Degé Kangyur volume 54, F.225.a

ནགས་ཐིབས་པོ་ནས་ཐིབས་པོར་རྒྱུའོ། །​འཇམ་དཔལ་དེའི་དུས་ན་རྒྱལ་པོ་སྡེ་མི་ཕམ་པ་ཞེས་བྱ་བ་ཞིག་ཡོད་དེ། དེ་རྒྱལ་པོར་དབང་བསྐུར་བའི་ཚེ་ཁྱིམ་གྱི་གནས་ནས་མངོན་པར་བྱུང་བ་རྣམས་རྩྭ་དང་། ཤིང་དང་ཆུ་ལ་ཅི་བདེར་སྤྱོད་དུ་གནང་སྟེ། རྗེས་སུ་ཡི་རང་ངོ་ཞེས་ཚིག་དེ་སྐད་ཅེས་སྨྲས་པས། དྲང་སྲོང་དེ་གཉིས་ཀྱང་རྒྱལ་པོ་སྡེ་མི་ཕམ་པའི་ཡུལ་ཁམས་ན་གནས་སོ། །​དེའི་ཚེ་རྒྱལ་པོ་སྡེ་མི་ཕམ་པ་ལ་ཆོམ་རྐུན་ནོར་འཕྲོག་པས་གནོད་པའི་ལས་བྱས་ཏེ་བྲོས་པ་དང་། དྲང་སྲོང་དེ་དག་གིས་ཆོམ་རྐུན་བྲོས་པ་མཐོང་ངོ་། །​ཆོམ་རྐུན་དེ་དག་གིས་ཀྱང་དྲང་སྲོང་ནགས་ཀྱི་ནང་ན་གནས་པར་མཐོང་ནས་ཆོམ་རྐུན་དེ་དག་གིས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །​དྲང་སྲོང་ཁྱེད་ལ་བདག་ཅག་མཐོང་ངམ་ཞེས་ལ་ལ་ཞིག་གིས་དྲིས་ན་ཁྱེད་ཀྱིས་མ་སྟོན་ཅིག །​དེ་ནས་དྲང་སྲོང་ཚངས་པའི་ལྷས་དྲང་སྲོང་མེས་བྱིན་ལ་སྨྲས་པ། ཀྱེ་མའོ་མེས་བྱིན་བྱུང་བ་འདི་ནི་ཤིན་ཏུ་དཀའ་ན་ཇི་ལྟར་བྱ། གལ་ཏེ་འདི་མ་མཐོང་ངོ་ཞེས་སྨྲས་ན་ནི་གཞན་བསླུས་པར་འགྱུར། ཇི་སྟེ་བསྟན་ན་ནི་གནོད་པ་བྱས་པར་ཡང་འགྱུར་ན། འདི་ཇི་ལྟར་བྱ་ཁྱོད་སྨྲོས་ཤིག །​དེ་སྐད་ཅེས་སྨྲས་པ་དང་། དྲང་སྲོང་མེས་བྱིན་གྱིས་དྲང་སྲོང་ཚངས་པའི་ལྷ་ལ་འདི་སྐད་ཅེས་སྨྲས་སོ། །​ཀྱེ་ཚངས་པའི་ལྷ་འདི་ལ་གནོད་པར་འགྱུར་བར་མ་འཛིན་ཅིག །​དེ་ཅིའི་ཕྱིར་ཞེ་ན། ཚངས་པའི་ལྷ་གང་ལ་ལ་དག་ལུས་དང་སྲོག་ལ་ལྟ་བ་དང་བཅས་པར་གནས་པ་དེ་དག་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཟིན་ནས་འདུག་གོ། །​ཚངས་པའི་ལྷ་འདི་ལྟ་སྟེ། དཔེར་ན་གོས་སྣུམ་ཅན་ལ་རྡུལ་རེག་ན་ཆགས་པར་འགྱུར་བ་དེ་བཞིན་དུ་ཚངས་པའི་ལྷ་གང་དག་ཁ་ཅིག་ལུས་དང་སྲོག་ལ་ལྟ་བ་དང་བཅས་པར་གནས་པ་དེ་དག་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཀུན་ཏུ་ཟིན་ནས་འདུག་གོ། །ཚངས་པའི་ལྷ་གང་དག་ཁ་ཅིག་ལུས་དང་སྲོག་ལ་མི་ལྟ་བ་དེ་དག་ལ་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཀུན་ཏུ་ཟིན་ཅིང་འདུག་པར་མི་འགྱུར་རོ། །​ཚངས་པའི་ལྷ་འདི་ལྟ་སྟེ། དཔེར་ན་གོས་ཡོངས་སུ་དག་པ་ལ་རྡུལ་གྱིས་རེག་ཀྱང་སྤྲུགས་མ་ཐག་ཏུ་དེ་མེད་པར་འགྱུར་བ་དེ་བཞིན་དུ་ཚངས་པའི་ལྷ་གང་དག་ཁ་ཅིག་ལུས་དང་སྲོག་ལ་མི་ལྟ་བ་དེ་དག་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཀུན་ཏུ་ཟིན་ཅིང་གནས་པར་མི་འགྱུར་རོ།



The English translation of this folio by 84000 - Translating the words of the Buddha can be found at:
https://read.84000.co/translation/toh124.html?part=UT22084-054-005-1058#UT22084-054-005-1058