།བལྟར་མེད་པའོ། །མཐའ་ཡས་པའོ། །སྤྲིན་དང་མཚུངས་པའོ། །དེ་ལྟ་མོད་ཀྱི་འོན་ཀྱང་སེམས་ཅན་རྣམས་སྔོན་དགེ་བའི་རྩ་བའི་སྟོབས་བསྐྱེད་པ་དང་། དེ་བཞིན་གཤེགས་པའི་སྔོན་གྱི་སྨོན་ལམ་དང་། སྤྱོད་པའི་བྱིན་གྱི་རླབས་ཀྱིས་དེ་བཞིན་གཤེགས་པ་མཐོང་ངོ་། །ངེས་པར་སེམས་སོ། །ཀུན་ཏུ་འདྲིའོ། །གང་དག་ཇི་ལྟར་དབང་པོ་ཡོངས་སུ་སྨིན་པའི་སེམས་ཅན་རྣམས་དང་། གང་དག་ཇི་ལྟར་འདུལ་བ་དེ་དག་གིས་དེ་བཞིན་གཤེགས་པ་དེ་ལྟར་གསུང་འབྱིན་པར་ཤེས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་མ་སྐྱེས་མ་འགགས་པའི་ཕྱིར་རོ། །གང་ཆོས་ཐམས་ཅད་ཀྱི་རང་བཞིན་མི་མཐོང་བ་དེ་ནི་དེ་བཞིན་གཤེགས་པ་མཐོང་བའོ། །གང་ཆོས་གང་ཡང་མི་མཐོང་བ་དེ་ནི་དེ་བཞིན་གཤེགས་པ་མཐོང་བའོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པ་ནི་ཆོས་ཐམས་ཅད་སྤངས་པ་སྟེ། ཆོས་གང་གིས་ཀྱང་བརྗོད་པ་ཡང་མ་ཡིན། མི་བརྗོད་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་དམིགས་སུ་མེད་པའི་ཕྱིར་རོ། །གང་ཆོས་ཐམས་ཅད་དང་ཆོས་མ་ཡིན་པ་རྣམས་དང་འདུས་བྱས་རྣམས་དང་འདུས་མ་བྱས་པ་རྣམས་མི་དམིགས་པ་དེ་ནི་དེ་བཞིན་གཤེགས་པ་མཐོང་བའོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པ་ནི་ཆོས་ཐམས་ཅད་སྤངས་པ་སྟེ། ཆོས་གང་ཡང་ཁས་མི་ལེན་ཏོ། །ཉེ་བར་མི་ལེན་ཏོ། །ཆོས་སུ་བཏགས་པ་ཡང་མི་འགྲོའོ། །འཇམ་དཔལ་ཆོས་ཐམས་ཅད་ཤིན་ཏུ་འགག་པ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏེ། ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་མཐོང་བ་དེ་བཞིན་གཤེགས་པ་མཐོང་བའོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པ་ནི་ཆོས་གང་གིས་ཀྱང་མཐོང་བར་མི་འགྲོ་སྟེ། དེ་བཞིན་གཤེགས་པ་དེ་ལྟར་མཐོང་ན་ཆོས་ཐམས་ཅད་ནི་དེ་བཞིན་གཤེགས་པའོ་ཞེས་འཇུག་པར་འགྱུར་རོ། །ཆོས་ཐམས་ཅད་ནི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། མ་སྐྱེས་པ་དང་མ་འགགས་པའོ་ཞེས་འཇུག་པར་འགྱུར་རོ། །ཡུལ་མེད་པ་ཡུལ་དང་བྲལ་བ་ནི་དེ་བཞིན་གཤེགས་པའི་ཡུལ་ལོ་ཞེས་འཇུག་པར་འགྱུར་རོ།