Degé Kangyur volume 48, F.142.a

ནོར་བུ་མཁན་དེས་བདག་ཉིད་ཀྱི་ལོངས་སྤྱོད་ཕུན་སུམ་ཚོགས་པ་མཐོང་སྟེ། དེས་རྒྱལ་པོའམ། དེ་ལས་གཞན་པ་མཁས་པ་དག་ལས་བསྟི་སྟང་དུ་བྱ་བ་དག་འཐོབ་ཅིང་། ནོར་བུ་རིན་པོ་ཆེ་དེའི་ཡོན་ཏན་དེ་དག་ཀུན་ཏུ་སྟོན་པར་བྱེད་ལ། ནོར་བུ་རིན་པོ་ཆེ་དེ་ལ་ཡང་རྒྱལ་པོ་དང་། གཞོན་ནུ་དང་། བློན་པོ་ཆེན་པོ་དང་། མཁས་པ་དེ་དག་ནོར་བུ་རིན་པོ་ཆེའི་ཡོན་ཏན་དག་ལ་དགའ་བ་སྐྱེད་པར་བྱེད་ཅིང་། ནོར་བུ་རིན་པོ་ཆེ་དེ་མཐོང་ན་ཡང་དགའ་བ་སྐྱེད་པར་བྱེད་པ་དེ་བཞིན་དུ། ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་གི་ཚེ་དེ་ལྟར་མཉམ་པ་ཉིད་ཀྱི་སོ་སོར་རྟོག་པས་ལན་མང་དུ་གནས་པར་བྱེད་པ་དེ་ལྟ་དེ་ལྟར་རང་གི་དགེ་བའི་རྩ་བ་སངས་རྒྱས་ཀྱི་ཡེ་ཤེས་ཡོངས་སུ་བྱང་བར་བྱེད་པ་ཡིན། མངོན་པར་གཏོང་བར་ཡང་ནུས་པ་ཡིན། སངས་རྒྱས་བཅོམ་ལྡན་འདས་རྣམས་དང་ཡང་ཕྲད་པར་འགྱུར་བ་ཡིན། དེ་ལ་སངས་རྒྱས་བཅོམ་ལྡན་འདས་རྣམས་ཀྱང་སྟོན་པར་མཛད་པ་ཡིན། སེམས་ཅན་ཐམས་ཅད་ཀྱིས་ཀྱང་བགྲོད་པར་བྱ་བ་ཡིན་ནོ། །​ཤ་ར་དྭ་ཏིའི་བུ་འདི་ལྟ་སྟེ། དཔེར་ན་མི་ཞིག་གིས་སྨན་གྱི་ཤིང་ལྗོན་པ་བསྐྱེད་ལ། མི་དེ་ཇི་ལྟ་ཇི་ལྟར་དུས་དུས་སུ་འོབས་ཀྱང་རྐོ་བར་བྱེད་ཅིང་ཆུ་ཡང་ལྡུགས་པར་བྱེད་ལ། རི་དགས་དང་བྱ་དང་རླུང་གི་སྐྱོན་བསལ་བའི་ཕྱིར་ཡང་ཀུན་དུ་སྲུང་བར་བྱེད་པ་དེ་ལྟ་དེ་ལྟར་སྨན་གྱི་ཤིང་ལྗོན་པ་དེ་རྣམ་པར་འཕེལ་བར་འགྱུར་ལ། རྣམ་པར་འཕེལ་ནས་ཀྱང་སེམས་ཅན་གྲངས་མེད་དཔག་ཏུ་མེད་པའི་ནད་སེལ་བར་བྱེད་ཅིང་། ནད་ཀུན་ཏུ་གཅོད་པར་བྱེད་ལ། སེམས་ཅན་ནད་མེད་པ་རྣམས་ཀྱིས་བགྲོད་པར་བྱ་བ་ཡང་ཡིན་པ་དེ་བཞིན་དུ། ཤ་ར་དྭ་ཏིའི་བུ་བྱང་ཆུབ་སེམས་དཔའ་ཇི་ལྟ་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་པ་དང་། དགེ་བའི་རྩ་བ་ཡང་སྐྱེད་པར་བྱེད་པ་དང་། ཆོས་ཤེས་པ་དེ་ཡང་ཡོངས་སུ་ཚོལ་བར་བྱེད་པ་དང་། ཆོས་ཡོངས་སུ་ཚོལ་བ་ལ་མངོན་པར་བརྩོན་པ་ཡིན་པ་དང་། དེ་བཞིན་དུ་བདུད་ཀྱི་ལས་དང་། ཉོན་མོངས་པ་ཡོངས་སུ་སྐྱོབ་པར་བྱེད་པ་དེ་ལྟ་དེ་ལྟར་བྱང་ཆུབ་སེམས་དཔའ་ནི་སངས་རྒྱས་ཀྱི་ཆོས་རྣམ་པར་འཕེལ་བར་བྱེད་པ་ཡིན་ཏེ། དེ་རྣམ་



The English translation of this folio by 84000 Translating the words of the Buddha can be found at:
https://read.84000.co/translation/toh101.html?part=UT22084-048-001-4299#UT22084-048-001-4299