ཡང་དག་པའི་བསྔགས་པ་ལ་མི་ཆགས་པ་དང་ཡང་དག་པ་མ་ཡིན་པའི་བརྗོད་པ་དང་དུ་ལེན་པ་དང་། སྤྱོད་ཡུལ་མ་ཡིན་པ་རྣམ་པར་སྤོང་བ་དང་སྤྱོད་ཡུལ་ལ་འཇུག་པ་དང་། ཆོ་ག་ཕུན་སུམ་ཚོགས་པ་དང་མི་ཚུལ་བ་རྣམ་པར་སྤོང་བ་དང་། སེམས་ཅན་གྱི་དགེ་བའི་རྩ་བ་ཆུང་ངུ་ལ་མི་སྨོད་པ་དང་བསྟན་པ་ཀུན་ཏུ་སྲུང་བ་དང་། སྨྲ་བ་ཉུང་བ་དང་མཉེན་པ་དང་སྐབས་ཀྱི་ཚིག་ལ་མཁས་པ་དང་། ཕྱིར་རྒོལ་བ་ཚར་གཅོད་པ་དང་དུས་སུ་འགྲོ་བ་དང་སྤྱོད་ལམ་བརྟགས་པ་མ་ཡིན་པ་དང་། སྤྱོད་ལམ་མཛེས་པ་དང་དོན་དང་དོན་མ་ཡིན་པ་ཤེས་པ་ལ་མཁས་པ་དང་། འཇིག་རྟེན་ཤེས་པ་དང་བསྟན་བཅོས་ཤེས་པ་དང་། གསལ་བར་སྨྲ་བ་དང་ལག་རྐྱོང་བ་དང་སེམས་ཤིན་ཏུ་འཛིན་པ་དང་། ཁྲེལ་ཡོད་པ་དང་ངོ་ཚ་ཤེས་པ་དང་མི་དགེ་བའི་སེམས་ལ་སྨོད་པ་དང་སྦྱངས་པའི་ཡོན་ཏན་མི་གཏོང་བ་དང་སྤྱོད་པ་ཡང་དག་པར་འཛིན་པ་དང་། མཛེས་པར་ཀུན་ཏུ་རྒྱུ་བ་དང་བླ་མ་ལ་ལྡང་བ་དང་སྟན་གདིང་བ་དང་། ང་རྒྱལ་ཚར་གཅོད་པ་དང་སེམས་ཡང་དག་པར་འཛིན་པ་དང་། དོན་རབ་ཏུ་རྟོགས་པ་ཤེས་པ་དང་ཡེ་ཤེས་བསྐྱེད་པ་དང་མི་ཤེས་པ་དང་བྲལ་བ་དང་སེམས་ལ་འཇུག་ཤེས་པ་དང་། སེམས་ཀྱི་ངོ་བོ་ཉིད་ཁོང་དུ་ཆུད་ཅིང་ཤེས་པ་དང་། སྒྲུབ་པ་དང་མི་བསྒྲུབ་པ་སྒྲུབ་པ་ལ་མཁས་པའི་ཡེ་ཤེས་དང་ལྡན་པ་དང་། སེམས་ཅན་ཐམས་ཅད་ཀྱི་སྐད་ཤེས་པ་དང་། ངེས་པའི་ཚིག་རྣམ་པར་གཞག་པ་ཤེས་པ་དང་དོན་རྣམ་པར་ངེས་པ་ཤེས་པ་དང་། དོན་མ་ཡིན་པ་རྣམ་པར་སྤོང་བ་དང་། བསམ་གཏན་རྣམས་སྒྲུབ་པ་དང་། དེ་དག་གི་རོ་མྱོང་བར་མི་བྱེད་པ་དང་སེམས་ཅན་ཐམས་ཅད་ཀྱི་སེམས་ལ་རྣམ་པར་ལྟ་ཞིང་སོ་སོར་རྟོག་པ་དང་། སེམས་ཅན་གྱི་དབང་པོ་མཆོག་དང་མཆོག་མ་ཡིན་པ་ཤེས་པ་དང་། གནས་དང་གནས་མ་ཡིན་པ་ལ་རྣམ་པར་ལྟ་བ་དང་། ལས་ཐམས་ཅད་འབྱེད་པ་དང་། ལས་དང་རྣམ་པར་སྨིན་པ་མེད་པ་ལ་འཇུག་པ་ཤེས་པ་དང་། མོས་པ་སྣ་ཚོགས་ལ་འཇུག་པ་དང་བརྗེད་ངས་པ་མེད་པ་དང་ཁམས་སྣ་ཚོགས་དང་། ཁམས་དུ་མ་མངོན་སུམ་དུ་གྱུར་པ་དང་རྡོ་རྗེ་ལྟ་བུའི་ཏིང་ངེ་འཛིན་ཀུན་ཏུ་མཐོང་བ་དང་། ཚངས་པའི་དབྱངས་ཀྱིས་ཏིང་ངེ་འཛིན་ལ་རྣམ་པར་རྩེན་པ་དང་།