Degé Kangyur volume 54, F.219.b

འོག་གི་ཕྱོགས་དང་། ཕྱོགས་མཚམས་སུ་རྡུལ་ཕྲ་རབ་དེ་སྙེད་བོར་ན། འཇམ་དཔལ་དེ་ཇི་སྙམ་དུ་སེམས། གང་དུ་རྡུལ་ཕྲ་རབ་དེ་དག་བོར་བ་དང་། གང་དུ་མ་བོར་བའི་འཇིག་རྟེན་གྱི་ཁམས་གང་མང་། གསོལ་པ། བཅོམ་ལྡན་འདས་གང་དུ་རྡུལ་ཕྲ་རབ་དེ་དག་བོར་བ་ནི་ཉུང་ལགས་ཀྱི་མ་བོར་བའི་འཇིག་རྟེན་གྱི་ཁམས་དེ་ནི་ཆེས་མང་ལགས་སོ། །​བཀའ་སྩལ་པ། འཇམ་དཔལ་འཇིག་རྟེན་གྱི་ཁམས་གང་དུ་རྡུལ་ཕྲ་རབ་བོར་བ་དང་གང་དུ་མ་བོར་བ་དེ་དག་ཐམས་ཅད་གྲོང་ཁྱེར་གཅིག་ཏུ་གྱུར་ལ། འདི་ལྟ་སྟེ། ཕྱེའམ་ཕྱེ་མའི་རྣམ་པ་གཞན་གྱིས་གང་བ་བཞིན་དུ་ཡུངས་ཀར་གྱིས་གང་ལ། མི་ལ་ལ་ཞིག་གིས་ཡུངས་འབྲུ་དེ་དག་བཏགས་ནས། ཡུངས་འབྲུ་རེ་རེ་ཡང་ཡུངས་འབྲུ་དེ་དག་ཇི་སྙེད་པ་དེ་སྙེད་ཀྱི་རྡུལ་ཕྲ་རབ་ཀྱི་རྡུལ་དུ་བྱས་ཏེ། དེས་རྡུལ་ཕྲ་རབ་དེ་ཐམས་ཅད་ཕྲག་པ་ལ་ཐོགས་ནས་ཤར་ཕྱོགས་སུ་སོང་སྟེ། གོམ་པ་གཅིག་བོར་བས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་འདའ་ཞིང་འདི་ལྟ་སྟེ། སེམས་ཀྱི་མགྱོགས་པའི་རྫུ་འཕྲུལ་ལྟ་བུའི་མགྱོགས་པ་དང་ལྡན་ཏེ། གོམ་པ་དེ་ལྟ་བུར་འདོར་བ་དང་། དེ་ལྟ་བུའི་མགྱོགས་པ་དང་ལྡན་པས་གང་གཱའི་ཀླུང་གི་བྱེ་མ་སྙེད་ཀྱི་བསྐལ་པར་སོང་སྟེ་རྡུལ་ཕྲ་རབ་གཅིག་བོར་ལ། དེ་ལྟ་བུའི་ཚུལ་གྱིས་ཤར་ཕྱོགས་སུ་རྡུལ་ཕྲ་རབ་དེ་ཐམས་ཅད་བོར་ལ་དེ་བཞིན་དུ་ལྷོ་ཕྱོགས་སུ་རྡུལ་ཕྲ་རབ་དེ་སྙེད་བོར་ཞིང་། ནུབ་དང་། བྱང་དང་། བྱང་ཤར་དང་། ཤར་ལྷོ་དང་། ལྷོ་ནུབ་དང་། ནུབ་བྱང་གི་མཚམས་དང་། སྟེང་དང་། འོག་གི་ཕྱོགས་དང་། ཕྱོགས་མཚམས་རེ་རེར་ཡང་རྡུལ་ཕྲ་རབ་དེ་སྙེད་བོར་ན་འཇམ་དཔལ་དེ་ཇི་སྙམ་དུ་སེམས། གང་རྡུལ་ཕྲ་རབ་དེ་བོར་བ་དང་གང་དུ་མ་བོར་བའི་འཇིག་རྟེན་གྱི་ཁམས་དེ་དག་གང་མང་གསོལ་པ། བཅོམ་ལྡན་འདས་གང་དུ་རྡུལ་ཕྲ་རབ་བོར་བ་ནི་ཉུང་ལགས་ཀྱི་མ་བོར་བ་དེ་ནི་ཆེས་མང་ལགས་སོ། །​བཀའ་སྩལ་པ། འཇམ་དཔལ་འཇིག་རྟེན་གྱི་ཁམས་གང་དུ་རྡུལ་ཕྲ་རབ་མ་བོར་བ་དང་གང་དུ་བོར་བ་དེ་དག་ཐམས་ཅད་གྲོང་ཁྱེར་གཅིག་ཏུ་གྱུར་ནས་ཡུངས་ཀར་གྱིས་གང་བ་ནི་ཇི་ལྟ་བ་སྔར་དཔེ་བསྟན་པ་དེ་བཞིན་དུ་རྒྱས་པར་བྱས་ཏེ་སྟོང་ཕྲག་སུམ་ཅུར་བསྒྱུར་བ། འཇམ་དཔལ་དེ་ཐམས་ཅད་ཀྱི་ཐ་མའི་རྡུལ་ཕྲ་རབ་ཀྱི་ཕུང་པོ་བཞག་པ་དེ་སྙེད་ཀྱི་འཇིག་རྟེན་གྱི་ཁམས་རབ་འབྱམ་གྱི་རྒྱ་ཇི་ཙམ་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པའི་བྱང་ཆུབ་ཀྱི་ཤིང་གི་རྒྱ་ཡང་དེ་ཙམ་མོ།



The English translation of this folio by 84000 - Translating the words of the Buddha can be found at:
https://read.84000.co/translation/toh124.html?part=UT22084-054-005-1047#UT22084-054-005-1047