Degé Kangyur volume 48, F.44.a

ཕྱེ་མ་རེད་ཀྱི་དུས་དང་། ཉིན་མཚན་དུ་ཡང་རུང་སྟེ། རིན་པོ་ཆེའི་ཕུང་པོ་རི་རབ་དང་མཉམ་པ་དག་ཉེ་བར་སྦྱིན་དགོས་པར་གྱུར་ལ། སེམས་ཅན་དེ་དག་དེ་ལྟ་བུས་ཚིམ་པར་ཡང་མི་འགྱུར་ཞིང་། འདི་ལྟར་རྐྱེན་དེ་དག་གིས་ལོག་པར་ལྟུང་བར་འགྲོ་བ་དག་ཏུ་འགྱུར་བའི་གནས་དག་ཀྱང་ཡོད་ན། ཀྱེ་བདག་ཅག་གིས་སེམས་ཅན་དེ་དག་འདི་ལྟར་རེ་ཞིག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེས་བཀང་བ་འདི་ལ་མཆིལ་མ་ལྟ་བུའི་འདུ་ཤེས་སྐྱེད་པར་འགྱུར་བ་དེ་ལྟ་བུའི་ཆོས་ཡོངས་སུ་བཙལ་བར་བྱའོ་སྙམ་ན་རྫས་བསགས་པ་ཐ་ཆད་གཞན་ལ་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་མཁས་པ་ནི་རིན་པོ་ཆེའི་ཕུང་པོ་དེ་ལ་འདི་ནི་འདོད་ཆགས་དང་། ཞེ་སྡང་དང་། གཏི་མུག་གི་རྩ་བ་ཡིན། སེམས་ཅན་དམྱལ་བའི་སྡུག་བསྔལ་གྱི་རྩ་བ་ཡིན་དུད་འགྲོའི་སྐྱེ་གནས་ཀྱི་སྡུག་བསྔལ་གྱི་རྩ་བ་ཡིན། གཤིན་རྗེའི་འཇིག་རྟེན་གྱི་སྡུག་བསྔལ་གྱི་རྩ་བ་ཡིན་ཞིང་ལས་ཀྱི་ཀུན་ནས་སློང་བ་རྣམ་པ་དུ་མའི་རྩ་བ་ཡིན་ནོ་ཞེས་དེ་ལྟ་བུས་རབ་ཏུ་རྣམ་པར་སོགས་པར་བྱེད་དེ། དེ་ལས་དེ་མྱ་ངན་ལས་འདས་པའི་སེམས་ཐོབ་ཅིང་རིན་པོ་ཆེའི་ཕུང་པོ་དེ་ལ་མི་ལྟ་བར་འགྱུར་རོ། །​མཁས་པ་ནི་རིན་པོ་ཆེའི་ཕུང་པོ་དེ་ལ་འདི་ནི་རིན་པོ་ཆེའི་ཕུང་པོ་མ་ཡིན་གྱི། འདི་ནི་སེམས་ཅན་དམྱལ་བའི་ཕུང་པོ་ཡིན་ཏེ། དེ་ལ་ལྷག་པར་ཞེན་པའི་སེམས་ཅན་རྣམས་ནི་ལོག་པར་ལྟུང་བར་འགྲོ་བར་འགྱུར་རོ་སྙམ་དུ་དེ་ལྟ་བུར་སོ་སོར་རྟོག་པར་བྱེད་དོ། །​བརྟན་པའི་བློ་གྲོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་ལྟ་ཞོག་གི །​བརྟན་པའི་བློ་གྲོས་ཡོངས་སུ་བརྟག་པ་བཟུང་སྟེ། ཤར་ཕྱོགས་སུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཇི་སྙེད་ཡོད་པ་དང་། དེ་བཞིན་དུ་ཕྱོགས་བཅུ་ཀུན་དུ་འཇིག་རྟེན་གྱི་ཁམས་ཇི་སྙེད་ཡོད་པ་དེ་དག་ན་སེམས་ཅན་གཟུགས་ཅན་ནམ། གཟུགས་ཅན་མ་ཡིན་པའམ། འདུ་ཤེས་ཅན་ནམ། འདུ་ཤེས་ཅན་མ་ཡིན་པའམ། འདུ་ཤེས་ཅན་ཡང་མ་ཡིན། འདུ་ཤེས་ཅན་



The English translation of this folio by 84000 Translating the words of the Buddha can be found at:
https://read.84000.co/translation/toh101.html?part=UT22084-048-001-4103#UT22084-048-001-4103