།སེམས་ཅན་དཔག་ཏུ་མེད་པ་དག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་དེ་ཕྱིར་བསྡུ་བ་མཛད་དོ། །དེ་ནས་འཁོར་བཞི་པོ་དང་། ཚངས་པའི་འཁོར་དེ་དང་། འདོད་པ་ན་སྤྱོད་པའི་ལྷའི་འཁོར་དང་། གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དག་གིས་ཀྱང་འཇིག་རྟེན་གྱི་ཁམས་ཇི་ལྟར་གནས་པ་བཞིན་དུ་མཐོང་ངོ་། །དེ་ནས་དེའི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོ་སྟན་ལས་ལངས་ཏེ། ཆོས་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཇི་ཙམ་དུ་ཤིན་ཏུ་རྫུ་འཕྲུལ་ཆེན་པོ་དང་ལྡན་པ་ནི་ངོ་མཚར་ལགས་སོ། །བཅོམ་ལྡན་འདས་འཇིག་རྟེན་གྱི་ཁམས་འདི་དང་། བཅོམ་ལྡན་འདས་ཀྱང་མངོན་པར་བཏེག་ནས་འཇིག་རྟེན་གཞན་དུ་བཞག་ལགས་ཀྱང་། དེའི་ཚེ་བདག་གིས་མཚན་མ་ཡང་མ་འཚལ་ཅིང་། རྫུ་འཕྲུལ་གྱི་མིང་ཡང་མི་དྲན་ལགས་ན་རྫུ་འཕྲུལ་མངོན་པར་འགྲུབ་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་བདག་ནི་འདི་སྙམ་དུ་སེམས་ལགས་ཏེ། ཨ་ལ་ལ་བྱང་ཆུབ་སེམས་དཔའ་དེ་རྫུ་འཕྲུལ་ཆེན་པོ་དང་ལྡན་པ་ནི་ངོ་མཚར་རོ་སྙམ་ལགས་སོ། །བཅོམ་ལྡན་འདས་བདག་གིས་དུས་འགྱུར་བ་ཡང་གློ་བར་མ་ཆུད་ཅིང་བདག་ཅག་ཡུན་ཇི་སྲིད་ནས་དྲངས་པའམ། ཡུན་ཇི་སྲིད་ནས་ཁྲིད་པ་ཡང་སྐད་ཅིག་གཅིག་དང་། ཐང་ཅིག་གཅིག་ཙམ་ཡང་གློ་བར་མ་ཆུད་ལ། ཡུད་ཙམ་གཅིག་ཀྱང་རྗེས་སུ་མི་དྲན་ལགས་ཀྱང་བདག་ནི་འདི་སྙམ་སེམས་ལགས་ཏེ། རེ་ཞིག་བྱང་ཆུབ་སེམས་དཔའི་རྫུ་འཕྲུལ་དེ་ཡང་དེ་ལྟ་བུ་ལགས་ན་དེ་བཞིན་གཤེགས་པའི་ལྟ་སྨོས་ཅི་འཚལ་སྙམ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ལ་བཀའ་སྩལ་པ་མཽད་གལ་གྱི་བུ་ཁྱོད་འཇིག་རྟེན་གྱི་ཁམས་འདི་དྲངས་ཤིང་ཀུན་དུ་དྲངས་པའམ།