།ཁྱོད་ཀྱི་ཕའི་མིང་ནི་འདི་ཞེས་བྱའོ། །ཁྱོད་ཀྱི་ཕུ་ནུའི་མིང་ནི་འདི་ཞེས་བྱའོ། །ཁྱོད་ཀྱི་མཛའ་བཤེས་དང་། བློན་པོ་དང་། ཉེ་དུ་དང་། སྣག་གི་གཉེན་མཚམས་ཀྱི་མིང་ནི་འདི་ཞེས་བྱའོ། །ཁྱོད་ཀྱི་ཕྱི་མོ་དང་། མེས་པོ་གཉིས་ཀྱི་བདུན་རྒྱུད་ཚུན་ཆད་ཀྱི་བར་གྱི་མིང་ནི་འདི་ཞེས་བྱའོ་ཞེས་ཉེ་བར་སྟོན་ཅིང་ཁྱོད་ནི་ལྗོངས་ག་གེ་མོ་ཞིག་དང་། ཁྱོད་ནི་གྲོང་ཁྱེར་ག་གེ་མོ་ཞིག་དང་། ཁྱོད་ནི་གྲོང་ག་གེ་མོ་ཞིག་དང་། ཁྱོད་ནི་ཡུལ་ག་གེ་མོ་ཞིག་ནས། ལྗོངས་ག་གེ་མོ་ཞིག་ཏུ་སྐྱེས་སོ། །གྲོང་ཁྱེར་ག་གེ་མོ་ཞིག་དང་། གྲོང་ག་གེ་མོ་ཞིག་ཏུ་སྐྱེ་བ་ཡིན་ནོ་ཞེས་ཟེར་ཞིང་། གལ་ཏེ་དེ་རང་བཞིན་གྱིས་དམན་པ་ཞིག་ཡིན་ན། དེ་དེ་ལ་འདི་སྐད་དུ་ཁྱོད་ནི་སྔོན་ཡང་འདི་བཞིན་དུ་དམན་པ་ཉིད་དུ་གྱུར་པ་ཡིན་ནོ་ཞེས་ཟེར་རོ། །གལ་ཏེ་རྣོ་བ་ཞིག་ཡིན་ན་ཡང་། དེ་འདི་སྐད་དུ་ཁྱོད་ནི་སྔོན་ཡང་འདི་བཞིན་དུ་རྣོ་བ་ཉིད་དུ་གྱུར་ཏོ་ཞེས་ཟེར་རོ། །གལ་ཏེ་དགོན་པ་པ་ཞིག་ཡིན་ནམ། གལ་ཏེ་བསོད་སྙོམས་པ་ཞིག་ཡིན་ནམ། གལ་ཏེ་ཕྱག་དར་ཁྲོད་བ་ཞིག་ཡིན་ནམ། གལ་ཏེ་ཟས་ཕྱིས་མི་ལེན་པ་ཞིག་ཡིན་ནམ། གལ་ཏེ་སྟན་གཅིག་པ་ཞིག་ཡིན་ནམ། གལ་ཏེ་རྙེད་པས་ཆོག་ཤེས་པའི་བསོད་སྙོམས་པ་ཞིག་ཡིན་ནམ། གལ་ཏེ་དུར་ཁྲོད་པ་ཞིག་ཡིན་ནམ། གལ་ཏེ་བླ་གབ་མེད་པ་ཞིག་ཡིན་ནམ། གལ་ཏེ་ཤིང་དྲུང་པ་ཞིག་ཡིན་ནམ། གལ་ཏེ་ཅོག་པུ་པ་ཞིག་ཡིན་ནམ། གལ་ཏེ་གཞི་ཇི་བཞིན་པ་ཞིག་ཡིན་ནམ། གལ་ཏེ་ཆོས་གོས་གསུམ་པ་ཞིག་ཡིན་ནམ། གལ་ཏེ་འདོད་པ་ཆུང་བ་ཞིག་ཡིན་ནམ། གལ་ཏེ་ཆོག་ཤེས་པ་ཞིག་ཡིན་ནམ། གལ་ཏེ་རབ་ཏུ་དབེན་པ་ཞིག་ཡིན་ནམ། གལ་ཏེ་རྐང་པ་སྐུད་པ་དང་བྲལ་བ་ཞིག་ཡིན་ནམ། གལ་ཏེ་སྨྲ་བ་ཉུང་བ་ཞིག་ཡིན་ན་ཡང་དེ་འདི་སྐད་དུ་ཁྱོད་ནི་སྔོན་ཡང་འདི་ལྟར་སྨྲ་བ་ཉུང་བ་ཉིད་དུ་གྱུར་ཏོ་ཞེས་ཟེར་རོ། །གལ་ཏེ་བརྗོད་པ་ཉུང་བ་ཞིག་ཡིན་ན་ཡང་དེ་འདི་སྐད་དུ་ཁྱོད་ནི་སྔོན་ཡང་འདི་བཞིན་དུ་བརྗོད་པ་ཉུང་བ་ཉིད་དུ་གྱུར་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་ཁྱོད་ལ་རྣམ་པ་འདི་ལྟ་བུའི་སྦྱངས་པའི་ཡོན་ཏན་དག་ཡོད་པ་ལས་ན། གདོན་མི་ཟ་བར་སྔོན་ཡང་ཁྱོད་སྦྱངས་པའི་ཡོན་ཏན་དང་། ལེགས་པར་སྡོམ་པ་འདི་དག་དང་ལྡན་པར་མ་གྱུར་མི་སྲིད་པའི་ཕྱིར་རོ་ཞེས་ཟེར་རོ།