དགེ་བའི་རྩ་བ་དེས་དེ་ནས་ཤི་འཕོས་ནས་ཁ་ཅིག་ནི་ལྷ་རྣམས་ཀྱི་ནང་དུ་སྐྱེས་སོ། །ཁ་ཅིག་ནི་མི་རྣམས་ཀྱི་ནང་དུ་སྐྱེས་པའི་བར་དུ་གྱུར་ཏོ། །དུད་འགྲོ་རྣམས་ལ་ཡང་དེ་བཞིན་དུ་བསྐུལ། མི་རྣམས་ལ་ཡང་དེ་བཞིན་དུ་བསྐུལ་ནས། ལྷ་དང་མི་བགྲང་བ་ལས་ཡང་དག་པར་འདས་པ་དག་ཆོས་མཉན་པའི་ཕྱིར་བཅོམ་ལྡན་འདས་ཀྱི་དྲུང་དུ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་འཁོད་དོ། །དེའི་ཚེ་ན་ལྷ་དང་། མིའི་ཚོགས་བགྲང་བ་ལས་ཡང་དག་པར་འདས་པ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བྱང་ཆུབ་སེམས་དཔའ་བགྲང་བ་ལས་ཡང་དག་པར་འདས་པ་དག་གིས་ནི་དེར་ཏིང་ངེ་འཛིན་དང་། བཟོད་པ་དང་། གཟུངས་ཐོབ་པར་གྱུར་ཏོ། །ཐེག་པ་ཆེན་པོའི་མདོ་སྙིང་རྗེ་པད་མ་དཀར་པོ་ལས་གཟུངས་ཀྱི་སྒོའི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་ཀྱིས་རང་གིས་རྫུ་འཕྲུལ་མངོན་པར་མཛད་པ་སླར་བསྡུས་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཞི་བས་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱུ་གང་དང་རྐྱེན་གང་གིས་སངས་རྒྱས་བཅོམ་ལྡན་འདས་གཞན་དག་གི་སངས་རྒྱས་ཀྱི་ཞིང་ནི་ཡོངས་སུ་དག་ཅིང་རྙོག་པ་མ་མཆིས་ལ། སྙིགས་མ་ལྔ་དང་བྲལ་ཞིང་སངས་རྒྱས་ཀྱི་ཞིང་གི་ཡོན་ཏན་བཀོད་པ་སྣ་ཚོགས་དག་མཆིས་ལ། དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་ཡོན་ཏན་རྣམ་པ་སྣ་ཚོགས་ཡོངས་སུ་རྫོགས་ཤིང་བདེ་བ་སྣ་ཚོགས་དང་ལྡན་ལ། དེ་ན་ཉན་ཐོས་དང་། རང་སངས་རྒྱས་རྣམས་ཀྱི་མིང་ཡང་མ་མཆིས་ན། སྐྱེ་བ་ལྟ་སྨོས་ཀྱང་ཅི་འཚལ་བར་གྱུར་ལགས། བཅོམ་ལྡན་འདས་རྒྱུ་གང་དང་རྐྱེན་གང་གིས་བཅོམ་ལྡན་འདས་ནི་སངས་རྒྱས་ཀྱི་ཞིང་སྨད་པར་འཁྲུགས་ཤིང་། ཚེའི་སྙིགས་མ་དང་། དུས་ཀྱི་སྙིགས་མ་དང་། སེམས་ཅན་གྱི་སྙིགས་མ་དང་། ལྟ་བའི་སྙིགས་མ་དང་། ཉོན་མོངས་པའི་སྙིགས་མ་བྱུང་བར་གྱུར་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཁོར་བཞི་པོ་དག་ལ་ཐེག་པ་གསུམ་ལས་བརྩམས་ཏེ་ཆོས་བསྟན་པར་མཛད་ལགས།