Degé Kangyur volume 54, F.220.a

འཇམ་དཔལ་དེ་ཐམས་ཅད་ཀྱི་ཐ་མའི་རྡུལ་ཕྲ་རབ་ཀྱི་ཕུང་པོ་བཞག་པ་དེ་སྙེད་ཀྱི་འཇིག་རྟེན་གྱི་ཁམས་རབ་འབྱམ་གྱི་རྒྱ་ཇི་ཙམ་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པའི་བྱང་ཆུབ་ཀྱི་ཤིང་གི་རྒྱ་ཡང་དེ་ཙམ་མོ། །​བྱང་ཆུབ་ཀྱི་ཤིང་དེ་ནི་རིན་པོ་ཆེ་སྣ་བདུན་ཏེ། འབྲས་བུ་ནི་ཡིད་བཞིན་གྱི་ནོར་བུའོ། །​བྱང་ཆུབ་ཀྱི་ཤིང་དེའི་ཡལ་ག་ནི་ཐ་མའི་རྡུལ་ཕྲ་རབ་ཀྱི་རྡུལ་སྙེད་ཡོད་དོ། །​ཡལ་ག་གཅིག་ཅིང་ཡང་ཐ་མའི་རྡུལ་ཕྲ་རབ་ཀྱི་རྡུལ་སྙེད་ཀྱི་ཡལ་ག་ཕྲེའུ་ཡོད་དེ། ཡལ་ག་ཕྲེའུ་གཅིག་ཅིང་ཡང་ཐ་མའི་རྡུལ་ཕྲ་རབ་ཀྱི་རྡུལ་སྙེད་ཀྱི་འབྲས་བུ་ཡོད་དོ། །​འབྲས་བུ་རེ་རེ་ལ་ཡང་ཆ་ཤས་ནི་དཔག་ཏུ་མེད་དོ། །​འཇམ་དཔལ་བྱང་ཆུབ་ཀྱི་ཤིང་དེ་ནི་དེ་བཞིན་གཤེགས་པ་དོན་ཐམས་ཅད་གྲུབ་པའི་ལེགས་པར་སྤྱད་པའི་འབྲས་བུར་གྲུབ་པ་སྟེ། དེ་ནི་མིག་ཡོངས་སུ་མ་སྦྱངས་པའི་སེམས་ཅན་རྣམས་ཀྱི་མིག་ལམ་དུ་སྣང་བར་མི་འགྱུར་རོ། །​འཇམ་དཔལ་འདི་ལྟ་སྟེ། དཔེར་ན་བར་སྣང་གི་གནོད་སྦྱིན་རྣམས་ཀྱི་གཞལ་མེད་ཁང་དག་མི་རྣམས་ཀྱི་མིག་ལམ་དུ་སྣང་བར་མི་འགྱུར་བ་དེ་བཞིན་དུ་བྱང་ཆུབ་ཀྱི་ཤིང་དེ་ཡང་མིག་ཡོངས་སུ་མ་སྦྱངས་པའི་སེམས་ཅན་རྣམས་ཀྱི་མིག་ལམ་དུ་སྣང་བར་མི་འགྱུར་རོ། །​འཇམ་དཔལ་བྱང་ཆུབ་ཀྱི་ཤིང་དེ་ལ་སེམས་ཅན་རྣམས་མི་ཐོགས་པར་འགྲོ་སྟེ། འཇམ་དཔལ་འདི་ལྟ་སྟེ། དཔེར་ན་བར་སྣང་གི་གནོད་སྦྱིན་དག་གི་གཞལ་མེད་ཁང་རྣམས་ལ་མི་ཐོགས་པར་འགྲོ་བ་དེ་བཞིན་དུ་འཇམ་དཔལ་བྱང་ཆུབ་ཀྱི་ཤིང་དེ་ལ་སེམས་ཅན་རྣམས་མི་ཐོགས་པར་འགྲོ་སྟེ། བྱང་ཆུབ་ཀྱི་ཤིང་དེ་ཡང་ཡོངས་སུ་དག་པའི་ལས་དང་ལྡན་པའི་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པས་ཡོངས་སུ་གྲུབ་པའི་ཕྱིར་རོ། །​འཇམ་དཔལ་ཡང་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་འཇིག་རྟེན་གྱི་ཁམས་ནི་ཤར་ཕྱོགས་སུ་ཡང་ཐ་མའི་རྡུལ་ཕྲ་རབ་ཀྱི་རྡུལ་ཇི་སྙེད་པ་དེ་སྙེད་ཡོངས་སུ་དག་གོ། །​ལྷོར་ཡང་དེ་སྙེད། ནུབ་ཏུ་ཡང་དེ་སྙེད། བྱང་དུ་ཡང་དེ་སྙེད། ཤར་ལྷོར་ཡང་དེ་སྙེད། ལྷོ་ནུབ་ཏུ་ཡང་དེ་སྙེད། ནུབ་བྱང་དུ་ཡང་དེ་སྙེད། བྱང་ཤར་དུ་ཡང་དེ་སྙེད། སྟེང་དང་འོག་གི་ཕྱོགས་སུ་ཡང་དེ་སྙེད་ཀྱི་འཇིག་རྟེན་གྱི་ཁམས་ཡོངས་སུ་དག་སྟེ། སངས་རྒྱས་ཀྱི་ཞིང་དེ་དེ་ཙམ་དུ་རྒྱ་ཆེར་ཡོངས་སུ་དག་གོ། །​སྒྲིབ་པ་མེད་པའི་རྣམ་པར་ཐར་པ་ལ་བརྟེན་ན་དེའི་བརྒྱར་བགྲངས་པ་དེ་སྙེད་དུ་རང་གི་སངས་རྒྱས་ཀྱི་ཞིང་ཡོངས་སུ་དག་གོ།



The English translation of this folio by 84000 - Translating the words of the Buddha can be found at:
https://read.84000.co/translation/toh124.html?part=UT22084-054-005-1048#UT22084-054-005-1048