སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཡིན་གྱིས། འདི་དག་གཞན་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་མ་ཡིན་ནོ་སྙམ་ནས་རློམ་སེམས་སུ་བྱེད། འཕྱ་བར་བྱེད། སྟིང་བར་བྱེད། འཁྲུག་པར་བྱེད། སྨོད་པར་བྱེད་དེ། དེ་དེ་ཙམ་གྱིས་ང་རྒྱལ་འཕེལ་བ་དང་། ང་རྒྱལ་སྐྱེད་པར་འགྱུར་ཞིང་རྣམ་པ་ཐམས་ཅད་མཁྱེན་པ་ཉིད་ཀྱང་རིང་དུ་བྱེད། སངས་རྒྱས་ཀྱི་ཡེ་ཤེས་བླ་ན་མེད་པ་ཡང་རིང་དུ་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཐབས་ལ་མི་མཁས་པ་དེ་ནི། དེ་ཙམ་གྱིས་ལྷག་པའི་ང་རྒྱལ་སྐྱེད་པར་འགྱུར་བས་ན། དེའི་ས་ནི་གཉིས་སུ་ཤེས་པར་བྱ་སྟེ། གཉིས་གང་ཞེ་ན། འདི་ལྟ་སྟེ། ཉན་ཐོས་ཀྱི་ས་དང་། རང་སངས་རྒྱས་ཀྱི་སའོ། །དེ་ལྟར་བདེན་པའི་བྱིན་གྱིས་རླབས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལ་བདུད་ཀྱི་ལས་འབྱུང་བར་འགྱུར་ཏེ། དེ་ལ་དེ་དགེ་བའི་བཤེས་གཉེན་དག་ལ་བསྟེན་པར་མི་འགྱུར། བསྙེན་པར་མི་འགྱུར་ཕྱིར་འབྲང་བར་མི་འགྱུར། གོམས་པར་བྱེད་པར་མི་འགྱུར། བསྙེན་བཀུར་བྱེད་པར་མི་འགྱུར་ཞིང་། བདུད་ཀྱིས་བཅིང་བ་དེ་ཉིད་དམ་པོར་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཕ་རོལ་ཏུ་ཕྱིན་པ་དྲུག་ལ་མ་སྤྱད་ཅིང་ཐབས་ལ་མཁས་པས་ཡོངས་སུ་མ་ཟིན་པའི་ཕྱིར་ཏེ། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཡང་བདུད་ཀྱི་ལས་སུ་རིག་པར་བྱའོ། །རབ་འབྱོར་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་མ་སྤྱད་ཅིང་། དེ་བཞིན་དུ་སྦྱར་ཏེ། སྐྱོན་མེད་པར་མ་ཞུགས་པའི་བར་གྱི་དྲུང་དུ་བདུད་སྡིག་ཅན་མིང་གིས་བྱིན་གྱིས་བརླབས་ཀྱིས་འོང་བར་འགྱུར་ཞེ་ན། རབ་འབྱོར་འདི་ལ་བདུད་སྡིག་ཅན་ཆ་བྱད་གང་ཡང་རུང་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་དྲུང་དུ་འོང་ནས། འདི་སྐད་དུ་རིགས་ཀྱི་བུ་ཁྱོད་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཡིན་ཏེ། ཁྱོད་ཀྱི་མིང་ནི་འདི་ཞེས་བྱའོ། །ཁྱོད་ཀྱི་མའི་མིང་ནི་འདི་ཞེས་བྱའོ། །ཁྱོད་ཀྱི་ཕའི་མིང་ནི་འདི་ཞེས་བྱའོ།