Degé Kangyur volume 54, F.225.b

དཔེར་ན་གོས་ཡོངས་སུ་དག་པ་ལ་རྡུལ་གྱིས་རེག་ཀྱང་སྤྲུགས་མ་ཐག་ཏུ་དེ་མེད་པར་འགྱུར་བ་དེ་བཞིན་དུ་ཚངས་པའི་ལྷ་གང་དག་ཁ་ཅིག་ལུས་དང་སྲོག་ལ་མི་ལྟ་བ་དེ་དག་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཀུན་ཏུ་ཟིན་ཅིང་གནས་པར་མི་འགྱུར་རོ། །​དེ་བས་ན་ཚངས་པའི་ལྷ་བདག་ཅག་ཀྱང་ལུས་དང་སྲོག་ལ་མི་བལྟ་བར་བྱའོ། །​ཚངས་པའི་ལྷ་གལ་ཏེ་བདག་ཅག་ལུས་དང་སྲོག་ལ་མ་བལྟས་ན་བདག་ཅག་ཡོངས་སུ་ཟག་པ་འབྱུང་བ་དེས་སེམས་ཟིན་ནས་གནས་པར་མི་འགྱུར་རོ། །​ཀྱེ་ཚངས་པའི་ལྷ་ལུས་དང་སྲོག་ལ་ལྟ་བ་དང་བཅས་པའི་བརྟུལ་ཞུགས་འགྲུབ་བོ་ཞེས་སངས་རྒྱས་བཅོམ་ལྡན་འདས་རྣམས་ཀྱིས་བཀའ་མ་སྩལ་ཏོ། །​དེ་ནས་དྲང་སྲོང་ཚངས་པའི་ལྷ་ལ་དྲང་སྲོང་མེས་བྱིན་གྱིས་ལུས་དང་སྲོག་ལ་མི་ལྟ་བ་བསྟན་པས་ལུས་དང་སྲོག་ལ་མི་ལྟ་བ་རྙེད་དོ། །​དེ་ནས་རྒྱལ་པོ་སྡེ་མི་ཕམ་པས་ཆོམ་རྐུན་དེ་དག་ཚོལ་ཞིང་ནགས་སྟུག་པོ་དེར་ཕྱིན་ཏེ། རྒྱལ་པོ་སྡེ་མི་ཕམ་པས་ནགས་སྟུག་པོའི་ནང་ན་དྲང་སྲོང་དེ་དག་གནས་པ་མཐོང་ངོ་། །​མཐོང་ནས་དྲང་སྲོང་དེ་དག་ག་ལ་བ་དེར་སོང་སྟེ། མི་ཁ་ཅིག་ནགས་སྟུག་པོ་དེར་ཆོམ་རྐུན་ཚོལ་དུ་བཀྱེའོ། །​དེ་ནས་རྒྱལ་པོ་སྡེ་མི་ཕམ་པས་དྲང་སྲོང་དེ་དག་གི་རྐང་པ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །​ཕྱོགས་གཅིག་ཏུ་འདུག་ནས་རྒྱལ་པོ་སྡེ་མི་ཕམ་པས་དྲང་སྲོང་དེ་གཉིས་ལ་འདི་སྐད་ཅེས་སྨྲས་སོ། །​དྲང་སྲོང་ཁྱེད་གཉིས་ཀྱིས་ཆོམ་རྐུན་ནགས་སྟུག་པོ་འདིའི་ནང་དུ་འོངས་པའམ་ཕྱིར་བྱུང་བ་ལྟ་མཐོང་ངམ། དེ་སྐད་ཅེས་སྨྲས་པ་དང་། དྲང་སྲོང་དེ་གཉིས་ཀྱིས་རྒྱལ་པོ་སྡེ་མི་ཕམ་པ་ལ་འདི་སྐད་ཅེས་སྨྲས་སོ། །རྒྱལ་པོ་བདག་ཅག་གིས་བདག་ཉིད་ཀྱང་མི་མཐོང་ན་ཆོམ་རྐུན་ལྟ་ག་ལ་མཐོང་། རྒྱལ་པོ་སྡེ་མི་ཕམ་པ་དང་དྲང་སྲོང་དེ་དག་གཏམ་འདི་བྱས་པ་དང་། རྒྱལ་པོའི་མི་དེ་དག་གིས་ཆོམ་རྐུན་དེ་དག་ཟིན་ཏེ། དེ་དག་གིས་དེ་དག་ཟིན་ནས་རྒྱལ་པོ་སྡེ་མི་ཕམ་པ་ག་ལ་བ་དེར་འོངས་ཏེ་ཕྱིན་ནས་འདི་སྐད་ཅེས་སྨྲས་སོ། །​ཆོམ་རྐུན་དེ་དག་བཟུང་སྟེ་མཆིས་པ་འདི་ལགས་ཞེས་བྱས་སོ། །​དེ་ནས་རྒྱལ་པོ་སྡེ་མི་ཕམ་པས་དྲང་སྲོང་དེ་གཉིས་ཀྱིས་སྨྲས་པའི་དོན་ཁོང་དུ་མ་ཆུད་ནས་དྲང་སྲོང་དེ་གཉིས་ལ་སྨྲས་པ། ཁྱེད་ནི་བརྫུན་ཟེར་བ་ཡིན་ཏེ། དྲང་སྲོང་མ་ཡིན་ནོ་ཞེས་དེ་གཉིས་ཀྱི་རྐང་པ་དང་ལག་པ་གཅོད་དུ་བཅུག་གོ།



The English translation of this folio by 84000 - Translating the words of the Buddha can be found at:
https://read.84000.co/translation/toh124.html?part=UT22084-054-005-1059#UT22084-054-005-1059