Degé Kangyur volume 51, F.181.b

དེ་བཞིན་གཤེགས་པ་ལ་མཆོད་པའི་ལས་བྱ་བའི་ཕྱིར་ལྷའི་མེ་ཏོག་གི་ཆར་མངོན་པར་ཕབ་བོ། །​ཙན་དན་གྱི་ཕྱེ་མའི་ཆར་ཡང་མངོན་པར་ཕབ་བོ། །​ལྷའི་སིལ་སྙན་དང་ཕེག་རྡོབ་པ་དག་ཀྱང་དེ་བཞིན་གཤེགས་པ་ལ་མཆོད་པའི་ལས་བྱ་བའི་ཕྱིར་བསྒྲགས་སོ། །​གང་དག་དེ་བཞིན་གཤེགས་པའི་བསྟན་པ་ལ་མངོན་པར་དད་པ་དེ་དག་ཐམས་ཅད་ཀྱིས་ཀྱང་ཚིག་འདི་སྐད་ཅེས་གསོལ་ཏོ། །​བཅོམ་ལྡན་འདས་ལེགས་སོ་ལེགས་སོ། །​བཅོམ་ལྡན་འདས་དེ་བཞིན་གཤེགས་པའི་བསྟན་པ་ཉོན་མོངས་པ་ཐམས་ཅད་ཟད་པར་བགྱིད་པ་འདི་ནི་རྫུ་འཕྲུལ་ཆེ་སྟེ་ལེགས་སོ་ལེགས་སོ། །​དེ་ནས་བཅོམ་ལྡན་འདས་དེའི་ཚེ་ཉོན་མོངས་པ་ཐམས་ཅད་རྣམ་པར་འཇོམས་པ་རྡུལ་མེད་པའི་རྒྱལ་མཚན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཏིང་ངེ་འཛིན་དེའི་མཐུས་ས་ཆེན་པོ་འདི་མཐོ་བ་དང་དམའ་བར་བྱས་ཏེ། འགུལ། རབ་ཏུ་འགུལ། ཀུན་ཏུ་རབ་ཏུ་འགུལ། གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། ལྡེག་རབ་ཏུ་ལྡེག །​ཀུན་ཏུ་རབ་ཏུ་ལྡེག །​འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར། ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །​ལྷའི་ཙན་དན་གྱི་ཕྱེ་མའི་ཆར་ཡང་བབ་བོ། །​ལྷའི་མེ་ཏོག་གི་ཆར་ཡང་བབ་བོ། །​ལྷའི་འོད་ཀྱི་སྣང་བ་ཡང་བྱུང་ངོ་། །​སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་སེམས་ཅན་གང་སུ་དག་ངན་སོང་དུ་སྐྱེས་པ་དེ་དག་ཐམས་ཅད་ཀྱང་ངན་སོང་རྣམས་ལས་ཡོངས་སུ་གྲོལ་བར་གྱུར་ཏོ། །​ལྷའི་དབང་པོ་དང་། ཀླུའི་དབང་པོ་དང་། གནོད་སྦྱིན་གྱི་དབང་པོ་དང་། སྲིན་པོའི་དབང་པོ་དང་། མིའི་དབང་པོ་དེ་དག་ཐམས་ཅད་ཀྱི་གནས་རྣམས་ཀྱང་སྣང་བར་གྱུར་ཏོ། །​ལྷའི་སིལ་སྙན་གྱི་སྒྲ་དག་ཀྱང་གྲག་གོ། །​ལྷའི་འོད་དག་ཀྱང་སྣང་བར་གྱུར་ཏོ། །​ལྷའི་སྤོས་ཀྱི་ངད་ཀྱང་ལྡང་བར་གྱུར་ཏོ། །​དེ་ནས་དེ་དག་ཐམས་ཅད་ཀྱང་ཆོ་འཕྲུལ་ཆེན་པོ་དེ་མཐོང་ནས་ཡ་མཚན་དུ་གྱུར་ཏེ་འདི་སྙམ་དུ་སེམས་སོ། །​གནས་འདི་དག་སྣང་བར་གྱུར་པ་འདི་དང་། ཆོ་འཕྲུལ་ཆེན་པོ་སྣང་བར་གྱུར་པ་འདི་དང་། ས་ཆེན་པོ་གཡོས་པ་འདི་དང་། མེ་ཏོག་གི་ཆར་ཆེན་པོ་བབ་པ་འདི་སུའི་མཐུ་ཡིན།



The English translation of this folio by 84000 - Translating the words of the Buddha can be found at:
https://read.84000.co/translation/toh114.html?part=UT22084-051-002-235#UT22084-051-002-235