Degé Kangyur volume 51, F.297.a

བཙུན་པ་ཤཱ་རིའི་བུ་ཁྱོད་དགྲ་བཅོམ་པ་ཟག་པ་ཟད་པ་མི་ཤེས་པ་དང་ལྡན་པར་མོས་སམ། སྨྲས་པ། མོས་སོ། །​སྨྲས་པ། ཇི་ལྟར་མོས། སྨྲས་པ། ཤེས་པ་དང་། མི་ཤེས་པ་མཉམ་པ་ཉིད་ཀྱི་ཕྱིར་དགྲ་བཅོམ་པ་ཟག་པ་ཟད་པ་མི་ཤེས་པ་དང་ལྡན་ཏེ་འདི་ལྟར་མི་ཤེས་པ་དང་། ཤེས་པ་ནི་མི་ཟད་པའི་ཆོས་ཅན་ཡིན་པའི་ཕྱིར་དབེན་པ་སྟེ། དེ་བས་ན་མི་ཤེས་པ་དང་། ཤེས་པར་རྣམ་པར་མི་རྟོགས་པའི་ཕྱིར་དགྲ་བཅོམ་པ་ཟག་པ་ཟད་པ་མི་ཤེས་པ་དང་ལྡན་པར་མོས་སོ། །​སྨྲས་པ། བཙུན་པ་ཤཱ་རིའི་བུ་ཁྱོད་དགྲ་བཅོམ་པ་ཟག་པ་ཟད་པ། ཤེས་པ་དང་བྲལ་བར་མོས་སམ། སྨྲས་པ། མོས་སོ། །​སྨྲས་པ། ཇི་ལྟར་མོས། སྨྲས་པ། འདི་ལྟར་ཆོས་ཐམས་ཅད་ནི་ངོ་བོ་ཉིད་དང་བྲལ་བ་སྟེ། དེ་བས་ན་དགྲ་བཅོམ་པ་ཟག་པ་ཟད་པ་ཤེས་པ་དང་བྲལ་བར་མོས་སོ། །​སྨྲས་པ། བཙུན་པ་ཤཱ་རིའི་བུ་ཁྱོད་དགྲ་བཅོམ་པ་ཟག་པ་ཟད་པ། རྣམ་པར་མ་གྲོལ་བའི་ཆོས་ཅན་དུ་མོས་སམ། སྨྲས་པ། མོས་སོ། །​སྨྲས་པ། ཇི་ལྟར་མོས། སྨྲས་པ། ཉོན་མོངས་པ་མེད་པའི་ཕྱིར་ཏེ། འདི་ལྟར་ཉོན་མོངས་པ་མེད་ན་གང་དག་ལས་རྣམ་པར་གྲོལ་བར་འགྱུར་ཏེ། དེ་ལྟར་མོས་སོ། །​སྨྲས་པ། བཙུན་པ་ཤཱ་རིའི་བུ་ཁྱོད་སྔོན་གྱི་དེ་བཞིན་གཤེགས་པ་རྣམས་མ་བྱུང་ཞིང་ཡོངས་སུ་མྱ་ངན་ལས་མ་འདས་པར་མོས་སམ། སྨྲས་པ། མོས་སོ། །​སྨྲས་པ། ཇི་ལྟར་མོས། སྨྲས་པ། འཇམ་དཔལ་བསམ་གྱིས་མི་ཁྱབ་པའི་དབྱིངས་ལ་ནི་སྐྱེ་བ་མེད་དེ། གང་མི་སྐྱེ་བ་དེ་ལ་མི་སྣང་བར་འགྱུར་བའམ། ཡོངས་སུ་མྱ་ངན་ལས་འདའ་བར་འགྱུར་བ་ག་ལ་ཡོད་དེ་དེ་ལྟར་མོས་སོ། །​སྨྲས་པ། བཙུན་པ་ཤཱ་རིའི་བུ་ཁྱོད་སངས་རྒྱས་ཐམས་ཅད་གཅིག་ཡིན་པར་མོས་སམ། སྨྲས་པ། མོས་སོ། །​སྨྲས་པ། ཇི་ལྟར་མོས། སྨྲས་པ། འཇམ་དཔལ་ཆོས་ཀྱི་དབྱིངས་ལ་ནི་ཐ་དད་པ་མེད་པ་དེ་དེ་ལྟར་མོས་སོ། །​སྨྲས་པ། བཙུན་པ་ཤཱ་རིའི་བུ་ཁྱོད་སངས་རྒྱས་ཀྱི་ཞིང་ཐམས་ཅད་སངས་རྒྱས་ཀྱི་ཞིང་གཅིག་ཡིན་པར་མོས་སམ། སྨྲས་པ། མོས་སོ། །​སྨྲས་པ། ཇི་ལྟར་མོས། སྨྲས་པ། འཇམ་དཔལ་སངས་རྒྱས་ཀྱི་ཞིང་ཐམས་ཅད་ནི་མི་ཟད་པ་ཉིད་ཀྱི་ཞིང་ཡིན་ཏེ་དེ་ལྟར་མོས་སོ། །​སྨྲས་པ། བཙུན་པ་ཤཱ་རིའི་བུ་ཁྱོད་ཆོས་ཐམས་ཅད་ཡོངས་སུ་ཤེས་པར་བྱ་བ་མ་ཡིན་པ་དང་། སྤང་བར་བྱ་བ་མ་ཡིན་པ་དང་། མངོན་སུམ་དུ་བྱ་བ་མ་ཡིན་པ་དང་། བསྒོམ་པར་བྱ་བ་མ་ཡིན་པར་མོས་སམ།



The English translation of this folio by 84000 - Translating the words of the Buddha can be found at:
https://read.84000.co/translation/toh118.html?part=UT22084-051-006-224#UT22084-051-006-224