།ཀཽ་ཤི་ཀ་འདི་ལ་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ་རིགས་ཀྱི་བུ་མོ་ནི་རང་གི་སེམས་སུ་ཀུན་ཏུ་ཤེས། སྦྱིན་པར་ཀུན་ཏུ་ཤེས། སྦྱིན་པའི་ཕ་རོལ་ཏུ་ཕྱིན་པར་ཀུན་ཏུ་ཤེས། ཚུལ་ཁྲིམས་སུ་ཀུན་ཏུ་ཤེས། ཚུལ་ཁྲིམས་ཀྱི་ཕ་རོལ་ཏུ་ཕྱིན་པར་ཀུན་ཏུ་ཤེས། བཟོད་པར་ཀུན་ཏུ་ཤེས། བཟོད་པའི་ཕ་རོལ་ཏུ་ཕྱིན་པར་ཀུན་ཏུ་ཤེས། བརྩོན་འགྲུས་སུ་ཀུན་ཏུ་ཤེས། བརྩོན་འགྲུས་ཀྱི་ཕ་རོལ་ཏུ་ཕྱིན་པར་ཀུན་ཏུ་ཤེས། བསམ་གཏན་དུ་ཀུན་ཏུ་ཤེས། བསམ་གཏན་གྱི་ཕ་རོལ་ཏུ་ཕྱིན་པར་ཀུན་ཏུ་ཤེས། ཤེས་རབ་ཏུ་ཀུན་ཏུ་ཤེས། ཤེས་རབ་ཀྱི་ཕ་རོལ་ཏུ་ཕྱིན་པར་ཀུན་ཏུ་ཤེས། དེ་བཞིན་དུ་ནང་སྟོང་པ་ཉིད་དུ་ཀུན་ཏུ་ཤེས། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དུ་ཀུན་ཏུ་ཤེས་པ་དང་། དེ་བཞིན་དུ་སྦྱར་ཏེ། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་དུ་ཀུན་ཏུ་ཤེས་པ་དང་། དྲན་པ་ཉེ་བར་གཞག་པ་བཞིར་ཀུན་ཏུ་ཤེས་པ་ནས། འཕགས་པའི་ལམ་ཡན་ལག་བརྒྱད་པའི་བར་དུ་ཀུན་ཏུ་ཤེས་པ་དང་། དེ་བཞིན་གཤེགས་པའི་སྟོབས་བཅུར་ཀུན་ཏུ་ཤེས་པ་ནས། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དུ་ཀུན་ཏུ་ཤེས། སངས་རྒྱས་སུ་ཀུན་ཏུ་ཤེས། སངས་རྒྱས་ལ་བསྐྱེད་པའི་དགེ་བའི་རྩ་བ་རྣམས་སུ་ཀུན་ཏུ་ཤེས་ཤིང་། ཆོས་དེ་དག་ཐམས་ཅད་ཀྱང་བརྟུལ་ཅིང་བསྡུས་ཏེ་སེམས་ཅན་ཐམས་ཅད་དང་། ཐུན་མོང་དུ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་ལ། དེ་ཡང་ཡོངས་སུ་བསྔོ་བར་ཀུན་ཏུ་ཤེས་པ་སྟེ། ཀཽ་ཤི་ཀ་དེ་དག་ནི་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ་རིགས་ཀྱི་བུ་མོ་དེ་དག་གི་ཆགས་པ་ཡིན་པར་རིག་པར་བྱ་སྟེ། ཆགས་པ་དེ་དག་དང་ཀུན་ཏུ་འབྲེལ་ན་ཆགས་པ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་མི་ནུས་སོ། །དེ་ཅིའི་ཕྱིར་ཞེ་ན། ཀཽ་ཤི་ཀ་གཟུགས་ཀྱི་རང་བཞིན་ནི་ཡོངས་སུ་བསྔོ་བར་མི་ནུས་ལ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་རང་བཞིན་ནི་ཡོངས་སུ་བསྔོ་བར་མི་ནུས་ཤིང་། དེ་བཞིན་དུ་གོང་མ་བཞིན་དུ་སྦྱར་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱི་རང་བཞིན་ནི་ཡོངས་སུ་བསྔོ་བར་མི་ནུས་པའི་ཕྱིར་རོ། །ཀཽ་ཤི་ཀ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་གཞན་དག་ཀུན་ཏུ་མགུ་བ་དང་། ཆོས་ཐམས་ཅད་མཉམ་པ་ཉིད་དུ་མཐོང་བ་དང་།