བླ་ན་མེད་པ་ཡང་དག་པར་རྫོགས་པར་སངས་རྒྱས་པ་དེ་དག་ནི་བརྩོན་འགྲུས་ཀྱི་སྟོབས་ཆེན་པོ་ཐོབ་པ་ལགས་སོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སེམས་ཅན་ཐམས་ཅད་ཀྱི་སླད་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་དེ་དག་ནི་དཔའ་བ་དང་། རྟུལ་ཕོད་པ་ལགས་སོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ནམ་མཁའ་དང་འདྲ་བའི་སེམས་ཅན་རྣམས་ཀྱི་སླད་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བ་དེ་དག་ནི་གོ་ཆ་ཆེན་པོ་འཚལ་བ་ལགས་ཤིང་བསམ་གྱིས་མི་ཁྱབ་པ་དང་། མཚུངས་པ་མ་མཆིས་པའི་གོ་ཆ་འཚལ་བ་ལགས་སོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤ་སྟག་གིས་དཔེར་བགྱི་ན། འདམ་བུའི་ཚལ་ལམ། འོད་མའི་ཚལ་ལམ། བུ་རམ་ཤིང་གི་ཚལ་ལམ། འབྲས་སཱ་ལུའི་ཞིང་ངམ། མདའ་རྒྱུའི་ཚལ་ལྟར་ཡོངས་སུ་བལྟམས་པར་གྱུར་ཅིང་། དེ་བཞིན་གཤེགས་པ་དེ་དག་ཀྱང་བསྐལ་པ་འམ། བསྐལ་པ་ལས་ལྷག་པར་བཞུགས་ཏེ། ཆོས་བཤད་པར་གྱུར་ལ། དེ་བཞིན་གཤེགས་པ་རེ་རེས་ཀྱང་སེམས་ཅན་དཔག་ཏུ་མ་མཆིས། གྲངས་མ་མཆིས། ཚད་མ་མཆིས་པ་དག་ཡོངས་སུ་མྱ་ངན་ལས་བཟླས་པར་གྱུར་ཀྱང་། བཙུན་པ་བཅོམ་ལྡན་འདས་སེམས་ཅན་གྱི་ཁམས་ལ་ནི་བྲི་བའམ། གང་བར་མི་མངོན་ལགས་སོ། །དེ་ཅིའི་སླད་དུ་ཞེ་ན། སེམས་ཅན་མ་མཆིས་པའི་སླད་དུ་དང་། སེམས་ཅན་དབེན་པའི་སླད་དུའོ། །དེ་བཞིན་དུ་གོང་མ་བཞིན་དུ་སྦྱར་ཏེ། ཕྱོགས་བཅུའི་འཇིག་རྟེན་གྱི་ཁམས་ཀྱི་བར་དུ་རྒྱས་པར་སྦྱར་བར་བགྱི་སྟེ། བཙུན་པ་བཅོམ་ལྡན་འདས་རྣམ་གྲངས་དེས་ན་བདག་འདི་སྐད་དུ་གང་དག་སེམས་ཅན་རྣམས་ཀྱི་སླད་དུ་གོ་ཆ་ཆེན་པོ་འཚལ་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འཚལ་བ་དེ་དག་ནི་ནམ་མཁའ་ཡོངས་སུ་ཐར་བར་བགྱི་བར་འཚལ་བ་ལགས་སོ་ཞེས་མཆི་ལགས་སོ།