདུས་པ་ལས་ངེས་པར་སྐྱེས་པ། ཚུལ་བཞིན་མ་ཡིན་པ་ཡིད་ལ་བྱེད་པ་འདུས་པ་ལས་བྱུང་བ་སྟེ། དེས་ཀྱང་དགེ་བའི་རྩ་བ་མ་བསགས་སོ་སྙམ་ནས་དེས་དེ་ལྟར་བརྟགས་པ་དང་། གང་གིས་དགེ་བའི་རྩ་བ་བསགས་པ་དེ་མི་དམིགས་སོ། །དེས་དེ་ལྟར་བརྟགས་ན་མི་དམིགས་ཏེ། མི་དམིགས་སོ་སྙམ་པའི་རློམ་སེམས་ཀྱང་མེད་དོ། །གང་བྱང་ཆུབ་ཀྱི་སྙིང་པོ་ལ་འདུག་པ་དེ་ཡང་མི་དམིགས་ཏེ། མི་དམིགས་སོ་སྙམ་པའི་རློམ་སེམས་ཀྱང་མེད་དོ། །དེས་བྱང་ཆུབ་ཀྱང་མི་དམིགས་ཏེ། མི་དམིགས་སོ་སྙམ་པའི་རློམ་སེམས་ཀྱང་མེད་དོ། །འདི་ལ་སུ་ཞིག་མངོན་པར་རྫོགས་པར་འཚང་རྒྱ་བ་དེ་ཡང་མི་དམིགས་ཏེ། མི་དམིགས་སོ་སྙམ་པའི་རློམ་སེམས་ཀྱང་མེད་དོ། །དེས་དེ་ལྟར་སོ་སོར་བརྟགས་ནས་བྱང་ཆུབ་ཀྱི་རློམ་སེམས་ཀྱང་མེད། སེམས་ཅན་གྱི་རློམ་སེམས་ཀྱང་མེད། སངས་རྒྱས་ཀྱི་ཡེ་ཤེས་ཀྱི་རློམ་སེམས་ཀྱང་མེད་པ་དེ་བཟང་སྐྱོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྟེ། དེ་ཆོས་གང་ལ་ཡང་རློམ་སེམས་མེད་དོ། །དེ་ཅིའི་ཕྱིར་ཞེ་ན། དེ་ཆོས་གང་ཡང་སྐྱེ་བ་ཡང་མི་མཐོང་། འགག་པ་ཡང་མི་མཐོང་སྟེ། ཡང་དག་པ་ཇི་ལྟ་བ་བཞིན་དུ་ཞི་བའི་གནས་ཁོང་དུ་ཆུད་པས་དེའི་ཕྱིར་སངས་རྒྱས་ཞེས་བྱ་སྟེ།