Degé Kangyur volume 54, F.292.a

།མཐའ་ཡས་བརྩོན་འགྲུས་དེ་བསྟོད་ནས། །​བསྐལ་བྱེ་ཁྲག་ཁྲིག་མཐའ་ཡས་པར། །​འགྲོ་བ་གཉིས་སུ་དེ་སྐྱེས་སོ། །​འདི་ནས་ལྷ་རིས་ང་སྐྱེས་ཏེ། །​རྟག་པར་ལྷ་ཡི་དབང་པོར་གྱུར། །​བྱེ་བ་མཐའ་ཡས་ལྷ་རྣམས་ལ། །​རྒྱལ་བའི་ཡེ་ཤེས་འཐོབ་པར་བསྟན། །​ལྷ་ཡི་གནས་ནས་ཤི་འཕོས་ཏེ། །​མི་ཡི་དབང་པོ་རྒྱལ་པོར་གྱུར། །​སེམས་ཅན་ཁྲག་ཁྲིག་མཐའ་ཡས་པ། །​རྒྱལ་བའི་ཡེ་ཤེས་ཐོབ་པར་བསྟན། །​དེ་དག་ང་ཡི་ཆོས་ཐོས་ནས། །​བསྟི་སྟང་མཚུངས་མེད་བསྐྱེད་ནས་སུ། །​སེམས་ནི་ཐམས་ཅད་ཉེར་གཞག་སྟེ། །​དྲི་མེད་སེམས་ཀྱིས་དེ་དག་ཉན། །​སེམས་ཅན་བྱེ་བ་མཐའ་ཡས་པ། །​བྱང་ཆུབ་མཆོག་ལ་ངེས་པར་གྱུར། །​ང་ཡི་ཚིག་ཐོས་རྟོགས་པ་ནི། །​སངས་རྒྱས་བྱང་ཆུབ་ངེས་པར་གྱུར། །​སངས་རྒྱས་བྱེ་བ་མཐའ་ཡས་པ། །​སངས་རྒྱས་ཞིང་གི་རྒྱ་བཤད་ཀྱང་། །​བསྐལ་པ་ཁྲག་ཁྲིག་མཐའ་ཡས་སུ། །​རྒྱ་ཆེན་བཤད་པ་མི་ཟད་དོ། །​སངས་རྒྱས་ཡོན་ཏན་གང་བརྗོད་དང་། །​དྲང་སྲོང་ཆེན་པོས་ཞིང་བསྔགས་པ། །​ཐམས་ཅད་རང་བཞིན་སྟོང་པར་བཤད། །​དེ་དག་མ་སྐྱེས་མི་འགག་བསྟན། །​གང་འདིར་སངས་རྒྱས་བསྔགས་པ་དང་། །​སངས་རྒྱས་ཡོན་ཏན་གང་བསྟན་དང་། །​བདེ་བར་གཤེགས་པས་ཞིང་བརྗོད་པ། །​གང་གིས་བཤད་པའང་དེ་དང་འདྲ། །​ཆོས་རྣམས་ཞི་བར་བདེ་གཤེགས་བཤད། །​ཞི་བའི་རང་བཞིན་དེ་མི་རྙེད། །​གང་ལ་བཤད་པ་དེ་ཡང་སྟོང་། །​འདི་ལ་མགོན་མེད་འགྲོ་བ་མྱོས། །​དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་མོ་བློ་གྲོས་མཐའ་ཡས་ཀྱིས་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་མཐའ་ཡས་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་ནས་བུད་མེད་ཀྱི་དབང་པོ་ལས་གྱུར་ཏེ། དེ་ཕྱིན་ཆད་བུད་མེད་ཀྱི་ལུས་སུ་མི་སྐྱེ་བར་གྱུར་ཏོ། །​འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་ཚད་མེད་པ་ཡོངས་སུ་སྦྱང་བར་འདོད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་བྱང་ཆུབ་སེམས་དཔའི་རྣམ་པར་ཐར་པ་སྒྲུབ་པའི་སྟོང་པ་ཉིད་སྒྲིབ་པ་མེད་པ་ལ་བསླབ་པར་བྱའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh124.html?part=UT22084-054-005-1192#UT22084-054-005-1192